domingo, 9 de agosto de 2015

Governu Hein Rezultadu Autopsia Mate Isin MM, Kontinua Aperta Seguransa Interna

.

Timor Post - 09 de agosto de 2015

DILI— Governu liu hosi reuniaun Konsellu Seguransa seidauk hasai desizaun ba mate isin Paulino Gama ‘Mauk Moruk’, tanba sei hein rezultadu autopsia hosi Hospital Nasionál Guido Valadares (HNGV).

 Tuir Porta Voz Governu, Agio Pereira katak, reuniuan interministerial entre autoridade defeza no seguransa, Domingu (9/8) horisehik fó de’it breafing ba Primeiru Ministru Rui Maria de Araújo.

Tanba Mauk Moruk ho nia elementu sira mate, Xefe Governu halo hela vijita traballu ba Hongkong. Inkontru ne’e mós halo analize ba situasaun seguransa iha rai laran, ne’ebé refere liu ba mate isin Mauk Moruk ho nia elementu sira. Porta Voz ne’e hatete katak, inkontru hanesan haree ba pontu de situasaun, maibé detallus seidauk bele informa ba públiku.

 “Inkontru ne’e haree situasaun tomak, la’os haree de’it Mauk Moruk nia mate, lae, situasaun seguransa rai laran nian. Kona-ba desizaun ba mate isin, ami sei hein Doutór sira hato’o relatóriu autopsia mai, mas seguransa rai laran tenke kontinua hametin” Porta Voz Governu Agio Pereira informa ba jornalista sira, iha Palásiu Governu, Domingu (9/8).

 Agio dehan, maske Mauk Moruk mate ona, maibe governu seidauk bele foti desijaun, tanba sei hein rezultadu autosia foin bele foti desiaun. Porta Voz ne’ esplika, rezultadu autopsia sai hanesan evidensia legal ida ba governu, nune’e estadu kaer metin bele foti desijaun tuir rezultadu autopsia ne’e. Nune’e mosu protesta ruma hosi família, rezultadu autopsia ne’e governu sei intrega ba parte autoridade judisiariu tuir akuzasaun ne’ebe antes ne’e estadu hasai kondena ona Mauk Moruk durante nia sei moris. Maski nune’e, Agio dehan kestaun seguransa rai laran forsa hosi instituisaun rua sei kontinua aperta liu tan seguransa interna.

Reuniaun konsellu seguransa ne’e aprezenta pontu de situasaun hosi Ministru Defeza Cirilo Cristovão ho Ministru Interior Longuinhos Monteiro ho Vise Xefe Estadu Maior, Koronel Falur Rate Laek. “Ha’u hakarak hatete katak, mate isin hamutuk ema na’in hat, depois mak sei haree, tanba sei hein autopsia hosi doutór sira,”dehan Porta Voz Agio Pereira.

Partisipa iha reuniaun interministerial Konsellu Seguransa ne’e partisipa hosi Ministru Estadu Koordenadór Asuntu Ekonómiku Estanislau da Silva, Ministru Estadu, Koordenadór Administrasaun Interna Deonisio Babo Soares, Ministru Justisa Ivo Valente, Ministru Defeza Cirilo Cristovão, Ministériu Interior, no Ministru Planeiamentu no Investimentu Estratéjiku Xanana Gusmão.

Purtantu, jornalista sira hein hela, Primeiru Ministru Rui Maria de Araújo hodi husu desizaun governu kona-ba mate isin Mauk Moruk. Maibé Xefe Governu lakohi sa’e hosi portaun bo’ot Palásiu Governu nian, maibé liu hosi hosi diresaun ba Parlamentu Nasionál. Nune’e eskoltu sira lori kareta PM korta liu hosi diresaun Acait nian, ba hein iha portaun bo’ot Parlamentu Nasionál nian. (vas)
.

Sem comentários:

Publicar um comentário

Nota: só um membro deste blogue pode publicar um comentário.