quinta-feira, 30 de julho de 2015

Investiga Xanana La Presiza Hasai Imunidade

.

Timor Post - 29 de julho de 2015

DILI—Judicial System Monitoring Program (JSMP) konsidera pedidu Ministériu Públiku (MP) nian ba Tribunál Distritu Dili  (TDD) atu hasa’é sertidão extraia para bele halo investigasaun ba Xanana Gusmão, ne’e normal i la presiza hasai imunidade.

“Se tuir MP mak dehan evidénsia too atu lori ba tribunál, mak antes hahú, tribunál sei notifika PN (Parlamentu Nasionál) hodi hasai membru governu ida nia imunidade antes hahú  prosesu ne'e,” esplika Diretór Ezekutivu JSMP, Luis de Oliveira Sampaio, ba Timor Post, Kuarta (29/07).

Katak, Sampaio subliña, se investigasuan de’it , bazeia ba esperiénsia ne’ebé iha katak la persiza levanta Xanana nia imunidade.

Pedidu MP atu halo investigasaun ba Eis Primeiru Ministru atual Ministru Planeamentu i Investimentu Estratéjiku, Xanana Gusmão, ne’e, bazeia ba deklarasaun Xanana iha loron 2 Jullu 2015 iha TDD katak, desizaun deporta drogadu sidadaun Indonézia nain lima (5) ba Jakarta, iha loron 26 fulan-Outubru 2012, tuku 13:00 liu-hosi Aeroportu Komoro, la’ós desizaun arguidu Calisto Gonzaga nu’udar eis Komandante Servisu Investigasaun Kriminál, maibé desizaun konsellu superior seguransa nian no bazeia akordu ho BNN-Indonézia.

Sampaio hatete, tuir prosesu normal lei prosesual ka Kodigu Prosesu Penal katak se iha indisius ruma katak krime ruma akontese, MP hanesan nain ba asaun penal hotu-hotu iha kompeténsia  tuir lei atu halo investigasuan ba Xanana.

Depois de investigasuan mak se hetan duni dadus sufisiente atu halo prosesu, MP sei formula rezultadu investigasuan ne'e hodi ba dokumentu ida hanaran akuzasaun. Maibé, nia hatutan, se la hetan evidénsia  sufesiente, normalmente MP sei arkiva.

“Arkiva ne'e iha forma rua. Arkiva parsial ka total. Parsial katak bele kole fali iha tempu ruma kuandu hetan evidénsia  foun ruma. arkiva total katak sei taka totalmente kazu ne'e,” subliña Sampaio.

Iha parte seluk, Sampaio hatete, nia parte apresiza tebes prezensa Xanana Gusmão  iha tribunál ne'e tanba nia kumpri notifikasaun tribunál atu sai sasin. Ida ne'e prosesu normal ida, tanba tuir lei ema hotu iha direitu atu hetan defeza ne’ebé  justu.

“Ne'e inklui direitu arguidu atu lori testemuña ka sasin ne’ebé  favorese ba nia interese defeza nian. Agora mos reasaun oioin ka kometáriu oioin ne'e tanba fígura katuas Xanana ho títlu ka previliju sosial nu'udar "Maun Boot" no fígura sentral durante prosesu luta ba ukun-rasik-a’an ne'e mak halo prosesu ne'e "heboh" tiha hanesan ne'e,” hatutan Sampaio.

“Nia (Xanana) kolaborasaun no vontade atu kumpri notifikasaun, ne'e buat ida ne’ebé  ba ami pozitivu teb-tebes. Buat ne'e dalaruma ita la hetan hosi lideransa sira seluk iha Timor no iha rai sira seluk ne’ebé  foin sai hosi postu konflitu, defisil atu hetan ema ida hanesan katuas Xanana bele ba iha tribunál,” dehan Sampaio. (oki)
.

Sem comentários:

Publicar um comentário

Nota: só um membro deste blogue pode publicar um comentário.