terça-feira, 10 de março de 2015

Konsellu Ministru deskuti prosesu legal kaptura Mauk Moruk

.

Timor Post - 30 Marsu 2015

DILI-Segunda (09/03), horiseik Primeiru Ministru Rui Maria de Araújo, lidera Konsellu Ministru extraordináriu hodi deskuti rejolusaun atu fasilita prosesu legál atu implementa planu operaasaun konjunta nian.

Marka prezensa iha konsellu ministru ekstraordináriu ne’e, Ministru Estadu Konsellu Ministru Agio Pereira, Ministru Planeiamentu no Investimentu Estratéjiku Kay Rala Xanana Gusmão,Ministru Justisa Ivo Valente, Xefe Estadu Maior Jenerál F-FDTL, Maior Jenerál Lere Anan Timur, Vise Xefe Estadu Maior Jeneral F-FDL Brigadeiru Jenerál Filomeno Paixão, Ministru Defeza Cirilo Cristovão, Ministru Interior Longuinhos Monteiro, Komandante Jerál PNTL Interinu Afonso de Jesus, inklui Komandante Operasaun Nasionál PNTL Interina, Superintendente, Natercia Eufrazia Soares Martins.

“Ne’e inkontru Konsellu Ministru extraordináriu atu haree rejolusaun hodi fasilita prosesu legál atu implementa planu operaasaun konjunta nian. Polísia Nasionál Timor-Leste sei aprezenta planu mai Konsellu Ministrus, aban (ohin) Ministru Defeza no Ministru Interior sei hasoru malu ho Parlamentu para hodi hanoin hamutuk,” Porta Voz Governu Agio Pereira informa ba jornalista sira iha palásiu Governu, Segunda (09/03).

Konteudu hosi rejolusaun maka analiza ba situasaun seguransa ho baze ba situasaun ne’ebé akontese iha Baguia, no mós kona-ba situasaun ne’ebé 15 de Janeiru akontese iha Laga.

“Oinsa maka atu proteze populasaun no fó seguransa populasaun, populasaun mós bele toba dukur, sira bele ba eskola. Estadu nia dever ida, entaun di’ak liu tuir lei seguransa nasionál nian fó dalan hodi estabelese operasaun konjunta hodi bele fó rezultadu di’ak ba povu,” subliña Agio.

Nia dehan, operasaun konjunta ne’e Polísia Nasionál Timor-Leste mak sei haree no sei iha liña koordenasaun ho komandu F-FDTL, hodi haree oinsa maka detallus operasionál ne’e atu hala’o tuir evidénsia ne’eb’e iha.

Iha Segunda (09/03) dadersan komisaun interministerial ne’ebé mai hosi superior defeza no seguransa konvoka inkontru ida liu hosi konsellu seguransa hodi fó atensaun sériu ba kazu ne’ebé akontese iha Baguia.

“Ema hot-hotu involvidu direitamente iha krime ne’e tenke iha prizaun hodi prosesu legál ne’e bele ba oin, selae susar atu la’o ba oin,” tenik Agio Pereira.

Oras ne’e Komisaun interministeriál konsentra iha situasaun ne’ebé mosu iha Baguia nian tenke resolve ho urjente, atu nune’e populasaun bele sente hodi hetan dame.

Nia subliña, estadu sei fó duni protesaun no prosesa mós ema ne’ebé involvidu hodi hakanek PNTL inklui Corpo Seguransa Pesoal (CSP), ne’ebé durante ne’e eskolta Prezidente Parlamentu Nasionál, Vicente Guterres.
.

Sem comentários:

Publicar um comentário

Nota: só um membro deste blogue pode publicar um comentário.