quinta-feira, 13 de agosto de 2015

F-FDTL membru balun sai hosi kuartel, sira lakohi no moe selebra Loron Falintil

.

Timor Hau Nian Doben - 13 de agosto  de 2015

Timor Hau Nian Doben simu informasaun katak horseik Coronel Maubiti no F-FDTL membru balun abandona (husik) kuartel tanba sira lakohi no "moe" selebra Loron Falintil  tanba instituisaun ne'e rasik mak oho Komandante Falintil ida.

"Horseik dader Maun Maubiti no seluk tan sai hosi kuartel no lakohi partisipa iha komemorasaun Loron Falintil nian ke hahú horseik tanba sira moe, tanba Falintil rasik maka oho Komandante Mauk Moruk no Komandante Mauk nia mós ema ida ke fo kontribuisaun boot tebes iha luta ba ita nia libertasaun", haktuir veteranu ida ba blog ida nee.

Tuir veteranu ida ne'e Mauk Moruk mate tanba ema tiru nia ho kilat musan 42, no ema boot uluk iha ai laran mos Falintil mak oho, maibe nia bandu  Timor Hau Nian Doben hakerek ema boot nia naran.

"Pai Mauk mate ho kilat musan 42, ema boot Falintil ida mak oho nia. Tuir lolos sira moe selebra Loron Falintil. Se Falintil rasik mak oho nia ema rasik se tan mak sira atu valoriza. Ema ne'e mos sunu pai nia inus ho sigaru ida. Pai nia isin nia tiru rahun. Pai Mauk sira hakanek ona iha loron kuarta-feira, Pai fraku tebes tanba sa mak la serka de'it no hein, tanba sa mak tenke tiru mate ho violensia, mate ona mos nia sei tiru nafatin, ema ne'e karik odio tebes Pai", nia dehan.

Tuir veteranu ke ami koalia, tinan ida ne'e governu devia kansela Loron Falintil no halo reflesaun boot ida kona ba valores Falintil nian ke sira harii iha ai laran.

"Tinan ida ne'e Loron Falintil devia kansela tanba Falintil forsa rasik mak oho Komandante Falintil ida no Komandante L7 tanba forsa nia hahalok aat tenke hakohi nia alin. Se maka hakarak selebra loron ida ne'e? Ita ba selebra ke ita rasik mak oho ita nia ema ida, ema ida ke ninia família fakar ran hodi nasaun sai independente no durante tinan sanulu luta iha ai laran. Husik Lere, Taur no Xanana selebra mesak, ohin loron sira koalia hanesan sira funu mesak, sira mak lori Timor-Leste to'o independensia mesak. Laos ami nia loron, Falintil nia loron foin troka ba Xanana, Taur no Lere nia loron ne'ebé husik sira selebra hamutuk, kondekora malu no gava sola malu, ami nia mataben seidauk maran tanba sira nia hahalok", katak nia.

"Mai ita hotu hamulak ba ita nia rai doben no hamulak mos ba ita nia Maun Mauk no nia membru nain tolu ke Falintil rasik oho sabadu. Mai ita husu ba sira perdoa ita hotu liu-liu sira nain tolu, Lere, Taur no Xanana ke oho sira", ramata.
.

Sem comentários:

Publicar um comentário

Nota: só um membro deste blogue pode publicar um comentário.