terça-feira, 14 de julho de 2015

MAUK TELEFONA ONA BA LERE

.

Timor Post - 14 de julho de 2015

Díli - Eis Prezidente Repúblika, José Ramos Horta, informa, Paulino Gama Mauk Moruk telefone ona ba Xefe Estadu Maior Jeneral F-FDTL, Maijor Jenerál Lere Anan Timur. Tanba ne’e, nia fi’ar iha tempu badak problema ne’e sei rejolvidu.
            
“Ha’u hatene sira telefone ba malu. Moruk telefone ba Komandante boot FALINTIL-FDTL, ha’u entrega ba Maun Lere. Ha’u entrega ba Maun Lere nia liman la’ós planu operasionál, maibé planu polítika. Purtantu, ita haree nain rua, Maun Lere ho Maun Taur, 24 anos nunka tun mai vila, i sira koñese problema ne’e di’ak los. Ha’u hatene ke iha tempu badak problema ne’e sei rejolve,” hatete Premiadu Nobel ba Paz ne’e bainhira hala’o vizita ba sede RENETIL, Segunda (13/07/2015), hodi fó omenajen ikus ba Fundador RENETIL, Saudozu Fernando La-Sama de Araújo.

Horta hatete, nu’udar jerasaun tuan nia prontu nafatin fó ideia atu nune’e bele hakotu problema tuan sira hotu iha Timor, hodi nune’e, husik jerasaun foun sira bele kontinua lori nasaun no povu ne’e ba moris di’ak.

“Ha’u prontu atu fó ideia, ideia balun fo ona, ideia balun tenke fó liuhosi advogadu. Ideia polítika,” subliña eis Reprejentante Sekretáriu Jerál Nasoens Unidas (ONU) ba Guné Bissau.

“Jerasaun tuan labele husik problema tuan sira ba jerasaun foun,” hatutan Horta.

Horta hatete, kazu Mauk Moruk la boot liu kazu 2006 – 2007 ne’ebé grave tebes. Tanba ne’e, tuir nia, kazu ne’e bele hakotu ho dalan polítika no dalan justisa.

Horta hatutan, kazu Mauk Moruk loloos la’ós kazu nasionál, tanba faktualmente kazu ne’e la’ós bo’ot no gave tebes.

“Dala ruma ita ida-idak nia hahalok, nia desizaun maka halo kazu ne’e hanesan seguransa nasionál. ita haree abut problema ne’e la’ós buat ida ke hanesan 2006 ke grave tebes. Ita bele hatete, iha F-FDTL nia laran, iha PNTL nia laran iha 2006 oin seluk,” dehan Horta.
                      
“Ha’u ko’alia ona ho Maun Prezidente, ko’alia ho Maun Lere, Maun Lú-Olo ho Maun Alkatiri ho Maun Boot Xanana, ho Primeiru Ministru, i ha’u fi’ar problema ne’e rejolve ho diálogu,” subliña Horta.

Eis Primeiru Ministru ne’e mos dehan, problema boot ke tenke rejolve maka governasaun, problema rekonsiliasaun ho timoroan sira iha Indonézia, problema veteranus, problema tasi timor no seluk tan.

“Problema hirak ne’e tenke rejolve no entrega ba imi (jerasaun  foun) hodi kontinua,” tenik Horta.  

Kestiona Operasun

Entretantu iha parte seluk, Pe. Juvito de Araújo, preokupa tebes ho Empeñamentu Operasaun Conjunta (EOC) ne’ebé hala’o hosi F-FDTL no PNTL, tanba situasaun operasaun halo povu hosik servisu barak.

“Ita halo operasaun ida agora ne’e de’it  la iha sensibilidade, konsiénsia kazutilizada tiha ona, ne’ebé ita ba halo buat sira ne’e hanesan fali robot de’it  ona,” kestiona Pe. Juvito iha Ailoklaran uainhira hala’o  reflesaun lorton 40 ba Saudozu Fernando La-Sama de Araújo nia mate, Sábadu (11/7).

Kazu Tiru Luis

Iha parte seluk, Komandante Jeral PNTL, Komisariu Julio da Costa Hornay, informa, kazu tiru mate mata dalan KOK, Luis Ramos ne’ebé  deskonfia komete hosi  membru KOK sei iha prosesu investigasaun nia laran.

“Agora nia prosesu investigasaun seidauk hotu ita komentariu uluk depois mak nia rejultadu seluk fali ne’e kan la dun di’ak. Di’ak  liu ita hotu-hotu hein investigasaun no prosesu ne’e remata mak foin ita ko’alia,” dehan Julio Hornay ba Jornalista sira iha Kuartel Jeral PNTL, Kaikoli-Dili, Segunda (13/07).

Iha oportunidade, Julio Hornay esplika, Empãhamento Operasaun Conjunta (EOC) ho Komandu Operasaun Konjunta (KOK) la iha diferénsia.

 “Ha’u  hanoin naran ne’e la iha diferensia ida la iha mos signifika ruma kona ba naran ne’e,” dehan Julio.  (cão/gus/way)
 .

Sem comentários:

Publicar um comentário

Nota: só um membro deste blogue pode publicar um comentário.