quarta-feira, 10 de junho de 2015

Familia Saudozu La Sama La Abandona Francisca Ho Fernanda

.
Foto, Presidência da República de Timor-Leste, Facebook.
Jornal Nacional Diário - 10 de junho de 2015

Ai-hun no fatuk hun Saudozu Fernando ‘La Sama’ de Araújo nian, iha Ailok-Laran, Dili, sei nakonu ho triste, mata wen no lutu todan.

Familia sira sei tama sai uma privadu Saudozu Ministru Koordenador Asuntusu Sosiais no Ministru Edukasaun, Fernando ‘La Sama’ de Araújo nian, hodi kontinua manifesta sira nia sentidu kondolensia ba familia ne’ebe maka Saudozu husik hela ona iha Tersa (2/6/2015).

Lilin, ai-funan morin, lutu metan, foto La Sama nian no meja ne’ebe hatoba Saudozu La Sama, sei onra furak hafutar rezidensia privadu Saudozu La Sama nian, hodi hein to’o loron 40 aifunan despedida nian.

Iha triste no mata wen laran, Francisca da Cruz nu’udar fen segundu Saudozu La Sama nian, Tersa (9/6/2015), simu prezensa jornalista sira iha uma Ailok Laran, hodi dada lia oituan kona-ba saida maka La Sama husik hela ba familia, liu-liu nia oan feto doben, Fernanda Fizayana ‘La Sama’ de Araújo, ne’ebé foin moris semana tolu nia laran.

Klaramente, Saudozu nia uma privadu Ailok Laran ‘wasiat’ fo tiha ona ba nia oan doben Lirio Hadomi Aquino de Araújo no uma iha Delta mos tau tiha ona Saudozu nia fen kaben Marie Jaqueline Aquino Siapno nia naran (fen bot-red).

Saida maka sei hela ba fen segundu Francisca da Cruz ho sira nian rua nia oan doben Fernanda Fizayan La Sama de Araújo? Maske sei iha situasaun lutu todan nia laran, Francisca da Cruz, hatudu nia oin midar hodi hateten katak, nia la preokupa ho riku soin hira maka Saudozu La Sama husik hela, importante maka oinsa ho futuru oan doben Fernanda Fizayan La Sama de Araújo nian.

‘’Ba ha’u importante mak ha’u nia oan nia direitu atu nune’e nia bele moris diak iha futuru. Ha’u sei la koalia barak tanba bele halo ha’u hanoin barak liu tan,” hateten Francisca da Cruz.

Francisca rasik la hatene to’o Saudozu mate husik hela osan hira maka iha konta bankaria no Saudozu nia konta bankaria hira. Infelismente, Francisca hatene maka Saudozu iha deit kareta privadu rua ne’ebe ladun diak ona.

Hafoin hader tiha Saudozu nia aifunan loron 40 nian, Francisca hanoin ona atu lori Fernanda La Sama ba moris hamutuk ho familia sira iha Suai, maibe familia husi Saudozu La Sama la autoriza hodi dehan, Fernanda ho nia mama tenki hela metin iha uma Ailok Laran.

Francisca fo sasin katak, durante moris hamutuk ho Saudozu La Sama, senti seguru tebes, tanba La Sama ema ne’ebe fuan bot no domin bot tebes ba familia no ema hotu.

Maske Saudozu La Sama preokupa tebes ho servisu, maibe iha loron ferias hanesan Sabadu ho Domingo sempre fokus ba familia.

La’os ne’e deit, iha loron Sabadu ho Domingo, Saudozu La Sama mos koloka tempu luan simu bainaka sira, inklui fo ajudus osan ba maluk no belun sira ne’ebe hetan susar no ajuda joven sira ne’ebe maka presiza osan hodi kontinua sira nia estudus iha universitariu.

“Iha Sabadu ho Domingu, ema barak maka mai hasoru nia, balun aprezenta nia susar no balun fali dehan, nia oan eskola presiza osan. Ne’e, Saudozu sempre ajuda taka matan,” hateten Francisca da Cruz.

Saudozu tau interese Estadu nian aas liu interese familia, tanba ne’e, iha loron serbisu, Saudozu sempre hader sedu ba lalais serbisu iha tuku 7:00 Otl no dala balun kuandu serbisu barak liu fila mai umu tuku 0:00 kalan bot.

“Bainhira bebe moris ona, mak nia foin fahe tempu ho ami barak liu, nia ba servisu fila mos sedu deit, dala ruma meudia mai han nia la ba servisu ona kous deit bebe,’’ Francisca konta tuir.

Ricardo Marcal hanesan Francisca nia aman no Saudozu La Sama nia banin mane, esklarese katak, to’o agora seidauk iha desizaun klreza kona-ba Saudozu La Sama nia pensaun vitalisia ho Saudozu nia pensaun veteranus nian atu entrega ba se. m,aske nune’e, informasaun ne’ebe to’o ona iha futar tilun katak, iha tempu badak familia rasik Saudozu nian sei foti desizaun

Ricardo fiar katak, desizaun hotu ne’ebe maka familia Saudozu La Sama nian foti sei ekelibriu no tau konsiderasaun as liu ba nia oan doben nain rua, Hadomi ho Fernanda La Sama.

Antes Saudozu husik hela mundu ne’e, fo tiha ona orientasaun atu buka rai iha Suai hodi bele halo uma ba Francisca ho Fernanda, maibe prosesu ne’e sei la’o hela Saudozu mate tiha deit.

‘’Matebian fo duni osan ba hau US$ 5.000 hodi sosa rai, momentu ne’e hau buka hetan ona osan mos intrega ona, maibe bainhira sira ba sukat rai ne’e nia luan la tuir fali dokumentos ne’ebe iha luan metru 50 no naruk metru 30, iha momentu ne’e hau fo hatene kedas matebian, nia hatan dehan husik lai nia ba Suai mak rezolve problema ne’e, tan ne’e rai ne’e seidauk rezolve saudozo mate uluk ona,’’ Ricardo haklaken.

Ricardo sublinha liu tan katak, tuir nia hare durante Saudozu moris hamutuk ho nia oan feto, Saudozu ema ne’ebe diak no hadomi tebes nia familia, laos nia fen ho nia oan deit, maibe saudozo mos haree ema hotu hanesan.

Bernabe de Araujo, nudar Saudozu La Sama nia maun konfirma katak, desizaun saudozo nian ne’ebe deside intrega uma Ailok_laran ba nia oan mane Hadomi no uma iha Delta ba fen bot Jaqueline desde iha tinan 2014 bainhira sira separa malu. Basa, Saudozu hanoin katak, nia sei buka fali fatin seluk ba nia fen segundu ho nia oan feto Fernanda.

“Kona ba Saudozu nia osan veteranus ka pensaun vitalisia agora dadaun sei prosesa hela. Karik sai mak ami familia, liu-liu hau hanesan maun sei deside, maibe saudozo nia fen segundu ho nia oan Fernanda, ami la bele abandona,” hateten Bernabe de Araujo.

Bernabe mos hatete, Saudozu ema ne’ebe simples gosta kulia ho se deit. Saudozu la hare ba kor, iha ema ruma ne’ebe mak presija nia ajuda sempre ajuda no la taka odamatan.

Kona ba preparasaun aifunan midar ba Saudozu, familia sira sei halo seremonia bain-bainh hanesan tradisaun Timor nian, hamutuk ho Saudozu nia maun alin sira prepara buat ruma hemu hafoin ba kari aifunan iha Saudozu nia rate.nia
.

Sem comentários:

Publicar um comentário

Nota: só um membro deste blogue pode publicar um comentário.