terça-feira, 2 de junho de 2015

Timor-Leste sente triste tanba lakon Lasama ne’ebé halo buat barak ba nasaun

,

Timor-Leste sente triste tanba lakon ona Fernando Lasama de Araújo ne’ebé sempre luta ba nasaun ne’e, liu-liu durante tepu difisil hodi luta kontra okupasaun indonézia, dehan eis-prezidente Parlamentu Nasionál, Lu- Olo ba Lusa. 

“Ami hotu sente triste, ema hothotu iha teritóriu ne’e sente laran-kraik”, dehan Lu-Olo ba Lusa, hafoin fó omenajen ba ministru Kordenadór ba Asuntu Sosiál no Edukasaun, Fernando Lasama de Araújo iha sala murtuáriu, hafoin ministru ne’e hakotu is ohin dader. 

“Lasama polítiku ida no fó kontribuisaun barak ba nasaun ne’e, maski mosu difikuldade no dezafiu bobot oioin. Nia funu na’in nomós lutadór ida. Ami hatene buat barak ne’ebé nia halo ba nasaun”, dehan. 

Bainhira ko’alia kona-ba Lasama de Araújo ninia papel iha organizasaun RENETIL, ne’ebé nia harii no sai hanesan sekretáriu jerál, Lu-Olo sauda ba kontributu ne’ebé nia fó ba Timor-Leste. 

“Iha momentu ne’ebé difisil hosi ami-ninia luta, nia sempre hatene insentiva ninia asaun, serbisu hamutuk ho ami hirak ne’ebé hamriik iha armada, no iha ai-laran”, dehan. 

“Ha’u hakarak hato’o ha’u-nia kondolénsia ba família enlutada señór Fernando Lasama. No sentidu pézame ba timor-oan hothotu. Presija atu hato’o ami-ninia solidariedade bot ba família matebian”, dehan. 

Lu-Olo hanesan membru Governu ida ne’ebé mós hamriik iha esteriór hosi sala murtuáriu ospitál Dili, hanesan fatin tau mate-isin hosi Lasama de Araújo nian. 

Governu halo reuniaun hosi Konsellu Ministru ho urjenta hodi determina saida maka sei halo hodi fó omenajen ba Lasama de Araújo ne’ebé asumi ona kargu públiku importante, inklui Prezidente Repúblika interinu no prezidente Parlamentu Nasionál. 

Bainhira reuniaun hala’o, hasa’e ona bandeira meia haste iha Palásiu Governu ninia oin. 

Tuir fonte parlamentár konferénsia líder nian, hala’o ohin dader, tanba tenke aprova votu pezar ne’ebé sei laee iha sesaun plenária molok suspende. 

Sei hala’o omenajen ba mate-isin iha sede RENETIL, organizasaun ne’ebé Lasama de Araújo ajuda harii no nia duni maka sai nu’udar sekretáriu jerál. 

Tuir fonte hosi gabinete Lasama de Araújo ba Lusa katak, mate-isin sei lori bá matebian ninia uma iha bairu Farol, Dili molok lori bá iha RENETIL, hodi omenajen dahuluk. 

Depois sei lori mate-isin bá iha Ministériu Edukasaun atu nune’e funsionáriu sira bele fó omenajen ikus, inklui bá iha Parlamentu Nasionál, molok hala’o serimonia espesiál. 

Fernando Lasama de Araújo mate ona ohin ho idade 53, iha ospitál Dili tanba kona “stroke”. 

Fundadór hosi organizasaun foun hosi rezisténsia timor-oan RENETIL no nu’udar kandidatu prezidensiál tinan 2007 nian, Lasama de Araújo ne’ebé ho tinann 53 asumi mós knar nu’udar Prezidente Repúblika interinu Timor-Leste nian iha 2008, hafoin mosu atentadu kontra José Ramos Horta. 

Sekretáriu jerál RENETIL hetan ka’er iha Timor-Leste, tinan 1991, no tama kadeia iha Cipinang durante tinan neen fulan haat, no prizaun refere inklui mós Xanana Gusmão. 

Hosi Mautasi, Ainaro, bainhira sei ho idade 12 nia sai nu’udar testamuña ba masakre ne’ebé militár indonézia halo ba família 18, tuir ninia biografia. 

Desde fulan fevereiru liu ba, bainhira sai mós hanesan membru ida hosi VI Governu Konstitusionál, Lasama asumi kargu hanesan ministru Estadu, Kordenadór ba Asuntu Sosiál nomós hanesan Ministru Edukasaun. 

SAPO TL ho Lusa 
.

Sem comentários:

Publicar um comentário

Nota: só um membro deste blogue pode publicar um comentário.