sexta-feira, 22 de maio de 2015

Seidauk altera Lei Vitalisia, FRETILIN fo kulpa ba lider PN

.

Timor Post - 22 de maio de 2015

DILI—Lideransa másimu partidu FRETILIN deklara, deputadu sira iha Uma Fukun seidauk halo alterasaun ba lei pensaun vitalísia tanba failansu hosi  lideransa Parlamentu Nasionál (PN) nian.

  Prezidente FRETILIN, Fransisco Guterres Lú  Olo dehan, nia parte rekoñese, oras ne’e dadauk povu  no sosiedade  sivíl  sira kestiona maka’as kona-ba pensaun vitalísia ne’ebé maka fó benefísiu  de’it  ba grupu balun liuliu  eis titulares sira.

 Públiku  mós kestiona katak, polítika  PN nian ne’ebé maka seidauk halo alterasaun ba lei pensaun vitalísia ne’e, tanba sira rasik tantu Bloku Koligasaun no opozisaun FRETILIN iha ona konsensu ida.

 Hatan ba kestaun sira ne’e, Lú  Olo haktuir, iha governasaun Aliansa Maioria Parlamentar (AMP) nian, bankada FRETILIN maka aprezenta proposta alterasaun ba lei pensaun vitalísia  ne’e, maibé altura ida ne’eba Prezidente Parlamentu, Fernando La Sama de Araujo hatama tiha ba gaveta no la ajenda.

 “Agora dadauk iha tan proposta alterasaun lei pensaun vitalísia  hosi  bankada FRETILIN nian, maibé lahatene bainhira maka senhor Prezidente Vicente Guterres bele tau ba ajenda para Parlamentu Nasionál bele deskute hodi aprova no halo alterasaun ba lei ida ne’e,” hatete Lú  OLo iha Comite Central FRETILIN, Tersa (18/05).

 Lú  Olo dehan, atu halo alterasaun ba lei pensaun vitalísia  ka la’e, Parlamentu Nasionál hanesan orgaun kompetente maka bele foti desizaun.

“Ha’u mós hatene katak pensaun vitalísia  ne’e ladun sustentavel. Ladun sustentavel bainhira kontinua nafatin ida ne’e no eis titulares sira mós aumenta ba bebeik. No ida ne’e iha implikasaun ba ita nia dezenvolvimentu iha future,”katak Lú  Olo.

Lú  OLo klarifika, iha governasaun FRETILIN nia ukun ne’e ho osan oituan, maibé sistema ne’e mós la’o no osan oituan mós konsege halo buat hotu.

Nia preokupa, tan saida maka ho osan barak ne’ebé FRETILIN husik hela no até agora ukun ne’e la la’o ba oin.

“Primeiru maka ema nia kapasidade duni, se ita nia riku soin ne’e maka ita lahatene uza meius ne’e para hadi’a  ita nia moris entaun problema maka ita kapasidade jestaun ne’e,”nia akresenta.

 Ho problema sira ne’e hotu, Lú  Olo dehan, FRETILIN sei kontinua hamri’ik no buka atu hadi’a , ajuda estadu ida ne’e tanba ne’e maka FRETILIN fó nia apoiu, no importante maka governu tenke utiliza osan ne’e ho didi’ak  hodi hetan rezultadu ne’ebé di’ak .

 Nune’e mós tuir Secretariu Jéral partidu FRETILIN, Mari Alkatiri akresenta liutan katak, FRETILIN dez de tempu AMP hatama proposta lei ida atu halo revizaun ba lei pensaun vitalísia.

 “Proposta lei ida ne’e atu husu ba ema ne’ebé simu pensaun vitalísia  sei ho idade ne’ebé joven, tenke prontu  nafatin atu servi estadu, maibé proposta lei ne’e meza PN la prekupa,” deklara Alkatiri.

Atu resolve prekupasaun públiku  nian kona-ba altera lei pensaun vitalísia  ne’e só uniku desizaun maka iha Parlamentu. (tay)
.

Sem comentários:

Publicar um comentário

Nota: só um membro deste blogue pode publicar um comentário.