terça-feira, 26 de maio de 2015

PR Taur Labele “Harii Partidu Politiku”

.

Jornal Nacional Diário - 26 de maio de 2014

Povu iha Suku Riheu, Postu Administrativu Gleno, Munisípiu Ermera, husu Prezidente Repúblika (PR), Taur Matan Ruak, atu labele “harii partidu politiku (Parpol)”, maibe tenki mantein nafatin pozisaun hanesan figura netral no independente ba nasaun Timor-Leste.

Tuir Povu Suku Riheu Estanislau da Cruz Ximenes liu husi sesaun dialogu ho Prezidente Repúblika (PR), Taur Matan Ruak, Segunda (25/05), iha Suku Riheu, konsidera oras ne’e dadauk figura sentral ne’ebé independente iha TL laiha ona, tanba lider nasaun ne’e nian barak liu mak envolve iha partidu politiku.

“Ha’u husu atu halo rekonsialisaun ba malu, inimigu ita sei halo rekonsiliasaun maibe ita nia uma laran ita lakonsege, tanba ne’e ha’u husu atu Prezidente Repúblika hamriik independente nafatin atu haree ema hotu-hotu tanba figura sentral laiha ona,” dehan Estanislau hodi sita ba realidade agora nian.

Nune’e mós, Nuno João Pereira husu ba PR Taur atu kontinua ho karakter ida ne’ebe hadomi povu, tanba PR Taur nu’udar ema ida ne’ebé laran luan ba povu.

“Ha’u husu Prezidente hadomi povu Timor hanesan uluk to’o agora nafatin, rona povu nia susar hanesan prezidente halo komparasaun iha programa ruma kona ba suku tenki fo atensaun no labele haluha povu kuandu mandatu remata,”dehan Nuno.

Hatan ba Prekupasaun ne’e PR, Taur Matan Ruak, hatete, esforsu Estadu mak buka halo rekonsialisaun hodi hanoin buat ne’ebé mak akontese no buat ne’ebe mak diak kontinua hala’o no at husik no labele halo tuir.

“Ha’u nia poziaun hanorin oan sira atu halo tuir buat ne’ebe diak kontinua nafatin, at ita hakribi soe ba kotuk diak ita hatutan,” dehan tan PR Taur.

Prezidente simbulu nasaun nian mak simbolu Timor oan hotu nian, tanba nasaun ida labele simbulu rua, Prezidente simbulu ida ne’ebe hametin paz no kria unidade.

Antes ne’e liu husi Xefi Kaza Sivil Palasiu Prezidensial, Fidelis Magalhães, hateten, PR Taur hakarak sai figura independente ba povu tomak, tanba ne’e nia sei la harii parpol.

Kona ba atu harii parpol ne’e, povu iha Ermera lakohi PR atu harii, maibe povu iha Viqueque husu atu PR Taur harii parpol, tanba tuir povu iha Viqueque, dezenvolvimentu TL oras ne’e la’o marka pasu hela.

Tuir informasaun ne’ebé esplha iha terrenu, deskonfia partidu foun ida ho naran Partido Resistencia Democratico (PRD), oras ne’e hala’o namanas hela aktividade, no PRD ne’e rasik deskonfia PR Taur mak harii.Nev
.

Sem comentários:

Publicar um comentário

Nota: só um membro deste blogue pode publicar um comentário.