quarta-feira, 8 de julho de 2015

Proposta ba Estado atu resolve crisi Mauk Moruk hosi António Ximenes

.


7th July 2015 
Sua Excelencia Presidente Parlamento Nacional, 
Dr Vicente Guterres 
Rua Formosa, Díli, Timor-Leste 
Tel: (+670) 333 9870 Fax: (+670) 332 3884

Dalen Senhor Presidente Parlamento,

Ba dala uluk, hatoo cumprementus respeita nian ba Senhor Presidente Parlamento Nacional, nunee mos ba Xefi bancada CNRT, Xefi bancada Fretilin, Xefi bancada PD no Xefi bancada F Mudanca, ho Xefi Comisaoes, no ho nain deputado sira hotu iha Uma fukun Timor Loro sae. 

Liu husi carta ida nee, atu fo hatene ba Parlamento Nacional katak, hau haruka ona carta proposta kona ba dialog entre katuas Xanana ho katuas Mauk Moruk nian, ba Presidente Republica iha dia 3 Julio 2015. Carta ida nee nia anexo, haruka ona mos ba Parlamento Nacional.

Carta proposta neba nia objetivo, iha rua mak, hanesan: Primero nian, atu haforca carta nebe haruka uluk ona ba Xefi Estado, Jendral Taur Matan Ruac, kona ba dialog, momento Mauk Moruk sei iha Dili nian. Carta ida neba nia anexo, haruka ona mos ba Parlamento Nacional. No Segundo nian, kolia kona ba, caju crimi husi Mauk ho gropo nian, hau nebe nudar proponente, ba proposta dialog nian ida nee, maka toma responsabilidade. 

Hau halo carta proposta ba Estado atu halo dialog, no reconciliacao nian nee, tamba: 

1. Ita rain tama fali ona ba etapa nebe bolu, Timor oan foti fali ona kilat, hodi oho malu. Ida nee, sei la dun diak ba stabilidade nacao nian. No nia cosecuencia todan nebe sei mosu tuir mai mak, hanesan:

a. Investor husi rai liur, sei dificil uituan atu ba ita rain; 

b. Desenvolvimento sei la dun lao diak; 

c. Fatin servicu ba Timor oan sira nebe buka dadaun servicu, sei la hetan; 

d. Ita rain nia naran sei sai at, iha mundo Internacional; no, 

e, Estado sei gasta liu tan orcamento boot ba buat nebe la devia iha nian; 

2. Ita pro ukun an, halo ona dialog no reconsiliacao ho pro otonomia, nebe too fo ona perdaun ba Senhor Mateus Bere. Mai be, Estado husik fali ema hanesan Xanana ho Mauk Moruk hodi odi malu, nebe too halo povu kiik no kiak sira sai vitima; 

3. Rai barak iha mundo nebe sai rahun, tamba mos problema ho orcamaneto. Mai be, Ita nia nacao halis fali orcamento ba actividade funu, entre Timor oan rasik; no 4. Crisis nebe lao dadaun nee, iha hela nia fukun, nunee lolos bele resolve ho facil. Mai be, sai complicado liu tan tamba, ho fali forca politica no militar, nebe too halo povu kiik no kiak sira sai vitima, hanesan lao dadaun.

Nune’e, hanoin ba katak, Ita Timor oan duni tengki hamutuk hodi buka lesuk dalan, para hakotu lalais problema foun nebe lao dadaun nee, husi nia fukun, iha tempo besik. 

Ho nunee, bele: 

a. Garante, nacao nia stabilidade; 

b. Salva povu nia osan nebe, hasai dadaun ba funu; 

c. Hapara povu nia terus, liuliu iha baje neba; no 

d. Buka dalan atu la bele husik katuas Xanana ho katuas Mauk odi malu too husik mundo.

E ponto Segundo, husi carta proposta neba nian maka, hatoo ba Presidente Republica, Parlamento Nacional, Governo no Tribunal katak, se crimi nebe Mauk Moruk ho nia gropo halo nee mak, sai ona hanesan bareira boot, ba dialog entre katuas Xanana ho katuas Mauk nian karik, kona ba caju crimi neba ne’e, hau Antonio maka toma responsabilidade, intermo politica no crimi nian, maske hau tengki simu nia consecuencia, hanesan: 

i. Lakon hau nia direito ba vitalisia no veteranos nian; 

ii. La bele halo tan politica; no iii. Hau tengki tama kadeia.

Decicao ida nee, hau foti ho objetivo lolos mak, buka dalan lalais hodi hakotu problema nebe halo terus dadaun nacao em geral, no liliu povu kiik no kiak sira iha foho neba nee nian. Nunee mos, hodi hasai spirito, oho malu nian, iha Ita rai Timor ne’e nia leten. No ho pontos sira seluk, nebe hau rai ona iha carta proposta neba nia laran.

Los duni, iha ita nia nacao, la iha lei kona ba simu tutan caju crimi nian. Mai be, tamba: 

1. Ita hotu hakarak, atu habadak povu nia terus;

 2. Ita hotu hakarak salva povu nia osan; 

3. Ita hotu hakarak dame no pas iha rai ida nee nia leten; 

4. Ita hotu hakarak, promove cultura dialog no reconciliacao; no 

5. Parlamento Nacional, iha poder tomak hodi hamosu lei. 

Nunee, hau haruka carta ida nee ba Parlamento Nacional, liliu ba Bancada CNRT, Bancada Fretilin, Bancada PD no Bancada F Mundanca, atu urgentimente, halo lei nebe bele aplica tuir, proposta nebe husu kona ba responssablisa caju crimi nian, nebe mai husi hau nudar proponente ba proposta ba dialog no reconciliacao nian, hanesan hatoo ona ba Xefi Estado. 

Estado tengki hapara ona operacao Militar, no mai ita, tama ona iha meja dialog nian. Sua Excelencia Presidente Parlamento ho nai low deputados sira, la bele husik povu kiik no kiak sira terus ba bebeik. No la bele husik, problema domina uluk ita nia nacao. Mai ita hasai spirito, odi malu no oho malu nian, iha ita rain Timor Loro sae nee nia leten.

No ikus, hau monu ain ba Sua Excelencia, Senhor Presidente Parlamento Nacional, nunee mos ba Xefi bancada CNRT, Xefi bancada Fretilin, Xefi bancada PD no Xefi bancada F Mudanca, ho Xefi Comisaoes, no ho nain deputado sira hotu nia ain, hodi husu, favour ida atu fo laran kman ba carta proposta nebe hau haruka ona ba Presidente Republica, iha dia 3 Julio 2015 nian. Obrigado!
Hakaraik an nian,

Antonio Ximenes Ex deputado Assembleia Constituante Republica Timor-Leste. 
Temporarily address: 8/243 Riversdale Rd, Hawthorn Vic. 3122 Email:axis35alt@yahoo.com/
Facebook: Antonio Ximenes 
Mobile: +61410082125or 0422011165 
Permanent address: Pantai Kelapa, Dili,Timor-Leste 
Mobile: +6707235724

Cc:
• Sua Ex. Presidente Parlamento Presidente Republica, Jendral Taur Matan Ruac; • Sua Ex. Primero Ministro, Dr Rui Araujo; • Sua Ex. Presidente Tribunal, Dr. Guelermino da Silva; • Sua Ex. Presidente Conferencia Episcopal Timor-Leste, Amo Bispo Basilio do Nacimento; • Sua Ex Ex. Presidente Republica, Sr. Xanana Gusmao; • Sua Ex. Ex deputado L7 ho Sr Mauk Moruk; • Sua Ex. Ex Presidente Republica, Dr. Ramos Horta; • Veteranos hotu-hotu; • Diplomata hotu iha Timor-Leste; • UNTL ho Universidade sira hotu iha Timor Loro sae; • Igreja Protestante Timor Loro sae; • NGO; no • Anexo.

Nb: Hau sei too Timor, kleur liu mak dia 13 Setembro 2015. Mai be, se odamatan dialog mak loke ona, no percisa duni atu fo contribuicao, maka hau sei too Timor, iha 24 horas nia laran, hodi fo tulun ba dialog nee ho volontariamente nian. Liu tiha nee mak, hau ba simu responsabilidade, ba hau nia declara neba nian.
.

Sem comentários:

Publicar um comentário

Nota: só um membro deste blogue pode publicar um comentário.