segunda-feira, 18 de maio de 2015

Halo Viajen Barak Ba Liur, Xanana Sei Redus PN Nia Orsamentu

.

Jornal Nacional Diário - 18 de maio de 2015

Durante ne’e, Parlamentu Nasional (PN) maka sempre hakilar Governu kona-ba atu gasta osan tuir ninia dalan liu-liu ba nesesidade povu nian, maibé PN rasik maka loke dalan ba Governu hodi gasta osan la tuir ninia dalan no sulin hanesan bee.

Eis Primeiru Ministru Kintu Governu konstitusional, atual Ministru Planeamentu Investementu Estratéjiku, Kay Rala Xanana Gusmão,ejiji ba Parlamentu Nasional atu redus sira nia viazen estranjeiru, tanba tuir Xanana nia hare, Parlamentu Nasional nia viazen estranjeiru ne’e, barak demais.

Xanana dehan, ezersisiu ida ne’e, ezersisiu preparatoriu ba Governu atu prepara prioridades, ba orsamentu nian.

“Ita bo’ot sira Parlamentu nia osan ne’e mós tenki hatu’un, tanba viazen estranjeiru ne’e, barak atu mate, ita bo’ot sira ba hela deit liur,” dehan Xanana Gusmão ba deputadu sira iha Ministeriu Negosiu Estranjeiru I Koperasaun Dili, Kinta (14/5).

Xanana dehan, sestu Governu konstitusional ne’e, sei halo mudansa iha parte hot-hotu atu bele atinji obejetivu sestu Governu ida ne’e nian mehi.

“Ita bo’ot sira (Parlamentu Nasional) nia osan sei hatun, tanba kualidade ne’e, kona-ba orsamentasaun, kualidade de fiskalizasaun i kualidade de ezekusaun,”katak Xanana.

Nia hatutan, Sestu Governu ida ne’e, sei halo reforma fiscal iha área tolu hanesan, reforma tributaria, reve ba despezas, reforma ekonomia, ho objetivu atu redus despezas, no hasa’e reseitas.

“Minarai ne’e, ita nia reseita. Sei ita halo hanesan ne’e, no halo hanesan ne’eba, ita sei redus dependensia ba minarai, laos fali doares,”esplika Xanana.

Maibé Xanana dehan, kona-ba reforma fiscal ne’e, la signifika tinan idane’e, Governu atu substitui kedas ona minarai ne’e.

Xanana haktuir, atu redus buat hotu maka, Primeiru Ministru Rui Araújo atu halo reforma ba buat hotu, li-liu halo reforma iha funsaun públika.

“Ita atu hala’o duni, tanba ita balu servisu ho klamar, no balu servisu ho kilat, se hanesan nafatin, ita se bok malu nafatin,”tenik Xanana.

Alende ne’e, Primeiru Ministru Rui Maria de Araújo hatete katak, Governu hahu hodi hamosu intensaun atu komprende dinamika foun iha prosesu ida ne’e.

“Jornada orsamental ne’e, atu lori ita ba iha output inportante rua, ida ba orsamentu 2016, ita ninia prioridades nasionais ne’e iha ne’ebé, ita hotu tu’ur hamutuk hodi reflete, segundu atu define prioridades nasionais i ita define mós envelope fiscal ne’ebé lofikamente tenki konsistente ho prioridades nasionais ne’ebé ita define,”katak Rui Araújo.tap
.

Sem comentários:

Publicar um comentário

Nota: só um membro deste blogue pode publicar um comentário.