terça-feira, 7 de julho de 2015

Kazu Calisto Gonzaga testemunha de defeza, perguntas ho respostas, konsiderasoens atu analiza "matéria de akuzasaun" no "matéria de julgamentu"

.

Jornal Nacional Diário 

Husi: Kay Rala Xanana Gusmão - Eis Primeiru Ministru e Ministru Defeza Seguransa

1. Iha tinan 2012, ita assume kargu ruma iha instituisoens Estadu nian? Karik loos, nudar sa-ida?
- Iha tinan 2012, ha’u iha Governo, nudar Primeiro-Ministro V Governo Konstitusional, kaer mós pasta nudar Ministro de Defeza no Seguransa.

2.Iha dia 20 de Outubro, tinan 2012, akontese kazu ida kona-ba krime narkotráfiku, nebé envolve ema estranjeirus na’in 5, na’in 4 husi Indonésia no na’in 1 husi Áfrika do Sul. Ita nia Polísia kaer tiha sira. Núdar Primeiru Ministru no Ministru Defeza no Seguransa, bain-hira hatene kazu ida né, ita nia reasaun oinsá? Husu ba ita atu explika took mai.
- Ha’u husu lisensa, atu hahú nune’e:

Núdar Primeiro-Ministro, tuir Lei Orgânica Governo nian, desde IV Governo, Serviço Nacional de Inteligência iha ha’u-nia ókos, katak SNI responde ba ha’u; hanesan mós Serviços de Inteligência Policia nian no Serviços de Inteligência Militar halo relatório ba ha’u, liu husi instituisoens rua – PNTL no F-FDTL.

Estrutura ne’e bele hatudu ona katak, nudar Primeiro Ministro no kaer mós diretamente Defeza no Seguransa, ha’u assume responsabilidade tomak kona-ba Seguransa Nasaun nian no Povo nian.

Nuné duni, ha’u hakarak dehan katak kazu, nebé temi ne’e, ka ‘actu kaer ema na’in 5 né’, la mosu ‘de repente’, hodi ita bele konsidera atuasaun Polisia nian, hanesan ‘por acaso’ mak kaer. Maski Almério ho Faustino deklara katak sira insatisfeito, sira mós hateten katak ‘kaptura’ né tuir duni prosesu naruk. Ha’u tenki dehan, ha’u hatene no akompanha liu prosesu ida nebá, du ke ajentes na’in rua né.
.
Governo Timor-Leste, liu husi nia instituisoens, simu informasaun husi parte indonésia katak sira-nia ajentes ka polisiais, destakadus iha fronteira, prende, dala hirak ona, volumes kii-kiik ho narkotika, nebé sidadauns indonésios lori ba sorin. Sira mós husu ita-nia kooperasaun, tamba praga boot iha Indonesia maka narkótika.

Ho ida né, ha’u instrui ita-nia ajênsias atu buka hatene diak liu tan problema né, ho autoridades indonésias. Konkluzaun maka, husi perspectiva Rede Narkotráfiku Internasional, Timor-Leste sai tiha ona fatin trânzitu, seguru no livre, ba droga, hodi hatama ba Indonesia.

Husi troka de informasoens hirak né, maka ami estabelese mekanismus koordenasaun nebé permite atu, iha 20 de Outubro, bele kaer duni implikadus iha kazu nebé ita refere.

3.Se nuné, ita haré ema sira né?
- La’e. Ne’e, kestaun técnika operasional nian.

4.Karik ita haré objetus prendidus?
- Mós la’e. Razaun mak ohin ha’u fó sai tiha ona.

5.Maibé, ema sira né, tau iha Hotel Central, ho vijilânsia maka’as; ita hatene kona-ba ida ne’e? Bele fó tan explikasaun ruma mai?
- Ha’u maka autoriza, tuir responsabilidade nebé ha’u assume, hodi akompanha permanentemente operasaun né, nebé ha’u bele temi ‘delikada’ tebes, tamba primeira vez no, ikus mai, bele sai susesu boot, iha lós tempu nebé UNMIT atu husik ita-nia rain, hodi hatudu katak ita bele garante Seguransa Nasaun nian no Seguransa ba Povo.

Permite ha’u korrije deit liafuan ida – ita dehan ‘tau iha Hotel Central’. La iha ema ida tau sira iha Hotel Central; ha’u hakarak klarifika katak operasaun né la ós ‘acto kaer implikadus sira né’, tamba operasaun hahú kedas ho semanas antes, hodi identifika ema sira né, ema na’in hira no hatene sira hela iha nebé, liga ho sé ka hasoru sé.

Rede Narkotráfiku Internasional haruka pakotes husi Kolombia, dala ruma husi rai seluk, bele mai liu husi S. Paulo/Brasil, hakat ba Áfrika (iha Áfrika, iha dalan barak, husi nasoens oi-oin), bele liu fali husi India ou rai balun iha Medio Oriente, hafoin liu husi Singapura to’o Dili. Pakotes sira né, traficantes sira hatama iha avião, husi kargo, iha país de orijem ho kedas destino mai Dili. Iha ona ne’e, maka ema, husi Rede Internasional ho baze iha Indonésia, bá hein, atu foti deit. Karik liu, tamba la deteta, entaun ema sira né selu fali ema seluk atu lori tama ba Indonesia, hanesan bai-bain temi ‘kurir’, liu husi ita-nia fronteira terrestre, hanesan Batugadé.

Operasaun delikada, ha’u bele dehan sofistikada, tamba Rede Narkotráfiku Internasional mós hadi’a beibeik sira nia ‘modus operandi’ no ha’u bele dehan katak ajentes da PNTL, Almério no Faustino, kuandu koalia kona-ba ‘através de um longo processo’, sira na’in rua la hatene sa-ida maka, nudar Ministru de Defeza no Seguransa, ha’u hatene no akompanha.

6.Tuir ita nia kargu hanesan Primeiru Ministru no Ministru Defeza no Seguransa, ita rekoñese katak Timor-Leste Estadu soberanu ida ho ninia Tribunal no ho leis rasik! Se nune’e, tan-sá ita fó importânsia ba BNN ka Ajênsia Narkótika Indonesia nian?
Timor-Leste la ós nasaun ida nebé bele moris mesak iha mundu, hodi taka-an ba liur. Konvensoens Internasionais ka Tratados de Kooperasaun ka Akordus ka Memorandus de Entendimentu nebé RDTL, liu husi ninia instituisoens, assina ho Rai seluk maka loke dalan ba implementa mekanismus de kooperasaun ho Rai sira né, iha áreas oi-oin deit.

Ida ne’e, prátika internasional. Ne’e tenki mai husi nível polítiku, nebé simu knar tuir ita-nia Konstituisaun da Repúblika. Reprezentantes Povu nian iha Parlamentu, maka halo lei; maibé, Governo lejítimu maka toma desizoens kona-ba akordus ka kona-ba kooperasaun sira né.

Ita-nia Konstituisaun preskreve, katak hakerek iha nebá, kona-ba órgauns nebé haré ba kestoens de interesse nasional, hanesan Konselhu de Estadu no Konselhu Superior de Defeza no Seguransa.

Nudar sei Primeiru Ministru, ha’u semana-semana presta kontas ba Presidente da Repúblika; nune’e, ha’u informa kazu ne’e ba Presidente da Repúblika, hodi konvoka Konselhu Superior de Defeza no Seguransa, iha tempu nebá. Iha Reuniaun né, Presidente do Parlamento Nasional, Sr. Vicente Guterres, fó sai ninia dezakordu (katak, la konkorda) ho desizaun nebé Governu foti, ho razaun rua:
 ida – RDTL, Estado soberanu, iha Tribunal ho leis próprias; rua – Prezidente Parlamentu ninia preokupasaun maka sira na’in 5 bele hetan ‘pena de morte’, ao pasu ke ita la iha ‘pena de morte’.

Kona-ba 1ª. kestaun, ha’u rasik dehan ba Konselhu Superior de Defeza e Seguransa katak ita la iha ‘leis próprias’ kona-ba droga, tamba né ita-nia Tribunal, bain-hira iha kazu ruma, tenki recorre ba lei subsidiária indonésia, hanesan ‘undang-undang nomor 35/2009’, tentang narkotika dan psikotropika’; né duni ita labele temi ‘ita iha ona leis próprias’. Tribunal Distrital Dili temi lei indonésia no. 22/1997.
.
Kona-ba segunda kestaun nebé pertinente duni, depois de esplika didiak kona-ba nesesidade de kooperasaun entre Estadus rua né, hodi fó mensajem ba Rede Narkotráfiku internasional, ho baze iha Indonésia, katak lalika uza Timor-Leste hanesan fatin tranzitu ba droga, hodi buka daudauk hasai Timor-Leste husi lista paízes nebé, indiretamente ou negligentemente, kolabora ho trafiku drogas nian.

Ho esplikasoens sira né hotu, Prezidente Parlamento, Sr. Vicente Guterres, aseita desizaun Governo nian.

Ora bem, kona-ba ‘fo importansia ba BNN’, ita iha servisu diak ho BNN no BIN. Ita presiza sira, hanesan sira presiza ita-nia kolaborasaun. Ne’e maka ita bolu mundu globalizadu. Tan né mós, maka ita iha reprezentasaun INTERPOL iha ita-nia Polísia. Ita iha kooperasaun diak entre SNI ho FBI. Ita atu tama ASEAN no ita sei haré ba ita-nia direitos karik, mas liuliu kona-ba ita-nia deveres ka kontribuisaun, iha área Seguransa iha ASEAN.

Maibé, atu responde ba pergunta, ha’u só bele dehan katak, ita mesak la konsegue deteta Rede Narkotráfiku Internasional. Ohin loron, iha área intelijênsia no seguransa, Rai hotu-hotu depende ba malu ho espíritu ida katak, tenki kontribui pozitivamente ba relasoens de kooperasaun, nebé hala’o hela karik, hodi fó konfiansa ba malu ka hodi hamosu konfiansa mútua. Iha rai ida-idak, ajênsias sira buka defende interesses nia Rain nian, tamba né mak husu tulun ka partisipasaun ka kooperasaun husi rai seluk. Liu-liu entre países vizinhus, hanesan Timor-Leste, kiik-oan tebes, ho Indonésia, nebé luan ho boot tebe-tebes.

BNN dehan ba ami katak sira tuir hela rede ida ne’e, liuliu sidadaun indonésiu ida hanesan elemento prinsipal ba rede internasional né, ho estatuto fujitivu (ka ‘buronan’), hanesan mós ida fali husi África do Sul. Keta haluha, Africa do Sul dalan ida ba trânzito droga.

Kazu ida ne’e, nebé bolu ha’u mai depõe, pertense ba kategoria ‘krimes transnasionais’. Katak, droga-nia destinu la ós Timor, maibé Indonesia; Timor-Leste sai deit ponte, ka odamatan ida, atu hakat, ka lori liu, ba Indonesia, iha nebé konsumu maka’as tebes no trafikantes, iha Indonésia, maka manán ‘triliunan rupiah’.

Ministério Públiku, iha nia akuzasaun, ko’alia kona-ba ‘actos kriminais kometidus no território de Timor-Leste’.

Artigo 7º. Código Penal ko’alia kona-ba ‘principio da territorialidade’, katak, ‘factos praticadus iha território de Timor-Leste hetan aplikasaun husi lei timorense’. Artigo 7º. ne’e mós temi ‘salvo tratado ou convenções internacionais’, nebé bele fó dalan atu interpreta ho laran luak ka espírito aberto, tamba la ós ‘denegação da justiça’ ka hasés-an ou hasés ema husi justisa.

Ita-nia Código Penal hetan aprovasaun husi Conselho de Ministros, iha 18 de Março de 2009. Situasaun nebé akontese iha 2012, kona-ba krimes transnasionais, mak sai duni ona problema mundial boot, iha tempo nebá karik, ha’u fiar metin ha’u-nia Governo, iha tempo nebá kedas, bele konsidera ona tau tan liafuan ruma, iha artigo ‘principio da territorialidade’, kona-ba assunto né.

Maibé, iha fali artigo 6º., kona-ba ‘lugar da prática do facto’ dehan nuné: ‘o facto considera-se praticado no lugar em que, por qualquer forma, ocorreu a acção ou omissão, no todo ou em parte, bem como onde se produziu ou deveria produzir o resultado típico’. Tradusaun ba tétum, iha Código Penal, ladún klaru, né duni ha’u toma liberdade atu fó tradusaun ida ne’e: ‘konsidera katak fatu ida hala’o (pratikadu) iha fatin iha nebé, factu né akontese ou hetan omissão, tomak ou sorin deit, nuné mós fatin nebé produz ona rezultado ruma ou bele, ka sei, produz rezultado nebé espesífiku ba actu né’.

Espesífiku, iha né, katak rezultadu nebé mosu husi krime ida né duni – katak, sira fa’an tiha ona, sidadauns indonésius barak hola no sai adictos ba droga.

Ha’u la ós jurista, ha’u ‘lulusan SMA’ deit, maibé haré ba artigos rua né, karik ha’u bele, ha’u sei interpreta artigo 6º. hanesan tuir mai né, ba kazu krime narkotráfiku, nudar ‘krime transnasional’:
Actu… (prende ema)… actu né okorre ka akontese iha Timor-Leste – lós!

Artigo né temi ‘acção ou omissão’ – omissão bele konsidera katak seidauk lori ba Indonesia no seidauk fa’an ba ema, tamba artigo dehan ‘ou omissão, de qualquer forma’, hodi ita haré katak, ba krime narkotráfiku, tuir sira nia missaun ka papel iha krime transnasional né, implikadus la konsegue realiza missaun né.

Ho mós hanoin katak sira la ós konsumidor maibé ‘ajentes da rede internasional’ atu lori ba ‘distribuidores’ iha Indonesia. Ko’alia kona-ba prosesu, hanesan ‘krime transnasional’, artigo 6º. mós dehan ‘no todo ou em parte’ – ‘no todo’, karik sira kompleta sira nia missaun lori ba Indonésia; acto kaer sira iha Dili, hapára deit sorin, ka ‘parte’, iha sira-nia krime de narkotrafiku, ho ninia ‘todo’ né, maka substânsia ba ‘rede internasional de narkotráfiku’.

Artigu 6º. mós dehan ho klareza: ‘nuné mós, tenki konsidera fatin nebé hatudu tiha ona rezultadu ou sei produz rezultadu espesífiku’ ba actu/krime né (narkotráfiku). Se nuné, fatin kona-ba rezultadu husi aktu/krime narkotráfiku, fatin ne’e maka Indonésia, la ós Timor-Leste.

Nuné maka, tuir ha’u-nia opiniaun, Ministériu Públiku la iha razaun atu dehan: ‘o arguido sabia que os suspeitos tinham cometido fatos susceptíveis de integrar crime de tráfico de droga e impediu que fossem criminalmente perseguidos em território nacional’.

Né katak Calisto impede tiha Ministério Público atu halo akuzasaun ba sira.

Karik, sira hatama droga atu fa’an iha território nasional, ha’u konkorda ho hanoin ida ne’e! Mas, la ós… tamba droga ne’e atu lori ba Indonesia.

Ministériu Públiku dehan mós nuné: “a konduta (katak ‘entrega ba autoridades indonesias’ – atensaun: la ós lori sira ba halai tiha), a conduta punha em causa o próprio Estado de Direito’.
Ha’u hetan explikasaun kona-ba ‘põe em causa o Estado de Direito’, iha páginas 17 hodi bá páginas 18, iha nebé Acórdão Tribunal Distrital Dili hakerek nuné:

‘As exigências de prevenção geral, que são elevadíssimas, perante o crescente número de crimes que atentam contra o Estado de Direito, realização da justiça e contra a liberdade pessoal, sendo premente a necessidade de prevenir a disseminação de crimes desta natureza, impondo-se aos tribunais a adoção de medidas punitivas suficientemente dissuasoras de situações semelhantes à dos presente autos, tendo presente que tais crimes minam os alicerces do Estado e põem em causa a separação de poderes e geram hoje profunda repulsa social e aumentam o receio de convivência social’.

Ho tétum: ‘Ezijensias atu halo prevensaun jeral ida, ezijensias nebé boot tebe-tebes tamba número krimes kontra ita nia Estadu de Direitu sa’e maka’as, kontra Ministério Públiku no Tribunais sira bele hala’o justisa no kontra liberdade ema-nian, hodi iha nesesidade urgente tebes atu previne katak krimes sira hanesan ne’e aumenta-tan ba beibeik, Tribunais sira tenki adopta duni medidas atu pune, medidas nebé tenki maka’as hodi halakon tiha situsoens hanesan ida nebé kaer hela/kazu Calisto nian, ho hanoin katak krimes sira hanesan né estraga Estado, no la hatúr didiak separasaun de poderes, no krimes sira né, ohin loron, kria daudauk ‘profunda repulsa social’ (katak, kria daudauk sentimentu hakribi nebé klean husi ita-nia sosiedade) no krimes sira né mós aumenta ema tauk atu hala’o konvivensia social (katak, ema la sai ona husi uma no tauk hasoru malu).

Ha’u lê tiha né, ha’u nia reacção hó lian português, maka: ‘Afinal, a situação em Timor-Leste é estarrecedora!’ Ho tétum, katak ‘situasaun iha ita-nia Rain dramátika tebes’; inglês karik, dehan ‘scaring’.

Para além de buat sira hanesan ne’e, Ministério Publiku akrescenta nuné: ‘e causava prejuízos aos suspeitos a quem não foram conferidos os direitos legais a que tinham direito’. Katak, sira na’in 5 la konsegue defende-an, tuir direitos legais nebé sira hetan, tuir ita nia Constituição. Iha leten, ha’u hatudu ona katak Ministério Públiko dehan ‘fossem criminalmente perseguidos’, maibé ita bele haré tan katak koalia kona-ba ‘prejuizo aos suspeitos a quem não foram conferidos os direitos legais a que tinham direito.’ Nuné mós, iha Relatório Tribunal Distrital Dili, iha página 4, ponto 17, hakerek hanesan ne’e: ‘… fó prejuízo ba suspeitos sira, tamba nega tiha sira-nia direitos legais atu defende-an’.

La hatene lós, se Ministério Públiku hakarak ‘garante sira na’in 5 nia direito’ ka… hakarak ‘atu persegue kriminalmente’ suspeitos sira né.

. Tan ne’e, ha’u hato’o informasaun katak ema na’in 5, nebé ita kaer no entrega ba autoridades indonésias, sira hetan duni prosesu julgamentu iha nebá, ho ‘pena perpétua’.

(Ha’u husu deskulpa ba Ita Boot sira hotu, kona-ba ha’u-nia atrevimentu atu interpreta lei, iha fatin ida ne’e. Tamba ha’u lembra fali kazu senhora timoroan ida, Idalina Maria da Costa Freitas,nebé ba tuir formasaun iha Portugal durante prosesu julgamentu, bain-hira nia fila mai ita-nia Rain, nem hetan oportunidade atu uza ‘os direitos legais a que tinha direito’, tuir Ministério Público nia preokupasaun ba estranjeirus na’in lima, no feto timoroan né tama ‘langsung’ ba kadeia iha Gleno.)

Fila fali ba asuntu, ha’u repete katak, ho mekanismus kooperasaun sira né, maka permite ita kaer nafatin ema, bain-hira sira halo parte ba narkotráfiku ba Indonesia.

Maibé, ha’u hakarak reforsa deit katak ita hotu akompanha problema konsumu droga iha Indonésia, ho kazu ‘pena de morte’ nebé aplika iha nebá. Presidente Jokowi dehan katak, iha Indonésia, iha mais de 15 milhoens de indonesios maka dependentes ba estupefasientes.

Sá-ida maka ha’u rona, katak Governos Rai oi-oin, hanesan Austrália, Brasil, maka protesta kontra polítika Governu indonésio nian, la ós Tribunais no Ministério Público husi Rai sira né.

Timor-Leste iha dever boot atu kontribui, ‘de qualquer forma’, liu husi hamate tiha possibilidades atu uza ita-nia Rain hanesan trânzitu de droga ba Indonesia.

Ne’e mós, atu hatán ba akuzasaun husi Ministério Públiku kona-ba ‘crime de abuso de poder’ ba Calisto. Iha artigo 297º. Código Penal dehan nuné: ‘o funcionário que abusar de poderes ou violar deveres inerentes às suas funções, com intenção de obter para si ou para terceiro, benefício ilegítimo ou causar prejuízo a outra pessoa…’

Ho tétum, katak ‘abuza poder ka viola ni-nia dever nebé nia simu (agora, importante tebe-tebes) ho intensaun atu hetan benefísiu ba nia an-rasik ou benefísiu ba ema seluk ida…. ou … atu prejudika ema seluk…

Ministériu Públiku tenki hatudu benefísiu nebé, karik Calisto simu né, iha sá-ida – osan ka uma ka kareta… ou… kaer nafatin Código Penal, Ministério Públiku tenki prova katak Calisto ‘prejudika ema seluk’ – prejuízo né iha sá-ida no ‘ema seluk’ né sé lós, maka prejudikadu.

Maibé, bain-hira lê didiak Acórdão Tribunal Distrital Dili, ha’u tenta compreende liafuan ‘prejudika’ ka ‘prejuízo’. Iha páginas 6, hakerek nuné, hanesan matéria de akuzasaun: ‘os referidos cidadãos (ema na’in 5 né) foram detidos e impedidos de circular livremente…’ Afinal, prejudika ka prejuízu né, iha Calisto impede sira atu sirkula livremente… ‘Masuk akal’ – sira mak sirkula livremente karik, sira bele aproveita fa’an daudauk ona droga ba timoroan sira – Calisto ba impede fali, hasoru sira nia direitu atu komete krime!

Iha kazu Feto timoroan nebé iha Gleno, karik bele aplika artigo 297º. né, iha ‘prejudicou outra pessoa’ e ‘causou prejuízo à suspeita a quem não foram conferidos os direitos legais a que ela tinha direito’. Ita-nia sistema judisial, ho ona Ministério Públiku, Tribunais no leis próprias ho tan normas no prosedimentus nebé sofistikadus, afinal prejudika duni feto timoroan né, tamba la garante direito legal ba nia atu uza nia direito… atu hato’o ninia defeza. Ministério Públiko hatudu katak preokupa liu fali ho ema estranjeirus na’in 5, tamba sira prejudikados husi Calisto… atu uza sira nia direitos atu defende-an, iha Tribunal Timor-Leste.

Ha’u núdar testemunha de defeza, no possivelmente verdadeiro arguido, ha’u tenki alerta ba buat né hotu – lae, ita temi hela artigus Código Penal nian, Código Processo Penal hodi hakerek Acórdãos mesak boboot ho lian português, só para temi deit ou atu buka aumenta pena iha akuzasaun no sentensa!

7.Ne’e katak, bain-hira entrega arguidus né ba Indonésia, tamba iha tiha ona MOU entre paízes rua né?
- Sim. Ha’u mak deside kona-ba entrega né, tamba sira ‘buronan’ iha indonésia no mós, ba ita, primeira operasaun de envergadura, hanesan né. La ós Calisto maka uza nia osan rasik atu bá, maibé Governu maka selu bilhetes ho despesas hotu atu bá no fila mai Timor-Leste.

Ha’u sei lembra mós katak, liu tiha fulan hira, ha’u iha aeroporto, maka hatene katak iha tan kazu foun ida; Ha’u tama ba haré, senhora indonésia ida maka prende hela ho droga; tamba nia simples ‘kurir’, ami la haruka ba Indonésia, nuné nia prosesa iha né, hanesan kazu selu-seluk.

Ha’u fó hanoin deit katak, prosesu akuzasaun ba Calisto hahú, se la sala, iha 2013. Suspeitus ka implikadus sira nebé ha’u temi, katak depois de kaptura, ami entrega ba justisa iha Timor-Leste, la ós depois de akuzasaun ba Calisto, hodi bele dehan fali katak, ami entrega ba justisa iha território nasional, tamba ami hakfodak no tauk ona, no buka salva-an.

Né katak, Tribunal, iha pájina 17, embora hakerek liafuan sira ne’e iha nia Acórdao, seidauk hatudu katak hatene ‘avalia todas as circunstâncias que, não fazendo parte do tipo nem tendo sido valoradas para efeitos de medida abstracta, agravem ou diminuam a responsabilidade do condenado’.

Ho tétum – Tribunal hakerek nuné iha nia Acórdão: Tribunal ‘halo avaliasaun ba sirkunstansias (ka factores, ka dadus ka elementus) hotu-hotu nebé, mesmuke la halo parte ba krime né no karik seidauk hetan apresiasaun nebé diak atu haré ba medida nebé sei abstracta, bele agrava ka bele diminui responsabilidade husi kondenado’. Maibé, maski hakerek furak hanesan né, Tribunal hatudu seidauk konsegue halo avaliasaun ba sirkunstansias hotu-hotu.

8.Nudar Primeiru Ministru no Ministru Defeza no Seguransa, ita la hanoin katak ita iha liu responsabilidade atu hatene katak prosedimentu nebé halo né keta la tuir lei ho normas iha ita nia Estadu RDTL?
- Permite ha’u foti kazus balun atu hatudu oin-sá ha’u assume ha’u-nia responsabilidade. Ita temi ‘prosedimentus’, ‘normas’, ‘lei’, nebé ita tenki tuir. Lós hotu… no tebes duni!

Enkuantu Ministériu Públiku ho Tribunais lida ho leis, Governo lida ho Relasoens Internasionais, lida ho Paz no Estabilidade, lida ho Seguransa Nasaun no Povu nian.

Enkuantu Ministeriu Publiku ho Tribunais buka interpreta lei hodi julga, Governu tenki lori diplomasia, kooperasaun no hatúr mekanismus hodi bele evita friksoens entre Estados ou atu hatúr ita-nia interese nasional.

Ha’u temi kazu Maternus Bere, nebé hotu-hotu sei lembra, iha 28 Novembro 2009. Hatama Maternus Bere iha prizaun Bekora, mak ita-nia Estadu defende nia soberania, ka Relasoens diak ho Indonesia mak fo kbit ba ita atu hametin ita-nia soberania? Ne’e, Governu mak tenki responde no ha’u, iha tempo nebá nudar Primeiro-Ministro, ha’u buka solusaun hodi fó resposta nebé apropriada.

Congressitas amerikanas rua, nebé mai partisipa iha selebrasoens, bá kedas hasoru ha’u, iha ona dadér seluk, iha nebé sira lamenta kona-ba desizaun Governu nian, hodi temi katak, ba Estados Unidos da América, la admite impunidade ba krimes kontra humanidade.

Ha’u rona tiha sira, ha’u propoen ba senhora na’in rua né, atu ami na’in 3 assina akordu ida, ho pontus rua: primeiro ponto – ha’u maka ba Jakarta prende generais indonésios no lori sira ba Tribunal Internasional; iha segundo ponto – sira na’in 2 tenki buka, iha Estados Unidos, sé maka fa’an avioens funu ba TNI no treina ‘kopassus’ sira, hodi oho povo timoroan iha funu laran, no mós sira na’in rua tenki hale’u Europa, husi Inglaterra, França no Alemanha, atu kaer ema sira hotu, nebé fa’an ro-ahi funu, tanques de guerra no kilat/kilat musan ba TNI atu mai oho mohu povu maubere.

Ha’u dehan ba sira, katak sira na’in 2 kaer tiha responsáveis sira né, ami na’in tolu sei hasoru malu iha Tribunal Internasional. Congressistas na’in rua hakru’uk, hodi lolo deit sira-nia liman, dehan sira atu fila ona. Iha mundu, ita bele haré, loro-loron, polítikas hipókritas husi nasoens hipókritas.

Iha tan kazu ida, nebé ita tenki agradese Autoridades indonésias ba sira-nia espírito de boa vizinhansa, buat ida nebé la akontese iha Rai barak iha Áfrika no mos iha Ásia. Ita hotu sei lembra krize politiku-militar, nebé hahú husi 2006 to’o 2008. Sei núdar Presidente da República iha tempo nebá, iha prinsípius 2007, ha’u bá hasoru Presidente indonésio Susilo Bambang Yudhoyono atu klarifika situasaun interna iha ita-nia rai laran. Presidente SBY fó sai ba ha’u, katak sira lakohi ita-nia rain atu rahun no sira sei koopera, iha sá-ida deit ita presiza, atu estabiliza tiha situasaun.

Ita-nia ema na’in 4, husi grupo Alfredo, nebé ita temi ‘rebeldes’, halai tiha ba Indonesia. Liu husi kooperasaun nebé diak, autoridades indonésias kaer sira na’in hat, aluga rasik aviaun ida hodi lori mai entrega ba ita, iha Dili, iha 5 de Maio de 2008.

Iha mós kazu resente ida, ho estranjeira ida nebé ita kaer tamba envolvida iha drogas. Autoridades husi ema né nia rain, liu husi sira-nia embaixada iha Dili, husu ita-nia kooperasaun. Ita entrega ema né ho prosesu tomak atu hetan julgamentu iha nia Rain. No ita la iha akordu ho Estados Unidos da América.

Semana rua kotuk ba, iha hela reuniaun Conselho de Ministros, ami simu informação katak polísia indonésia kaer ‘feto Timor ida’ ho 15 kgs de ‘sabu-sabu’. Ami husu lisensa ba Primeiro-Ministro atu sai, hodi activa kedas mekanismus atu extradita nia mai Timor-Leste, tamba iha kooperasaun nebé kapaz ho autoridades indonésias. Ami husu ba autoridades indonésias, atu haruka nia mai, ho nia prosesu tomak, mas antes de prosesu né tama ba Kejaksaan ka Ministériu Públiku indonésio. 

Kontatus nebé ami halo, iha deit objetivu ida: salva nia husi ‘pena perpétua’ ou ‘pena de morte’.
Karik, Timor-oan duni, kuandu to’o iha Dili, ami sei entrega ba Ministeriu Publiku atu hala’o prosesu. Maibé, ikus mai sira informa katak, embora nia naran hanesan Timor nia naran – Francisca Pinto, nia la ós cidadã Timor.

Né atu hatudu deit katak, tamba Governo mak iha kompetênsia atu lida ho problemas sira hanesan né, hodi mós defende Timor-Leste nia sidadauns, ami hatene prosedimentus nebé tenki hala’o, tuir ona sirkunstansias nebé mosu iha tempo konkretu.

9.Iha tinan kotuk, Tribunal Distrital Dili hasai desizaun hodi kondena Calisto Gonzaga ho tinan 9 iha kadeia. Ita nia reasaun, hatudu katak ita kontra lós desizaun Tribunal; bele esplika tan-sá reasaun né mosu husi ita, hasoru desizaun Tribunal?
- Ho respeito tomak ba timoroan matenek sira nebé kaer lei, nudar juízes, iha Tribunais, respeito nebé extensivu ba timoroan matenek na’in sira nebé defende lei, nudar prokuradores iha Ministeriu Publiku, reasaun nebé ha’u hasai keta la monu ba ida-idak nia laran, maibé ha’u labele duni simu sentensa né.

No ha’u agradese ba Maromak no ba Rai Lulik, no mós ba actores judisiais sira tomak, bele fo oportunidade mai ha’u atu mai hatán iha Tribunal, iha loron kmanek ida ne’e.

Ha’u expressa duni ha’u-nia insatisfasaun, tamba ha’u la konkorda liu ho sentensa nebé Calisto hetan, husi fundamentasaun ba akuzasaun: konkurso real de 1 krime de ‘não partisipasaun’ e 5 crimes de ‘sequestro’ e crime de ‘abuso de poder’. Só falta deit crime de traição à Pátria, tamba nega RDTL nudar Estado de Direito.

Tuir Organika Governu nian, hanesan ohin ko’alia ona, ha’u iha knar iha área Seguransa, nebé inklui PNTL. Ho esplikasaun nebé ha’u hato’o ona, katak ha’u akompanha prosesu tomak, ka operasaun, desde inísiu, ka nia hahú, to’o implikadus sira hela loron hirak iha Hotel, la sai, no kontrolo ba sira-nia telefone… to’o extradita sira, ka lori ba entrega iha indonésia.

Ha’u fó instrusaun no PNTL haktuir ka kumpre.

Polícia, tuir nia Estatuto Orgânico, iha natureza militar. Ba ajente polísia ida, instrusaun katak ordem.
Código Penal, iha nia artigo 30º. no. 1, dehan nuné: ‘sei konsidera autor ema nebé ezekuta rasik faktu…’, bain-hira hakarak haré ba Calisto nia hahalok. Maibé, ha’u hanoin katak interpretasaun ne’e halai ba actu de krime bai-bain ka komum, nudar actu individual ida. Né katak, Estadu, liu husi Governo, la envolve-an iha desizaun.

Calisto simu ordem atu ezekuta. Ha’u temi natureza militar iha PNTL, tamba militar ka polísia labele diskute ordem. Simu, tenki kumpre. Se la kumpre, nia tenki sai husi Forsas ka husi Polisia tamba dezobediênsia, no, ida né, grave liu do ke indisciplina.

Interpretasaun ba krimes bai-bain ka komum, iha no. 1 artigo 30º. Codigo Penal, dehan ho klaru: ‘actor, ema ida nebé pratika factu né… ou… actor, ema ida nebé uza ema seluk atu ezekuta faktu né’.
Tan ne’e, ha’u husu ba Ministériu Públiku ho Tribunal no actores judisiarius, nebé ha’u hakru’uk ba, atu hasai Calisto nudar arguido, no Ministério Público tenki selu indemnizasaun ba Calisto, hahú husi nia suspensaun, tamba kazu ida ne’e!

Actor ba krime nebé Ministériu Públiku no Tribunal buka, hodi akuza fali Calisto, actor né mak ha’u, Kay Rala Xanana Gusmão, ba-sá ha’u maka fó ordem, atu Comando PNTL hatún hodi Calisto ezekuta. Tan ne’e, ha’u labele permite ema ida nebé ezekuta ha’u-nia ordem tama fali kadeia inosentemente.

Ha’u dehan inosentemente tamba, iha página 6 husi Relatório Tribunal Distrital Dili temi hanesan ne’e: ‘segundo o arguido… (ele) limitou-se a cumprir ordens superiores, nomeadamente do Comandante-Geral, Longuinhos Monteiro, e do Sr. Primeiro-Ministro de Timor-Leste, confirmando as declarações que prestou em inquérito a fls. 188 a 190’. Traduz ba tétum, katak: ‘tuir arguido, Calisto, nia kumpri deit ordens superiores, husi Cmdt-Geral, Longuinhos Monteiro, no Primeiro-Ministro de Timor-Leste, hodi konfirma deklarasoens nebé nia presta iha folhas 188 to’o 190.’

Iha página ida ne’e duni, iha okos to’o hahú página 7, hakerek hanesan ne’e: ‘… Relatório Especial, onde se destaca a causa de não ter o processo sido encaminhado para o Ministério Público e que decorreu da ordem verbal do Comandante-Geral da PNTL, Longuinhos Monteiro, e com base no MOU com a Indonésia e com conhecimento do Sr. Primeiro-Ministro e ainda ter sido cancelado o processo de inquérito por ordem superior…’

Ba tétum, hanesan ne’e: ‘… relatóriu espesial, iha nebé destaka (ka fo sai lolós) tan-sá maka la haruka prosesu né ba Ministeriu Publiku, tan deit ordem verbal husi Cmdt-Geral PNTL, Longuinhos Monteiro, ho baze ba MOU ho Indonesia, no iha konhesimentu husi Primeiro-Ministro, nuné mos kansela tiha prosesu inkeritu tanba ordem superior…’

Maibé, ita bele haré katak, Ministério Público hanesan mós Tribunal Distrital Dili, la konsidera ‘deklarasoens’ Calisto nian, katak nia ‘kumpre deit ordens superiores’ e kondena Calisto ba tinan 9, hodi prejudika direito Calisto nian, mesmu-ke nia fó tiha ona explikasaun nebé lolós kona-ba matéria de akuzasaun.

Iha Acórdão husi Tribunal Distrital de Dili, iha páginas 19, hakerek tan hanesan ne’e: ‘…o arguido…. procurando salvaguardar-se no cumprimento de ordens (diga-se ilegais)…’ Tetum: katak arguido buka defende-an, hodi dehan katak nia kumpri deit ordens – Tribunal hakerek tan: ‘ordens né ilegais’!

Se Tribunal haré ona ba sirkunstansias nebé envolve actuasaun Calisto nian, hodi temi tan katak ‘ordens né ilegais’, tan-sá kondena fali Calisto!!!

Ha’u husu lisensa atu fó hanoin tan kona-ba tuir mai né:

Ha’u tenki kontinua, tamba iha ‘akuzasaun’ kona-ba ‘5 crimes de sequestro’, husi Tribunal.
Artigo 160º. Código Penal hakerek nuné: ‘quem, fora dos casos previstos na lei processual penal, detiver, prender, mantiver presa outra pessoa, ou de qualquer outra forma a privar de liberdade…’
Né katak, Código Penal fó hatene, ‘sé deit maka detém, prende ka dadur ema seluk, ou, ho forma seluk, hasai tiha ema né nia liberdade’… né maka, lei hanaran ‘sequestro’. Maibé mós Codigo Penal dehan katak, ‘sequestro’ né la aplika ba ‘kazus previstus iha lei prosesual penal’.

Tamba ko’alia ‘lei processual penal’, ha’u loke Código do Processo Penal, ha’u haré artigos 218º. – ‘detenção em flagrante delito’, no artigo 219º. – ‘flagrante delito’.

Artigo 218º., iha número 1 – ‘em caso de flagrante delito, por crime punível com prisão, qualquer autoridade policial deve proceder à detenção’. Número 2 – ‘se nenhuma autoridade policial puder efectuar a detenção, qualquer pessoa que presencie o flagrante delito a poderá realizar’.

Né katak, iha númeru 1 – ‘bain-hira iha flagrante delito (ka ‘ditangkap basa’), no krime né bele hetan cadeia, autoridade policial sé deit iha dever atu detém ka kaer’. Número 2 – ‘karik la iha autoridade polisial ida atu hala’o detensaun né, kualker pessoa nebé haré flagrante delito né bele hala’o detensaun.’

Artigo 219º., kona-ba ‘flagrante delito’, iha no. 1 – ‘é flagrante delito todo o crime que se está cometendo ou se acabou de cometer’. Iha no. 2 – ‘reputa-se também flagrante delito o caso em que, logo após o crime, o agente é perseguido por qualquer pessoa ou encontrado com objectos ou sinais que mostrem que acabou de o cometer ou nele participar’.

Ne katak, número 1 – ‘flagrante delito maka krime hotu-hotu nebé komete hela ou foin komete’; númeru 2 – ‘hanesan mós flagrante delito iha kazu nebé, tuir quedas krime, ema kualker ida persegue, ka kaer ho sasán, ka sinais katak nia comete ou nia partisipa’.

Tan né, no haré ba kazu narkotráfiku 20 de Outubro 2012 nian, lolós Tribunal kaer artigo 217º. – ‘finalidades da detenção’ ho artigo 222º. – ‘comunicação da detenção’. La ós fali artigo 160º. Código Penal nian kona-ba ‘sequestro’, buat ida ke la iha sentido liu, tamba haluha katak Calisto agente polisial ida, Comandante dos Serviços de Investigação Criminal .

Apesar de deklarasoens sira né hetan rejisto iha prosesu, Ministério Público hakerek hanesan né: ‘O arguido agiu sempre livre, deliberada e conscientemente, sabendo que as suas condutas eram proibidas e punidas por lei’. Contraditório tebe-tebes, hodi hatudu Ministério Público nia rasiosínio lójiku, ladún ‘sempurna’ karik!

Liafuan hanesan ‘livremente’, ‘deliberadamente’ no ‘conscientemente’ la iha sentido liu, ho deklarasoens nebé halo parte iha prosesu de akuzasaun, iha folhas 188 ba 190. Ho ida ne’e, husi Ministério Público maka ‘livre, deliberada e conscientemente’ actua atu ‘causa prejuízo’ ba suspeito Calisto, ho demonstrasaun klara de ‘abuso do poder’, inerente ba funsoens de magistratura públika.
Ohin, ha’u hahú dehan ha’u la konkorda ho sentensa no agradese tebes tempu nebé fo mai ha’u atu esplika tan-sá ha’u la konkorda.

Karik Prokuradoria no Tribunal haré katak kazu ida ne’e ‘krime komum’ ida, favor bele loke prosesu foun, mas la ós ba Calisto.

Ha’u husu deit atu, iha prosesu foun né, bele buka estrutura didiak matéria de akuzasaun, buat ida ke falha iha prosesus barak nebé hetan ona sentensa ka hein hela julgamento; prosesu ida tenki hatudu estrutura nebé aprezenta lójika oitoan kona-ba interpretasaun leis, hodi haré mós ba sirkunstânsias hotu-hotu nebé bele sai nudar elementus importantes atu hetan ideia klara liu ba objectu akuzasaun ne’e rasik, nebé mós bele ajuda tetu sentensa.

Só nuné, mak povo bele sinti katak ita hotu tuir normas prosedimentais ho diak, hodi garante justisa nebé lós. Lae, povu bele lakon tiha konfiansa ba justisa.

Iha tendênsia boot atu interpreta lei, tuir deit liafuan nebé hakerek, ho lian português, iha artigus oi-oin deit, husi Código Penal, maibé la tau em konta aspetus seluk nebé, tenki ou podia konsidera mós… liuliu, iha ita-nia faze agora konstrusaun Estadu nian, nebé foin ho 13 anos. Estados barak, ho sentenas de anos ona (ka ho tinan atus-ba-atus ona) mós, seidauk hamenus krime, sira rasik sei komete injustisa oi-oin, sira rasik hatudu sira mós la iha transparênsia, buat barak sira taka ho razaun ‘seguransa de Estado’, hanesan ita hotu akompanha iha televizaun, loro-loron deit.

Ha’u ko’alia né, hanesan sidadaun nebé responsável ba nia atus rasik, maibé ha’u mós ko’alia ho ksolok tebes, tamba hakarak ajuda hatúr justisa… nebé justa, hodi evita hala’o justisa hanesan hala’o fali ‘perseguisaun polítika’ karik, hodi tuir ema balun nia hakarak, ka rai balun nia misaun, atu destrói ita-nia sosiedade.

Depois de Tribunal ida ne’e hamós tiha Calisto nia naran, iha kazu ida ne’e, ha’u hein, iha sá loron deit, atu mosu iha ne’e nudar Arguido lolós!

Rohan maka ne’e, dikin maka ne’e. Obrigadu wain.
.

Sem comentários:

Publicar um comentário

Nota: só um membro deste blogue pode publicar um comentário.