terça-feira, 16 de junho de 2015

Cornelio Gama L-7: “Longuinhos Labele Ameasa Ami”

.

Jornal Nacional Diário - 16 de junho de 2015

Eis gerileiru Cornelio Gama ‘L-7’, husu Ministru Interior, Longuinhos Monteiro labele ameasa hodi uza sistema ditadura hatauk povu tanba pedidu manifestasaun ninian atu ejije Justisa popular, paz no korupasaun iha TL.

Tuir L-7 katak, PNTL halo diskriminasaun tanba fo autorizasaun ba AMANTE Futebol hala’o demonstrasaun hasoru Federasaun Futebol Timor-Leste, maibe bandu fali L-7 ho nia grupu halo demonstrasaun.

“Tanba saida maka balun bele, balun labele? tanba dadaun ne’e injustisa no korupsaun buras ona iha Timor-Leste tanba ne’e maka atu alerta ba mundu internasional hodi hatene,”dehan tan L-7.

Nia dehan, Parlementu Nasional autoriza atu L-7 halo manisfestasaun hodi koalia kona-ba paz iha Timor Leste, Longuinhos dehan, labele tanba konteudu karta pedido la klaru kona-ba paz.

“Longuinhos dehan ita paz tiha ona. Se ita paz, 2006 iha paz los ka lae, maibe to’o tinan 2015 laiha paz nafatin tanba ne’e maka ha’u koalia paz no korupsaun no injustisa,”L-7 preokupa tenik.

Nia hatutan, problema ne’ebé mosu iha nasaun ne’e hodi laiha paz ne’e tanba naksalak kedas iha tempu Falintil, no tama ba ukun rasik an buat sira ne’e kontinua mosu bebeik tanba ne’e mak atu halo manifestasaun para hadia naksalak hirak ne’e.

“Se Longuinhos bandu, Longuinhos tenke ba husu Parlamentu tanba saida maka Parlamentu autoriza, Longuinhos maka bo’ot liu Parlamentu ka? Se Longuinhos maka bo’ot liu Parlamentu entaun ba Parlamentu koalia ho deputadu sira katak ha’u maka bandu labele halo demonstasaun,”eis gerileiru ne’e dehan tan.

L-7 haktuir, laiha injustisa, maibe tanbasa maka Governu sira kesar malu dehan naok ten, no sira maka kesar ba Tribunal maibe sai livre fali ida ne’e maka injustisa.

“Exemplu tinan ida ha’u ba asina ha’u nia naran ne’e injustisa, be ha’u nia sala ne’e oinsa? tanba ha’u tiinan 24 iha ailaran hanesan kastigu ida agora mai sira tau fali ha’u iha kadeia dehan ha’u maka injustisa,”eis gerileiru ne’e preokupa.

Demontrasaun ne’ebé L-7 atu halo ne’e, sei koalia kona-ba problema 1975-1999 tenke iha justisa. Buat ne’e, nia dehan, atu lakon ona maibe provoka nafatin tanba ne’e tenke iha Justisa ba sira ne’ebe maka uluk trai nasaun bazeia ba lei internasional nomos direitus humanus tenke haree hotu kazu hirak ne’ebe maka akontese iha pasadu.

Tanba ne’e, L-7 husu ba Ministru interior Longuinhos Monteiro estuda didiak ba hodi tetu lolos.
.
“Ami lakohi ameasa ami ho ditadura, se Longuinhos ameasa ami ho ditadura, ami mos kaer ditadura, ami latauk ema ida to’o ami mate, tanba ami hakarak ajuda Governu no Estadu atu hadia ita nia nasaun,”L-7 hato’o preokupasaun ne’e ba jornalista sira iha nia hela fatin Bidau, Segunda (15/06).

L-7 hato’o expresaun ne’e hodi responde ba estatementu Ministru Interior, Longuinhos Monteiro nian kona-ba banhira hala’o manifestasaun forsa sei kaer.

Nune’e mós, L-7 hateten katak, problema Mauk Moruk nian Estadu tenke rezolve halo didiak.
“Mauk Moruk mate nasaun sei nakdoko, povu ida mate mos nasaun sei nakdoko. Ne’e hatete lolos deit katak, la hatene resolve problema, lori kilat maka resolve, lori ditadura, ami Falintil tinan 24 ditadura ami baruk ona,”nia dehan.

L-7 rasik simu ona karta husi Komando Jeral PNTL kona-ba justifikasaun ba konteudu manifestasaun, tanba ne’e nia parte sei haruka fali respostas kona-ba konteudu lolos ne’ebe maka sei hala’o iha manifestasaun.

Manifestasaun ne’ebe maka tuir planu sei realiza iha loron 22 to’o loron 28 fulan juñu ne’e, karik iha loron ne’ebe maka mensiona iha karta pedidu ne’e maka seidauk hetan respostas maka sira sei kontinua husu reponsabilidade ba Longuinhos Monteiro kona-ba paz, injustisa no korupasaun ne’ebe maka buras ona iha TL.eus
.
.

Sem comentários:

Publicar um comentário

Nota: só um membro deste blogue pode publicar um comentário.