sexta-feira, 7 de agosto de 2015

Tribunal Liberta Antonio Freitas

.


Timor Post - 07 de agosto de 2015

DÍLI—Tribunál Distrital Díli (TDD), Kinta, (6/8) liberta kondenadu eis Direitór Aprovizionamentu Ministériu Justisa, Antonio Freitas hosi metade pena ho liberdade kondisionál no selu indiminizasaun ba estadu ho valor $52.000.00. Antonio Freitas kondena hamutuk eis ministra justisa, Lúcia Lobato.

Antonio Freitas liu-hosi tribunál rekursu kondena komarka tinan lima no selu multa ba estadu ho osan $52.000.00 tanba prova komete krime administrasaun danoza hamutuk ho eis ministra justisa, Lúcia Lobato relasiona ho konkursu ba projetu konstrusaun edifisiu notariadu iha distritu ualu.

Lúcia Lobato sai ona hosi komarka tanba hetan perdaun hosi Prezidenti Repúblika, Taur Matan Ruak iha tinan kotuk. Entretantu, Antonio Freitas kumpri ona komarka tinan tolu ho desizaun final hosi tribunál tinan lima komarka. Tanba ne’e, kondenadu tenki kumpri liberdade kondisionál to’o loron 22 fulan-Janeiru 2018 mak bele remata pena.

Julgamentu ne’ebé prejidi hosi juiz José Maria de Araujo, prokuradór Angelina Saldanha afirma kondenadu tenki selu multa ba estadu ho valor osan ne’ebé tribunál hatun.

Aleinde ne’e, ministériu públiku liu-hosi Angelina Saldanha husu atu kondenadu entrega uma ho kareta ida ne’ebé mak pertense ba Antonio Freitas. Nune’e, tribunál fó fiar, kondenadu bele buka osan hodi selu tusan.

Kondenadu promete, sei esforsu buka osan durante tinan rua nia laran atu buka servisu, nune’e bele selu multa.

“Agora dadaun, ha’u buat ida laiha, ha’u so iha de’it ha’u nia kareta ida ho uma ida, ha’u laiha kapasidade atu selu indiminizasaun ne’ebé mak todan loos ne’e. Ho ida ne’e, ha’u husu ba tribunál atu fó oportunidade mai ha’u durante tinan rua nia laran atu ha’u buka servisu hodi selu osan sira ne’e, maibé hanesan jaminan ha’u sei entrega ha’u nia uma ida ho ha’u nia kareta ne’e tribunál to’o bainhira ha’u nia osan ne’e remata mak ha’u sei foti fali kareta ne’e”, kondenadu promete ba tribunál iha komarka Bekora, Kinta, (6/8). Durante ne’e, kondenadu hetan asistensia legal hosi defensór públiku, Cancio Xavier. (jxy)
.

Sem comentários:

Publicar um comentário

Nota: só um membro deste blogue pode publicar um comentário.