terça-feira, 28 de julho de 2015

Vicente Mak Tama Kadeia, RDTL Folin Laek

.

Jornal Nacional Diario - 28 de agosto de 2015

Eis Vise Primeiru Ministru, Mario Viegas Carrascalão hateten katak, Prezidente Parlamentu Nasional (PN), Vicente Guterres mak sala duni hodi ba tama kadeia, maka Repúbika Demokratika Timor Leste (RDTL) folin sei laiha iha mundu internasional, tanba Vicente Guterres hanesan ema segundu husi Prezidente da Repúblika.

“Mais ha’u hanoin kuandu Prezidente Parlamentu mak ba tama iha kadeia, ha’u hanoin ema mós ladun fó folin ona ba ita nia Repúblika, tanba Prezidente Parlamentu ne’e, hanesan ema segundu husi Prezidente da Repúblika, kuandu Prezidente da Repúblika laiha, nia mak ezerse hanesan Prezidente da Repúblika,”ralata Carrascalão ba jornalista sira iha Hotel Timor, Sesta (25/7).

Tanba ne’e, Carrascalão sujere ba justisa atu hein to’o Parlamentu nia mandatu ne’e remata, mak foin prosesa ninia kazu, hodi labele hamonu diginidade RDTL.

Carrascalão hatutan, kazu Vicente Guterres nian ne’e, lolos laiha problema, Parlamentu Nasional tenke hasai ninia imunidade atu nia bele ba hatan iha Tribunal, tanba kazu hanesan ne’e, la’os akontese ba Vicente mesak deit, uluk Vise Primeiru Ministru José Luis Guterres mós hetan kazu, maibé nia ba hatan iha Tribunal, hotu tiha nia hala’o fali nia kna’ar hanesan bai-bain.

“Parlamentu tenke foti Vicente ninia imunidade, maibé kuandu la foti ninia imunidade, depois kuandu nia sai ona husi Parlamentu, laiha eskapa, tanba lei ne’e la’os atu expire,”afirma Carrascalão.

Nia dehan, lei ne’e sei kontinua hein ema, bainhira ema ida la ezerse ona nia funsaun, lei ne’e sei kaer hodi lori ba justisa.

“Ita nia ema sira ne’ebé kaer lei ne’e, iha korazen ka la’e. ha’u espera ita nia tribunal funsiona ho korazen katak, se mak sala, sala duni,”katak nia.

Carrascalão dehan, tuir nia hatene, Vicente Guterres nia kazu ne’e, la’os involve direita, maibé nia uluk substitui saudozu La Sama nia fatin, tanba iha momentu ne’eba, Saudozu La Sama substitui Prezidente da Repúblika nia fatin.

“Se ha’u mak hanesan Vicente karik, ha’u hatete ba Parlamentu katak, ha’u la sala, ha’u tenke ba hatan iha tribunal hodi fó ezemplu, tanba reprezentante povu mak tenke fó duni ezemplu ba povu,”afirma eis Prezidente PSD ne’e.

Carrascalão dehan, Vicente rasik mak tenke hasai dezisaun ida katak, kuandu nia la sala, nia tenke ba infrenta justisa hodi esklarese lia los.

Maibé Carrascalão mós dehan, Parlamentu Nasional uluk to’os lakohi hasai Vicente nia imunidade, tanba Vicente Guterres mai husi Partidu CNRT, karik mak Vicente husi Partidu FRETILIN, nia imunidade ema hasai tiha ona.

Nia haktuir, sei sala, nia tenke pasiensia atu ba hatan duni iha tribunal, tanba buat ida korupsaun ne’e labele tolera.

“Ba ha’u ita kuandu ezerse funsaun hanesan ne’e, labele iha buatruma ke ema akuza ita foer, ita tenke mós para ema haree katak, lider ne’e ema transparente ida,”tenik nia.cos
.

Sem comentários:

Publicar um comentário

Nota: só um membro deste blogue pode publicar um comentário.