quinta-feira, 9 de abril de 2015

Lere Anan Timor koalia lia loos - F-FDTL la tiru malu ho KRM

.

Timor Hau Nian Doben - 09 de abril de 2015

Tuir informasaun Timor Hau Nian Doben hetan hosi membru Konsellu Revolusaun Maubere (KRM) ida,  Chefe Estado-Maior das Forças de Defesa de Timor-Leste (F-FDTL), Major-General Lere Anan Timur koalia lia loos kona ba tiru malu iha Laga, Baucau.

Iha entrevista ida ho media Timor-Leste nian, Lere Anan Timor haktuir katak "rezeita katak membru F-FDTL tiru malu ho grupu Revolusionariu Maubere horsehik iha aldeia Selegua, suku Sagadate, administrative Laga, munisipiu Baucau".

Tuir ami nia fontes, polisia mak tiru malu duni ho KRM membrus sira, laos F-FDTL.

"Lere rejeita membru F-FDTL tiru malu ho KRM, ne'e loos duni tanba membru polisia maka tiru laos F-FDTL. Konflitu ne'e ke polisia halo laos de'it ba membru KRM nian, maibe hasoru mos populasaun baibain ka inosente", dehan membru ida hosi KRM ba Timor Hau Nian Doben foin lalais.

Ema ida mate no balun kanek todan iha konfrontus  ke hahu loron rua liu ba, ho polisia no membrus KRM nian, iha distritu Baucau. Joven nain tolu hetan tiru husi Batalhaun Orden Publika sesta-feira liu ba no rezultadu mak joven sira ne'e kanek todan, no tenke halo operasaun iha Ospital Baucau hodi hasai kilat musan.

Tuir sasin hosi populasaun  ida ke koalia ho Timor Hau Nia Doben, povu inosente sente trauma no tauk tanba membru polisia balun halo intimidasaun ba povu tanba deskonfia de'it ke sira subar lider KRM, Mauk Moruk, ka ninia membrus.

"Ami tauk no trauma tanba polisia loron-kalan sira halo intimidasaun ba povu tanba sira hanoin ami subar Mauk Moruk no ninia membru sira. Ami tauk sira oho ami. Boot sira mak halo konflitu no ami povu kiik mak lori todan", dehan señor ida ba Timor Hau Nian Doben.

"Ami husu ba governu no polisia hodi rezolve kazu ne'e lalais, ami lakohi terus tan. Ami mos husu ba BOP hodi hapara sira hahalok aat hasoru povu inosenti. Tanba sa mak ami mak lori todan?", nia remata.
.

Sem comentários:

Publicar um comentário

Nota: só um membro deste blogue pode publicar um comentário.