segunda-feira, 11 de maio de 2015

Sabino Ho Nia Membru 47 Entrega-An – Julio Hornai Responde L-7

.

Jornal Nacional Diário - 11 de maio de 2015

Kordenador CPD-RDTL, Suku Lavateri, Postu Administrativu Baguia, Munisípiu Baucau, Sabino Pereira alias Foholete ho nia membru hamutuk nain 47, Sesta (08/05/2015), tuku 22:00 OTL, enrega-an ba Komando Operasaun Konjunta (KOK).

Sabino Foholete ho nia membru sira ne’e entrega an ba KOK iha Posto Komando 3, kompostu husi Posto Komando Baguia, Sagadate ho Samalari, Munisípiu Baucau.

Sabino ne’ebe helik subar ba mai iha ai-laran, fatuk kuak no ai-kuak sira iha Laga ho Baguia nia klaran, tanba tauk hasoru forsa hafoin kazu agresaun fiziku no asaltu hasoru membru PNTL Eskuadra Laga iha Suku Lalulai.

Sabino nia membru sira ne’e simu diretamente husi Komandante Taktika KOK, Koronel Rairia, ne’ebé maka destaka iha Munisípiu Baucau.

Iha deklarasaun ba media, Sabino Foholete, reprezenta nia maluk sira ne’ebé maka entrega an ba KOK esklarese katak, nia rasik entega-an ho nia membru nain 6 seluk iha kedas Kinta (07/05/2015) no membru sira seluk entrega-an iha loron tuir mai Sesta. Nune’e, iha Sabadu (09/05/2015), KOK tula sira 47 ne’e ho kareta HiCom F-FDTL nian hodi lori hotu mai aprezenta iha Komando Baucau.

Sira ne’ebé mai ho kareta HiCom senti laran lametin, tanba tauk hetan persegisaun ou torturasaun, maibe hafoin hasoru malu tiha ho Koronel Rairia no haree hetan sira lider Sabino Foholete, sira senti hanesan esperansa bot no ho hamanasa sira tun husi kareta ba kaer liman ho Koronel Rairia ho membru KOK sira seluk tan.

“Ha’u ho ha’u nia membru sira durante ne’e subar an. Ami lahatene buat ida, tanba ne’e maka ha’u mobiliza membru sira mai entrega-an para koopera ho justisa no koopera ba estabilidade. Lalika rona isu barak dehan atu tiru malu, tiru malu ho se?, ami mai para koopera ho maun sira para ita hamutuk hodi submete ba justisa,” esklarese Sabino Foholete ba jornalista sira iha Komando PNTL, Baucau, Sabado (09/05/2015).

Sabino hateten, antes ne’e sira lakohi koopera ho justisa, tanba tauk ho torturasaun husi polisia, hafoin kazu ataka membru PNTL Eskuadra Laga iha Lalulai. Maibe, tuir informasaun ne’ebé iha katak, operasaun HANITA ne’e la’os atu baku ka oho, maibe bolu malu tanba ne’e maka kontaktu malu hodi tun mai koopera ho seguransa no justisa.

Nia hateten, membru CPD-RDTL halai sae ba foho hodi hein mos prosesu Welaluhu nian hodi kaer ba filozofias ida katak, uluk luta ba Independensia, mas agora luta ba ekonomia.

Koperativa Welaluhu, Sabino fo sasin katak, hetan apoiu husi Prezidente Republika (PR), Taur Matan Ruak, Xefi Estado Maior Jeneral das FALINTIL-FDTL, Maijor Jeneral Lere Anan Timur, eis Primeiru Ministru (PM), Kay Rala Xanana Gusmão.

Momentu neba, lider historiku no ukun nain hirak ne’e tatoli ba CPD-RDTL atu ida-idak fila ba nia knua, maibe buka mobiliza malu atu halo koperativa.

“Momentu ne’eba Prezidente Taur Matan Ruak hateten katak buat ne’ebe imi halo exemplu ida diak hodi hatudu ba Povu Timor tomak no mos Primeiru Ministru Xanana husu mai ami atu husik fatin ne’eba depois maka Governu tau matan no aranza fini no fatin ne’e Governu mak responsabilidade. Iha ne’eba mos Governu promete ba hodi hein rezultadu husi Welaluhu, mais husi Governu no komisaun CPD-RDTL, Antonio Aitahan Matak ho sira seluk nunka aparese to’o akontesementu iha Lalulai,” afirma Sabino Foholete.

Sabino rekoñese katak, nia durante ne’e nunka hatene paradeiru eis Komandante Brigada Vermelha, Paulino Gama “Mauk Moruk” nian.

“Ha’u husu deskulpa kona ba atetude Mauk Moruk nian kontra Estado ne’e ha’u lahatene, atu hatene kona ba ne’e husu ba nia rasik, ami lahatene, ami povu bai-bain ne’ebe ami hakarak halo koperativa hodi sustenta ba ami nia moris ami nia kabun hamblaha. Ami la’os grupu Mauk Moruk nian, ami grupu CPD-RDTL nian, kona ba kazu Saelari ho Baguia, ami lahatene, tanba ami durante ne’e tauk ne’ebé ami subar deit,” Sabino esklarese tan.

Husu kona ba kontaktu ka ligasaun ho MM durante ne’e, Sabino dehan kontaktu ka lakontaktu Cowboy mak hatene. Maibe durante ne’e iha ai-laran, han deit maka batar ut, aifarinha ho fehuk tunu.

Maske haksimuk an iha ai-laran no dezvia husi forsa KOK, maibe Sabino ho nia grupu kontinua mobiliza malu hodi kuda kafe oan iha Lavateri nian.

Sabino dehan, nia la’os membru Mauk Moruk nian no la tama iha estrutura Konselhu Revolusaun Maubere (KRM).

Sabino relata katak, nia nunka hasoru malu no tuur hamutuk ho Mauk Moruk. Karik iha evidensia ruma, nia prontu simu konsekuensia justisa.

“Kona-ba foti pistola PNTL Laga nian ne’e, ha’u ho ha’u nia grupu la involve. Aktu ida ne’e husu ba Mauk Moruk ho Cowboy maka responsabiliza,”afirma Sabino Foholete.

Liu husi biban ne’e, Sabino apela ba membru grupu ilegais ne’ebé mak sei movimenta iha ailaran atu entrega-an lalika tauk, mai hodi koopera ho Forsa no Polisia hodi koopera ho Justisa hodi buka lia los, labele fiar rumoris, propaganda no polítika foer sira, karik mak tauk nia prontu atu fasilita hodi mai entrega-an.

Iha fatin hanesan Komandante Taktika KOK, Tenente Koronel Rairia akresenta tan, membru grupu ilegais sira entrega-an, tanba durante KOK halo aprosimasaun liu husi telefone no mós maneira seluk tan.

Koronel Rairia hateten, ba oin KOK iha pozisaun firme katak, grupu ne’ebé mak sente subar an karik tun mai deit ona hodi koopera ho KOK atu nune’e bele kontribui ba estabilidade, tanba mesak Timor oan deit.

Administrador Munisípiu Baucau, Antonio Augosto Guterres, realsa tan katak, nia nu’udar lideransa Munisípiu nian sente kontente tebes no agradese ba forsa rua ne’ebé mak hala’o operasaun hanaran HANITA.

Ha’u kontente bainhira sira mai entrega-an ba ita nia forsa sira hodi koopera hamutuk kria estabilidade hodi dezenvolve ita nia rain. Kuandu buat ruma iha justisa mak sei deside,”hateten Administrador Antonio Guterres.

Administrador ne’e mós rekoñese katak, durante operasaun HANITA halo povu trauma oitoan, tanba ne’e mak nia rasik hamutuk ho liders forsa rua ne’e nian tun direta ba iha suku hodi halo aprosimasaun ho komunidade rasik.

Oras ne’e dadauk Sabino ho nia membru detein hela iha sela Komando PNTL, tanba sei halo identifikasaun durante oras hira nia laran hodi nune’e bele submete ba Primeiru Interogatoriu iha Tribunal Munisípiu Baucau.

Durante operasaun HANITA husi faze primeiru to’o segundu, iha membru KRM ho CPD-RDTL entrega-an no mós hetan kaptura hamutuk nain 392. Husi total sira ne’e, submete ba tribunal, balun livre no balun TIR (Termo Identidade Residencia) no mos balun mak ba Prijaun Preventiva.

Hornai Responde L-7

Husi sorin seluk, Komandante Jeral PNTL, Komisariu Julio Hornai, afirma katak, KOK sei la retira husi Munisípiu Baucau, hodi kontinua buka tuir Mauk Moruk ho nia membru sira.

Kestaun ne’e afirma husi Komisariu Julio Hornai, hodi responde ba opsaun husi eis Komandante FALINTIL, Cornelio Gama “L-7” ne’ebé husu atu retira KOK para sira bele halo aprosimasaun ho Mauk Moruk.

“Ami kumpri ami nia misaun ami kumpri ami nia dever ne’ebé maka Governu fo rezolusaun katak, ba atu halo operasaun no bolu ita nia maluk sira ne’ebé maka tuir mandadu de kapturasaun ne’ebé maka iha para atu ba prosesu justisa, entaun operasaun ne’e sei lao nafatin,” hateten Julio Hornai iha Kuartel Jeral PNTL, Sesta (08/05/2015).

Cowboy hetan Autorizasaun husi DP

Komandante Jeral PNTL Komisariu Julio Hornai informa mós katak, arguido Cowboy halo konferensia imprensa iha Kuartel Jeral F-DTL, Sesta foin lalais ne’e, tanba hetan lisensa husi Defensor Públiku (DP) Munisípiu Baucau, atu nune’e nia bele hato’o nia deklarasaun ba públiku kona-ba kazu ne’ebé mak nia infrenta dadauk.

“Cowboy nia Defensor ho Komando Taktika iha akordu ida no hetan autorizasaun husi Tribunal para halo aktividade ne’e,” hateten Julio Hornai.may/nax

Sem comentários:

Publicar um comentário

Nota: só um membro deste blogue pode publicar um comentário.