quarta-feira, 17 de junho de 2015

RUI ARAUJO DITADOR FOUN, SEI MONU HANESA HAS TASAK

.

Oan Kiak

Governu foun hanoin tuan, ida ne'e mak realidade Primeiru-Ministro foun hatudu ona mai ita hotu, mudansa ke ita hotu mehi sei la akontese ho governu ne'ebé lidera hosi Rui Araujo, pior liu ita foin haree katak ditadura atu mosu iha ita rai doben ne'e.

Tuir lei laiha dalan hodi hapara Pai L7 hodi hala'o hela ninia manifestasaun pasifika, tanbá lei dehan katak ema hotu-hotu iha direitu hodi manifesta an kona bá saida de'it ke hakarak, maibe tenke tuir saida mak lei haruka.

Termu Identidade no Rezidensia ke tribunal fó Pai L7 mak kesi ita nia Aman hodi lidera manifestasaun ne'e? Ida ne'e la loos ona, tanba sá sira haruka Pai bá rai liur iha loron 25 de Abril hodi Pai reprezenta Estadu Timor iha serimonia bobot tebes iha Australia,serimonia ne'e hodi komemora tinan atus ida ANZAC nian. Pai  ba rai liur,  Estadu rasik mak haruka Pai bá rai liur hanesa veteranu importante tebes hosi Timor Lorosa'e, hanesa mós Aman bá nasaun foun ida ne'e.Pai kriminozu no reprezenta ita nia Estadu? Buat ruma sala ona. TIR la kesi atu pai lidera manifestasaun ida.

Ne'ebé Governu illegal Rui Araujo nian la bele uza TIR hasoru Pai hodi hapara Pai halo manifestasaun pasifiku ida hasoru ninia Governu. Dala barak ona ke ema sira ne'e uza Pai nia naran ba sira nia intrese privadu, tanbá sira hatene katak Pai ninia naran morin lo'os iha Maubere Oan nia leet, ema boot balun lakon ona fiar hosi Maubere Oan maibé Maubere Oan sei fó fiar ba ita nia Aman L7, ne'e mak realidade ita hotu hatene.

Ita nia ukun na'in hatene uza de'it ita nia Konstituisaun Repúblika ba sira ninia intrese de'it nomós hodi sama Maubere Oan sira ninia direitu, sira halimar ho ita nia Konstituisaun hanesa bola ida maibé sira de'it mak tebe bola ne'e, sira mesak mak halo golo, no sira mesak mak manan jogu ne'e.

Maubere Oan sira hateke de'it ho susar, mukit no hamlaha, laiha ukun na'in nein ida hodi rona Maubere Oan nia halerik, Maubere Oan nia tanis, Maubere Oan ninia matan ben. Maubere Oan sei tanis nafatin laiha ukun na'in ida hodi maran Maubere Oan ninia matan ben, sira preokupa mak joga bola ne'e hodi hetan benefisiu ba sira ninia an rasik, naok, halo projetu oin-oin hodi fahe benefisiu ba sira nia an, famillia no sira nia belun boot rasik, Maubere Oan nia halerik sira goza de'it tanbá sira mak heroi foun iha rai lulik Timor Lorosa'e. Povu ninia naran boot de'it uainhira sira presiza Maubere Oan hodi fó votus bá sira, hodi sira kontinua joga bola ne'e hodi hariku sira nia an rasik, ne'e mak realidade tristi teb-tebes ohin loron iha ita rai doben ne'e.

Rui Araujo kuidadu de'it uainhira hakarak sai Suharto foun iha ita nia rai lulik, ami veteranus sei la tolera ida ne'e, ami mak funu hasoru inimigu, Rui laiha respeitu mai ami, antaun sei la simu ami nia respeitu. Rui funu iha ne'ebé? Ninia aman servisu ba se loos, aman karik Komandante FALINTIL ida? Sé mak lidera masakre iha Aitana hodi oho Maubere Oan barak? Karik ita nia Primeiru-Ministro bele hatan ita hotu perguntas sira ne'e.

Primeiru-Ministru Rui Araujo sé mak vota ba nia hodi nia sai Primeiru-Ministru? Maubere Oan mak vota ba nia tanbá nia hetan fiar hosi ami ka nia simu prezente? Antaun to'o 2017 diak liu la kokorek barak tanbá governu de faktu ne'e la iha lejitimidade hosi Maubere Oan, ne'e jogadas katuas 75 nian hodi halo nia sai hanesa boneka ka sira nia TBO. Uainhira povu vota ba ó, antaun Rui Araujo bele kokorek.

Ha'u admira tebes sira ninia korajen hodi hapara ema ida hanesa pai L7 halo manifestasaun pasifiku ida, tanbá ema hanesa Pai funu tinan 24 mak ema hanesa Rui Araujo, Alkatiri, Bano, Teixeira, Manuel Gaspar no seluk-seluk tan hetan naran boot iha ita nia FRETILIN  ohin loron no soe ba do'ok ema hanesa Pai L hosi FRETILIN tanbá sira hatene katak Pai sei la hakruk ba Alkatiri hanesa Maun Lu ke sira volante nia tun sa'e.Tanbá Pai L mak Rui Araujo sai Primeiru-Ministru, tanbá Pai L mak sira seluk hetan moris di'ak iha ita sosiedade ninia leet. Sira dehan katak laiha FRETILIN  laiha independensia, loos duni, maibé la'os FRETILIN ida ne'e no keta haluha ke Maubere Oan mak vota iha Agosto 1999, karik Maubere Oan la atan brani hodi vota atu manan independensia imi hotu mai Timor Lorosa'e hodi funu ho ami, ka sei hela iha rai liur? Ne'e mak ha'u nia perguntas ba ema ha'u temi iha leten.

Rui ó  keta mai halimar ho ami tanbá ami terus barak ona hodi imi tur iha kadeira no sama ami dala ida tan, ami la'os boneka ka bola ba imi tebe tun sa'e hodi  halo imi nia jogadas foer, ami la'os tan ema nein ida nia atan, ami veteranus sei la tolera imi sama tan ami, sei la tolera.

Imi lakohi fó autorizasaun ba Pai hala'o manifestasaun pasifika ida maibé imi fó ba AMANTE halo sira nian, tanbá sá? Imi tauk saída? Tauk Maubere Oan hader no ka'er sira nia kuda talin rasik? To'o uainhira imi hanoin katak imi bele taka Maubere Oan nia lian, Maubere Oan ninia halerik? Laiha fatin ba imi hahú ditadura foun iha rai doben Timor Lorosa'e, imi nia mehi ne'e sei la akontese iha rai ne'e, Maubere Oan barak mate no ami mate restu sei la tolera imi nia hahalok ne'e, ami tenke fó onra ba ami nia maluk ke mate iha funu nia laran.

Rui Araujo hanesa bintang ida iha Facebook, loron atus ida liu ona no to'o agora ninia governasaun la hun no la dikin, ami seidauk haree mudansa ida ke di'ak iha Maubere Oan ninia moris, Rui preokupa mak foti nia imajen hodi hetan votus iha eleisaun 2017, la hetan boy, la hetan boy.

Imi karik matenek husik Pai L7 halo manifestasaun ne'e, tun ba ko'alia ho Pai hodi hatene ninia preokupasaun, imi hanoin katak Pai bulak hodi halo violensia ka? Mak lae liu, Pai L hatene tau nia an, nia la hamrok ba poder hanesa imi, karik hamrok ba poder antaun tan sá nia la simu saida mak ita nia Maun Boot ida ofrese ba nia iha tinan 2013? Ne'ebé ema ke dehan katak Pai buka kadeira, sira bosok mak barak.

Rui Araujo ami la dun gosta ka iha respeitu ba ó, maibé ó bele karik troka ami balun ninia  hanoin karik ó fó autorizasaun ba ami nia Aman hala'o manifestasaun ne'e. Ó tauk mak saida loloos? Ó mak Primeiru-Ministro ka katuas sira nia TBO? Keta hamonu ami nia Aman, tanbá imi hamonu mós ita rai doben istória.

Rui Araujo ó ditador foun ida no ó sei monu hanesa has tasak.
.

Sem comentários:

Publicar um comentário

Nota: só um membro deste blogue pode publicar um comentário.