quarta-feira, 24 de junho de 2015

Ameasa Kadeia Tinan 3, L-7: Dili Laran Ahi Sei Suar

.

Jornal Nacional Diário - 24 de junho de 2015

“Ameasa kadeia ba L-7 ne’e ita rahun hotu, kapital Dili ahi sei sua…..ar, ahi sei sua…..ar tanba L-7 mos kontribui ba libertasaun nasional,”promete L-7 ba JN-Diário iha nia hela fatin Bidau Mota Klaran, Dili, Tersa (23/6).

Eis Segundu Komandante FALINTIL rejiaun III, Cornelio Gama ‘L-7’ reafirma mos katak, manifestasaun ne’ebé nia halo atu hadia problema konflitus, injustisa no korupsaun maka atu tama fali kadeia tinan 3, diak liu ba hatan deit iha Ai-laran.

L-7 hatete lia hirak ne’e relasiona ho estatementu jurista Manuel Tilman nian kona ba L-7 mak obriga án halo manifestasaun maka sei tama kadeia tinan 3 bazeia ba lei artigu 244 kodigu penal, desobidensia kualifikada.

Kastigu tinan 3, nia dehan, L-7 kastigu tinan rua nulu resin hat iha ailaran. Ne’ebé nia nunka atu simu.

“Governu nunka kurizi nia án ida ne’ebe kontra lei, nunka kurizi nia án tanba ninia sala, sala ne’e maka ami koalia sai. Ne’ebé diak liu ha’u ba hatan iha Ai laran hamutuk ho Mauk Moruk ita halo funu, ha’u la tauk ema ida, tanba imi sala ne’e maka ha’u kontra imi,”afirma L-7 tan.

Eis Komandante gerilla ne’e fo sala ba Tribunal tanba hatun rezolusaun tuku-tebe ema arbriu iha parte leste. Tuir nia, Tribunal tenke responsabiliza, laos tribunal halo sala tiha fo sala fali ba ema seluk.

“Labele fo sala ba L-7. L-7 mantein nia pozisaun ha’u nia forsa mak povu, ha’u mak povu nia mata dalan, ne’e duni povu lakohi hanesan diskrimina ema ida arbiru, labele odiu ema ida abitrariu, lori fali lia ne’e kontra fali L-7,”nia dehan.

L-7 preokupa maka’as tanba justisa iha rai ida ne’e akontese deit ba ema kiik no laiha poder, maibe ba ema sira ne’ebe kaer ukun laiha lei ida mak aperta. Tanba ne’e nia dehan, Tribunal keta ameasa L-7 tanba manifestasaun kuriji Governante sira ne’ebe maka kaer ukun lalos.

“Labele ameasa fali ha’u komarka tinan 3. Se ha’u lakohi karik imi baku ha’u, hau reazen karik, tribunal keta ameasa L-7 ne’e hau hatete lolos, tanba uluk Indonesia lori kaiñaun, morteru ameasa L-7, maibe L-7 la fo ulun, mas ameasa L-7 agora, L-7 la fo ulun tanba sira sala maka kritika sira, sira sala ne’e labele koalia”L-7 reforsa.

Nia argumenta liu tan katak, objetivu husi manifestasaun atu hadia fallansu no problema sira ne’ebé akontese tiha iha rai ida ne’e, maibe la buka solusaun para hadia.

Bazeia ba artigu 42 no 43, L-7 klafika katak, fo dalan atu halo manifestasaun, maibe respeitu no obrigasaun fo koñesementu ba polisia maibe fo sala ba L-7. Entaun L-7 koalia, manifestasaun tuir mai sei la fo tan koñesementu ba polisia no sei organiza manifestante sira tun deit hala’o manifestasaun.

L-7 hatutan katak, tanba manifestasaun la autoriza ona, entaun sira organiza deit konferensia ba impresa, laiha asaun ruma ne’ebe maka estraga estabilidade maibe tanbasa maka tenke tama kadeia.

Nia reforsa katak, L-7 la fo ulun ba ameasa sira ne’ebe maka espalla tanba L-7 ohin mate mos diak, aban mate mos diak.

Nia hatutan ameasa hanesan kontra lei liberdade demokrasia, ameasa kontra RDTL tanba ditadura militar, tanba haree ba brutalidade polisia no forsa baku, persegisaun, hasoru povu kiik.

Relasiona ho ejijensia ne’ebé hato’o, L-7 rasik ho nia grupu kontinua buka dalan seluk hodi manda karta ba Prezidente Repúblika, Parlamentu Nasional, Governu no Tribunal atu foti kestaun ne’e sai prioridade.

“Kontinua manda karta ba, no sei hein respostas, karik laiha respostas sira sei kontinua ejiji to’o hetan respostas,”dehan L-7.

Nia esplika, konteudu husi karta maka hanesan, injustisa, korupsaun, defamasaun, kontra lei artigu 42 no 43, kontra artigu konsellu Libertasaun Nasional, tanba ne’e sei hein respostas husi Xefe Estadu, Governo, Tribunal, Parlamentu Nasional.

Nia dehan, respostas husu Xefe Estadu, Tribunal, Governu, sei lê sai ba publiku bele hatene respostas kada orgaun soberanu nian, aban ka bain rua respostas mai ona, manifestante sira evakua, se laiha respostas manifestante sira kontinua mantein.

Alende ne’e L-7 mos husu Birgadeiru Jenera F-FDTLl, Filomeno Paixão tenke responsabiliza ba nia estatementu ne’ebe defama veteranus, kontra lei, kontra veteranus rihun atus rua.

“Defamasaun veteranus 24 ka 30 anos ne’e defama ha’u L-7, Taur, Lere, Xanana, Lu-Olo, Mau-Buti, Bilou Mali, Sabika, Riak Leman, Samba ne’e imi defama ami to’o!” L7 hatete lia hirak ne’e relasiona ho estatementu Filomeno Paixão nian ne’ebe maka hato’o iha komferensia imprensa semana kotuk.

Tuir observasaun JN-Diário nota katak, Polisia Nasional Timor Leste (PNTL) husi unidade Task Force, Batalhão Ordem Público hamutuk ho Falintil-Forsa Defeza Timor Leste husi unidade Policia Militar (PM) kontinua movimenta iha area Bidau Mota Klaran besik rezidensia Cornelio Gama ‘L-7’ hodi asegura metin. Husi sikun seluk, estrada diresaun mikrolet 010 la’o hanesan baibain, tanba parte polisia la taka dala ona iha diresaun refere.Eus
.

Sem comentários:

Publicar um comentário

Nota: só um membro deste blogue pode publicar um comentário.