terça-feira, 4 de agosto de 2015

EMA ELIT, LABELE HETAN SAUDE GRATUITA

.

Timor Post - 04 de agosto de 2015

DILI-Xefi Sentru Klinika Matan Nasional, Belmeiro Jeronimo husu ba governu Timor Leste tenke muda politika tratamentu saúde gratuita iha nasaun ne’e atu ajuda governu hadi’a dezenvolvimentu iha seitor saúde.

“Iha ita nia lei hatu’ur nanis ona iha artigu 57 hatete katak, ema hotu iha oportunidade ba halo tratamentu saúde gratuita, maibé ho politika governu nian ne’e, sei fó impaktu ba nasaun no susar atu hadi’a seitor saúde iha rai ne’e” tenik Belmeiro ba Timor Post iha nia kna’ar fatin Bidau, Sesta (24/7).

Tanba ne’e nia husu atu governu tenke muda politika ida fó tratamentu saúde ba ema hotu ho gratuita atu governu bele gaña reseita ba kofre estadu para uza reseita ne’ebé iha ba hadi’a dezenvolvimentu saúde iha rai laran.

Tuir nia katak, politika governu hatu’ur katak tratamentu saúde gratuita, ne’e di’ak, tanba ema ki’ik sira bele asesu ba saúde, maibé ema bo’ot sira hanesan membru governu no Parlamentu Nasional (PN) sira tenke selu.

Agora hanesan populasaun sira la iha kbi’it, ne’e bele halo tratamentu gratuita, mas hanesan funsionariu públiku, membru governu no Parlamentu Nasional (PN) ba halo tratamentu mak gratuita hotu, entaun susar atu hadi’a seitor saúde tanba kada tinan osan reseita atu ajuda governu ba hadi’a fasilidade saúde sira laiha tenke hasai nafatin osan mina.

Pior liu tan ema moras ba halo tratamentu iha rai liur governu maka selu hotu, buat ne’e maka hanesan ne’e hela de’it, impaktu ba futuru sei bo’ot, pelumenus hanesan populasaun bai-bain governu bele hasai osan ba selu.

Belmeiro dehan, labele hanoin de’it katak Timor Leste riku ho mina no gas, maibé haluha tiha katak, saida maka atu halo.

“Ita labele garante ba riku soin ita nia hanesan mina no gas, sé mina ne’e aban bairua maka maran, entaun ita nia nasaun Timor Leste sei hasoru kiak” Belmeiro, hatete.

Nia dehan seitor saúde bele gaña reseita bo’ot iha ne’eba, kuandu halo komparasaun tratamentu matan ou halo operasaun matan iha ema nia rain, ne’e ema selu osan bo’ot.

Sé buat sira ne’e maka governu hadi’a sistema politika ida saúde gratuita, entaun ba futuru governu bele hadi’a seitor saúde bele iha mudansa bo’ot no la presiza ema atu ba halo tratemntu iha rai liur atu gasta osan bo’ot.

“Ita atu hadi’a seitor saúde ida di’ak no buat hotu atu sai di’ak, tratamentu saúde labele gratuita, pelumenus tenke selu atu nune’e hodi reseita tama ba, bele halo buat balu di’ak iha seitor saúde”Xefe Belmeiro dehan. (gus)
.

Sem comentários:

Publicar um comentário

Nota: só um membro deste blogue pode publicar um comentário.