sexta-feira, 12 de junho de 2015

La Dignu Governu Troka La Sama Agora

.

Jornal Nacional Diário - 12 de junho de 2015

Primeiru Ministru (PM), Rui Maria de Araújo informa katak, la dignu kuandu Governu foti lalais desizaun hodi troka Saudozu Ministru Kordenador Asuntu Sosial no Ministru Edukasaun Fernando ‘La Sama’ de Araújo, kuandu saudozu La Sama nia mate seidauk kompleta loron 40.

“Governu seidauk hanoin atu buka ema troka saudozu La Sama, tanba saudozu La Sama seidauk kompleta loron 40. La dun dignu kuandu ita troka saudozu La Sama ne’ebe seidauk to’o tan aifunan moruk,” dehan PM Rui Araújo ba jornalista Kinta (11/6).

Hatan kona-ba Partidu Demokratiku realiza ona komfrensia da imprensa hodi hato’o sira nia pozisaun kona-ba ema atu substitui saudozu La Sama, PM Rui Araújo hatete katak, ida ne’e desizaun Partidu PD nian.

Xefe Governu ne’e dehan, nia seidauk bele halo komentariu barak ba ida ne’e, maibé Rui Araújo dehan, bainhira to’o tempu, Governu sei fó ema ne’ebé mak atu troka La Sama.

Rui Araújo dehan, rai Timor Leste ne’e, persija ema hot-hotu atu halo servisu iha área hotu.

“Ohin ita servisu iha área ida ne’e, aban ita servisu iha fatin seluk. tanba servisu ba Estadu ninia intrese no servisu ba dezenvolvimentu rai ida ne’e, sei la hotu,”katak Rui Araújo.

Tanba ne’e, Rui Araújo fó mós mensajen ba funsionáriu públiku tomak katak, sai funsionáriu public hodi servisu ona iha instituisaun ida, la signifika katak, nia atu metin ona iha ne’eba.

Timor-oan hotu, li-liu funsionáriu públika sira nia dever imporante ida mak, atu servi Estadu no servi povu. Entaun Rui Araújo esplika hanesan servidor Estadu no povu ne’e, tenke servi iha fatin hotu.

Xefe Governu ne’e dehan, se mak simu ona responsabilidade atu servi Estadu, tenke hala’o nia kna’ar hanesan servidor ne’ebé diak, hodi Estadu bele fó fiar nafatin atu assume tan responsabilidade iha fatin seluk ba futuru.

“Enkuantu ita se servi nafatin, ita iha dever hanesan sidadaun no hanesan Timor-oan ne’ebé servi nia rain rasik,”tenik Rui Raújo

Iha parte seluk, Sekertariu Jeral Partidu Demokratiku (PD) Asanami Sabino informa katak, sira fó konfiansa masimu ba Vice Prezidente PD, Adriano do Nacimento hodi lidera provizioriu kargu Prezidente Partidu PD too kongresu nasional.

Nia hatutan, PD deside sei hato’o naran foun ba Xefi Governu Rui Maria de Araújo atu desidi ema diak ida troka La Sama nia fatin nu’udar Ministru Koordenador Asuntu Sosial no Ministru Edukasaun nian.

Asanami esplika, desizaun dudu Adriano ba Prezidente PD interinu ne’e, tuir estatutu partidu nian.

Asanami reafirma, PD ninia lideransa kolektivu mak, prezidente sekretariu jeral eleitu iha kongresu ho kolektivu ida, iha vice prezidente nain 4, vice sekretariu jeral nain 4 no prezidente CPN ho ninia estrutura.

“Ida ne’e katak, bainhira Prezidente La Sama la iha ona ami nia le’et, ida nafatin lider kolektividade ida mak nafatin subtiu tuir estatutu partidu, no sei rezolve buat hotu- hotu tuir estatutu mak Vice Prezidente Adriano mak assume kargu prezidente,” esklarese Asanami.

Nia hatutan, maske agora Vice Adriano mak sa’e, maibé konektividade lideransa partidu nian, sei kontinua la’o no suporta servisu saida deit mak prezidente interino halo sei hetan suporta kolektividade to’o kongresu nasional.

Nia dehan, oras ne’e dadauk partidu jerasaun foun PD sei iha prosesu lutu nasional durante loron 40. Lutu nasional n’ee hotu mak foin bele koalia atu desidi kargu prezidente liu husi kongresu nasional estra-ordinariu.

“Ami se iha lutu nasional loron 40, ami sei desidi halo enkontru ba distritu hotu mak foin bele desidi lolos. Masek maun LaSama la iha ona ami nia leet, maibé ninia mehi no mensagen sei hamutuk nafatin ho ami,” katak nia.

Kona-ba ema foun atu troka La Sa ma iha Ministeiru Edukasaun, Assanami dehan, sira sei desidi tuir konsensia partidu nian hodi koordena ho xefi Governu Rui Araújo.

Asanami dehan, PD mós sei hamutuk nafatin ho bloku atu la’o hamutuk to eleisaun 2017.cos
.

Sem comentários:

Publicar um comentário

Nota: só um membro deste blogue pode publicar um comentário.