segunda-feira, 6 de julho de 2015

MATA DALAN KOK TIRU MATE IHA BAGUIA

.

Timor Post - 06 de julho de 2015

Díli—Deskonfia Komandu Operasaun Konjunta (KOK) mak tiru mate komunidade ida ho naran Luis Ramos ne’ebé  mak sai nu’udar  mata dalan ba KOK rasik hodi ba buka tuir Mauk Moruk iha  Samalari, Postu Administrativu Baguia, Munisípiu   Baucau.

Mate isin horiseik lori ona ba mortuáriu Hospital Nasional Guido Valadares (HNGV).

“Ami triste tanba KOK oho fali ami nia ema ne’ebé  mak sai nu’udar  mata dalan ba sira, sira rasik mak dehan Komunidade atu kontribui hodi buka Mauk Moruk ami kontribui tiha oho fali ami nia ema,” dehan  Patricio ba Jornalista iha Mortuáriu Ospital Nasionál  Guido Valadares sesta (03/07).

Maun hosi  Vítima  Patricio Ramos haktuir, kronolozia vítima  iha nia uma maibé  Administrador Postu Administrativu Baguia mak ba tula hodi sai mata dalan ba KOK buka tuir  Mauk Moruk, iha area Wabere Aldeia Iraosso Suku Samalari nian. Vítima sai hosi  uma ho Administrador hahú  tuku 8:00 kalan hodi ajuda KOK maibé  derepenti iha dadersan maizumenus tuku 5 rona kilat tarutu la kleur rona Luis mate ona.

“Ami konsidera ne’e KOK mak oho duni. Tanba ne’e ami ezije  ba forsa sira atu bele toma responsavel ba asaun oho nia alin ne’e tanba nia alin nunka involve iha grupu ida nia nu’udar  komunidade bai-bain ne’ebé  mak sempre kopera ho KOK maibé  derepenti oho fali nia,” dehan Patricio.

Tanba ne’e nia husu ba responsavel ba Forsa KOK atu bele foti medida ba oknum ne’ebé  mak tiru mate Luis, tanba sira família  sinti tristi bo’ot ba hahalok ne’e, KOK rasik mak husu komunidade nia kontribuisaun maibé  kuntribuitia sira fila oho fali.

“Ami ezije  ba Forsa sira tenki toma responsabilidade másimu  ba matebian nia família  ne’ebé  mak nia husik hela ami la kohi lakon ami nia ema saguati de’it , liu-liu oknum ne’ebé  mak tiru mate ha’u  nia alin ne’e tenki submete ba justisa,” dehan Maun Vítima  ne’e ho tristi.

Nia konsidera hahalok membru KOK nian ne’ebé  mak oho ema arbiru ne’e hahalok ne’ebé  mak la profisional, tanba ordem hosi  superior oinseluk sira ba implementa oinseluk, la’ós  ba buka los de’it  Mauk Moruk ho nia grupu maibé  oho fali mak komunidade sira ne’eb mak kontribui ba KOK rasik.
Nia dehan, hahaloko oho ema ne’e la di’ak  di’ak  liu hasai tiha tanba ema joven barak mak hakarak sai forsa maibé  la hetan fatin.

“Ami família  la konkorda tanba ami nia alin ne’e mate inusenti nusa mak KOK la ba buka ema ne’ebé  mak halo politika kontra governu maibé  oho fali ami nia alin ne’ebé  mak sai nu’udar  sira nia mata dalan,” dehan nia.

Iha fatin hanesan Vítima  nia Kaben Subiaty Ramos dehan,  los duni iha kinta (02/07) kalan tuku 8 mak administrador ne’e mai tula nia kaben sai ba ajuda KOK sai hanesan mata dalan maibé  dadersa tuku 5 rona kilat tarutu dala rua, ema mai dehan ba nia katak nia kaben ema tiru mate ona.

“Ha’u  husu ba nia (Vítima ) dehan o ba ne’ebé ? nia dehan ha’u  ba ho forsa maibé  kalan ne’e tomak la fila mai dadersan kilat tarutu dala rua mak ami hatene dehan ema tiru mate ona nia maibé  ami la hatene se mak tiru depois sira hulan lori mai fo hatene forsa mak tiru fali nia,” haktuir vítima  nia kaben ne’e.

Nia hatutan, fatin akontesementu ne’e do’ok hosi  sira nia hela fatin maibé  kilat tarutu ne’e sira rona hela, tanba ne’e nia mos husu ba estadu atu bele tau matan ba nia ho nia oan na’in  lima.
“Ha’u  nia oan na’in  tolu eskola hotu ha’u  atu fo eskola ho saida ba sira ha’u  nia laen mate ona,” dehan nia.

Entertantu Porta-Vos Komandu Operasaun Konjunta (KOK) Vice Xefe  Estadu Maior Jeneral Brigadeiro Jeneral Filomeno Paião de Jesus, informa, simu ona informasaun.

“Iha duni asidenti ida  ami  hein informasaun eskrita mais iha asidenti hodi kalan (horisehik kalan) tuku 4 iha forsa tiru duni ema ida mais ami hein konfirmasaun depois ami sei foi sai,” dehan Porta Voz ne’e liuhosi  konferénsia imprensa iha Kuartel Jeneral F-FDTL, Fatuhada, Sesta  (03/07).

Nia hatutan, sira so simu de’it  informasaun ne’ebé  mak seidauk klaru tanba seidauk hetan informasaun eskrita hosi KOK ne’ebé  mak hala’o  hela operasaun ne’e.
.

Sem comentários:

Publicar um comentário

Nota: só um membro deste blogue pode publicar um comentário.