segunda-feira, 27 de julho de 2015

Mauk Moruk La Ba Rende Iha Loron FALINTIL, Notisia Bosok

.
Foto, Jornal Nacional Diário
Timor Hau Nian Doben - 27 de julho de 2015 - Tradusaun hosi Oan Kiak

Tuir membru senior Konsellu de Revolusaun Maubere nian lidera hosi eis Komandante FALINTIL, Mauk Moruk, foin lalais nia informa ba Timor Hau Nian Doben katak notisia ke media fo'o sai kona ba Moruk atu entrega aan iha loron 20 de Agosto, Loron FALINTIL nian, ne'e lia bosok.

"Saida mak media fo'o sai hotu-hotu bosok, sira inventa hotu, husu ba sira se mak fo'o informasaun ne'e ba sira, se de'it mak fo'o informasaun ne'e bosok sira. Mauk la ba entrega aan", dehan.

"Prosesu negosiasaun foin mak hahú, oinsá Mauk Moruk ba rende ona?", kestiona.

Fonte ida ne'e haktuir katak sira sei negoseia saida mak Prezidenti KRM eziji ba Governu, karik Governu la simu, buat hotu fila fali ba pontu zero (inisiu).

"Ami sei negoseia hela, Mauk Moruk la fiar Ramos-Horta tanba nia halo manipulasaun barak no bele akontese hanesan akontese ba Alfredo Reinado. Mauk Moruk nomeia ona señora Angela Freitas hanesan nia reprezentante, hodi reprezenta nia iha negosiasaun no Prezidente Repúblika nomeia ona eis Xefi Estadu, José Ramos Horta.Mauk Moruk la fiar Ramos-Horta maibe ami sei tetu didiak no ami aseita, tanba se la'os nia, se tan? Taur tauk involve, Rui Araujo tauk, ema barak tauk, ami laiha tan alternativa seluk, ami tenke aseita Ramos-Horta hanesan mediador ida", deklara.

Tuir fonte refere, Mauk Moruk sei entrega aan ba autoridade sira uainhira governu simu ninia ezijensia sira hanesan tuir mai: hasai forsa seguransa sira hosi distritu Baukau, hasai akuzasaun hotu ke governu halo ba nia nomos ba ninia apoiante sira no governu tenke husu deskulpa ba povu Timorense tanba halo povu terus barak iha fulan barak ke halao operasaun hodi kaptura lider KRM nian.

Molok ami sinkroniza negosiasaun, Governu tenke aseita ezijensia Mauk Moruk nian, karik sira la aseita, entaun hotu-hotu hela hanesan no problema ne'e sei lori tempu naruk hodi rezolve", salienta.

"Mauk Moruk iha apoiu barak hosi povu, loron ba loron nia iha tan apoiu, tanba povu haré saida mak Komandu Operasaun Konjuntu halo hasoru povu insente no sira revoltadu liu. Mauk Moruk iha povu iha nia sorin, tanba povu hatene katak nia luta ba povu nia direitu e la halo hanesan ukun na'in sira ke hatene de'it naok no haré de'it sira nia aan rasik," ramata.

Fonte seluk dehan ba blog ida ne'e katak, "ne'e lia anin hodi halo konfuzaun ba publiku, ne'e manobra tanba governu iha intrese hodi habosok populasaun, tanba Estadu fakar osan barak iha operasaun hodi kaptura Mauk Moruk ho ninia membru sira no to'o agora sira kaptura de'it rusa no halo torturasaun no oho povu inosenti. Operarasau ida ne'e la hetan susesu no hafoer de'it Governu Rui Araujo nia naran.

Tuir media Timor-Leste nian, Prezidente Repúblika Taur Matan Ruak sesta-feira liu ba, iha Lautem,  hateten katak "rona ke Mauk Moruk hakarak rende iha loron 20 de Agosto, loron ke komemora Loron FALINTIL nian.

Matan Ruak dehan tan katak nia rasik ba simu Mauk Moruk, maibe, forsa seguransa sira sei la retira hosi distrito Baukau, liu-liu iha area prinsipal ba operasaun, Baguia no Laga.
.

Sem comentários:

Publicar um comentário

Nota: só um membro deste blogue pode publicar um comentário.