sexta-feira, 7 de agosto de 2015

Membru EOC 2 KANEK, KRM 1 MATE

.

Timor Post  - 07 de agosto de 2015

DÍLI—Atentadu tiru iha Kau Ua Hu, aldeia Kaitia, suku Fatulia, postu administrativu Venilale, munisipiu Baucau, Kinta, (6/8) maizumenus tuku 13.00 hakanek membru Empeñamentu Operasaun Konjunta (EOK) rua no hamate membru Konsellu Revolusaun Maubere (KRM) ida.

“Sira tiru malu ne’e hamrik mós la-dook malu, kauze metru lima to’o 10 hanesan ne’e, sira tiru uluk mak forsa foin tiru”, Administradór Venilale Júlio Tome da Silva ba Timor Post via telefone, Kinta, (6/8).
Nia informa, vitima hosi EOK ne’ebé kanek mak Nelson Carlos Amaral hosi Polísia Nasionál Timor-Leste (PNTL) kanek todan, tanba hetan tiru hosi hirus matan no ida seluk Gau Terus hosi FALINTIL-Forsa Defesa Timor-Leste (F-FDTL) hetan tiru hosi parte liman no ain.

Autoridade lokal ne’e hatutan, membru KRM ne’ebé mate fatin ba momentu akontesementu ho naran Domingos Soares tanba hetan tiru iha parte kabun.

Administradór Júlio dehan, atentadu ne’e MM ho nia grupu uza deit pistol rua, MM ka’er ida no ida seluk matebian Domingos Soares mak ka’er. Júlio Tome mos informa, hafoin tiru malu, MM hamutuk ho nia membru nain tolu konsege halai ba ai-laran.

“Mauk Moruk nia membru ne’ebé mate ne’e ho pistola, depois nia maluk ida halai fali mai foti pistola ne’e hosi matebian nia liman. Depois sasan hosi Mauk Moruk nian ne’ebé mak so’e hela iha fatin atentadu mak telefone tolu iha Mauk nia pasta laran no sasan seluk tan”, Júlio haktuir.

Entretantu, membru EOK nain rua ne’ebé hetan kanek maizumenus tuku 15.30 evakua kedas mai Díli ho aviaun helikoptru MkM, HV- UVA. Aviaun ne’ebé tula vitima nain rua ne’e to’o iha Kuartel Jerál PNTL Kaikoli maizumenus tuku 17.00.

Júlio hatutan tan, atentadu ne’e mosu kuaze minutu lima nia laran. Nia realsa, membru MM ne’ebé mate iha fatin ne’e, komunidade hamutuk ho forsa sira evakua hosi fatin akontesementu maizumenus tuku 18.30 no hatama kedas ba kareta laran hodi lori mai Díli ba prosesu otopsia.

Hafoin situasaun hakmatek, autoridade lokal fatin refere inklui forsa seguransa apela ba komunidade atu túr hakmatek no labele trauma.

“Oras ne’e situasaun la’o normal, no ami apela ba komunidade sira atu túr hakmatek, no importante liu mak tenki koopera ho parte defesa no seguransa”, Júlio tenik.

Nia realsa, hafoin MM ho nia membru nain tolu halai ba ai-laran, oras ne’e hosi parte EOC nian kontinua buka tuir.

Prosesu evakua vitima nain rua ne’e akompaña hosi Ministeru Interior Longuinhos Monteiro ho kilat STR.

Entertantu, Segundu Komandante PNTL, Komisariu Faustino da Costa ba jornalista sira dehan, seidauk bele fó komentariu ruma tanba sei hein despasu hosi Komandante Jéral PNTL Komisiariu Júlio da Costa Hornay.

“Ami seidauk fó komentariu no informasaun ba akontesementu ne’e, tanba hein autorizasaun husi komando jéral”, nia hatan ba jornalista sira iha Kuartel Jéral PNTL, Kinta, (6/8). “Hein relatoriu hosi komando EOK mak foin bele fó sai ba publiku kona-ba akontesementu tiru malu”.

Avalia Operasaun EOK

Sikun seluk, Parlamentu Nasionál (PN) ho governu halo enkontru feixada ida hodi halo avaliasaun ba rezultadu operasaun ne’ebé mak durante ne’e Empeñamentu Operasaun Konjunta (EOK) halo hasoru eis Prezidente Konsellu Revolusaun Maubere (KRM), Paulino Gama Mauk Moruk.

Enkontru ne’ebé taka ba públiku ne’e halo iha uma fukun, hetan partisipasaun masimu hosi deputadu, Ministru Interior Longuinhos Monteiro, Ministru Defesa, Cirilio Cristovão, Segundu Komandante Jerál Polísia Nasionál Timor-Lorosa’e (PNTL), Komisariu Faustino da Costa no Xefe Estadu Maior Jeneral das FALINTIL-Forsa Defesa Timor-Leste (F-FDTL), Maijor Jeneral Lere Anan Timur.

Molok hahú enkontru, tuir orientasaun funsionariu sira iha PN labele asesu, inklui mídia hein de’it iha portaun tama ba PN to’o enkontru remata.

Enkontru ne’e hahú tuku 9.00 to’o 14.30. Hafoin remata, mídia sira tenta halo konfirmasaun ba parte governu no deputadu sira ne’ebé partisipa, maibé la-hetan autorizasaun hosi ekipa seguransa (PNTL-DNSEP).

Tuir informasaun ne’ebé mak mídia sira hetan hosi fontes konfirmadu balun, enkontru entre parte defesa, seguransa no PN ne’e hodi ko’alia kona-ba avaliasaun ba rezultadu operasaun ne’ebé mak durante ne’e EOK halo hasoru MM ho nia grupu.

“Enkontru ne’e ko’alia kona-ba interese nasaun, tanba ne’e ami labele fó esplika klaru ba imi (mídia). Ida ne’e segredu”, fontes ne’ebé lakohi hakerek nia identidade ba jornalista sira iha area PN, Kinta, (6/8).

Enkontru hala’o tanba antes ne’e liu-hosi sesaun plenária, deputadu sira kestiona mak’as kona-ba operasaun, tanba gasta osan barak, halo violasaun hasoru povo inosente, limita ema nia liberdade, maibé seidauk halo kapturasaun ba MM ho nia membru prinsipal sira seluk.

Tanba ne’e, fontes ne’e realsa liu-tan, enkontru ne’e ko’alia kona-ba avaliasaun rezultadu operasaun. Fontes ne’e dehan, enkontru ne’e mos ko’alia kona-ba stratejia balun ba operasaun hodi buka MM. (way/tay)
.

Sem comentários:

Publicar um comentário

Nota: só um membro deste blogue pode publicar um comentário.