sexta-feira, 18 de setembro de 2015

Australia La Interese Negosia Fronteira Maritima – Ohin, TL-RI Tuur Hamutuk

.
Jornal Nacional Diário - 18 de setembro de 2015

Governu Australia la hatudu nia vontade diak no la iha interese atu tuur hamutuk ho Timor Leste (TL) hodi halo negosiasaun kona-ba fronteira maritima.

Konsuladu Jeral Timor Leste ba Darwin-Australia, Francisco Jose Filipe informa katak, Australia lakohi diskuti fronteira tasi ho Estadu Timor Leste.

“Ita bele dehan sira la iha intrerese iha mudansa ne’e, maibe ita tenki servisu nafatin buka tuir ita nia dereitu para bele hetan buat ne’ebe ita nian,” hateten Francisco Jose Filipe ba Jornalista sira hafoin hasoru malu ho Prezidenti Republika (PR), Taur Matan Ruak, iha Palasiu Presidensia, Kinta (17/9/2015).

PR Taur Matan Ruak mos hakarak hatene halo oinsa opiniaun ho mudansa Primeiru Ministru Tony Abbott, maibe tuir Jose Filipe katak, maske sei iha negosisaun maibe sei han tempu.

Francisco Jose Filipe hatutan, Primeiru Ministru foun Australia nian, Malcolm Bligh Turnbull, sei la muda nia politika no mantein politika eis PM Tony Abbott nian.

Maske, Australia la iha intrerese atu diskute fronteira tasi entre Timor ho Australia, maibe PR Taur husu ba Governu atu esforsu a’an nafatin buka dalan para bele hetan rezultudu diak ba negosiasoens sira ne’e.

TL-RI Tuur Hamutuk

Husi sorin seluk, ekipa tekniku Republika Indonesia (RI) ho Timor Leste (TL), Sesta ohin (18/9/2015), hahuu tuur hamutuk hodi diskuti fronteira tasi entre nasaun rua.

Sorumutu ne’e halao iha iha salaun enkontru Ministerio Negosios Estranjeirus no Koperasaun (MNEK), durante loron tomak.

“Hau la bele dehan nogosia, maibe foin mak hanesan konsultas entre ita nia tekniku sira kona-ba kestaun fronteira martima nian,” informa Ministru Negosiu Esntranjeirus no Koperasaun (MNEK), Hernani Coelho ba jornalista sira hafoin enkontru ho Presidente Republika (PR) Taur Matan Ruak.

Hernani hatutan, ekipa Indonesia   nian sei lidera husi Direktur ida ne’ebe mak toma konta ba tasi ninian.

Kona-fali ba enkontru ho PR Taur iha Palacio Presidensia, Hernani informa katak, ne’e hanesan enkontru regular ho PR Taur hodi aktualiza situasaun rai liur nian ba PR Taur Matan Ruak.

“Hau mai hato ba PR Taur kona-ba kondekorasaun   medalha ordem de Timor Leste ne’ebe mak hau reprezenta PR hodi hato ba ita nia maluk apoiantes sira iha Japaun,” informa Hernani.

Sira ne’ebe mak simu medalha ordem Timor Leste ne’e husi grupu Japanese Closing For Eas Timor. Ne’ebe kondekorasaun ne’e fo uluk ba ema nain 13 husi grupu refere, maibe ema iha grupu nia laran balun mate tiha ona, mas sira nia familia mak simu hela medalha ne’e, tan ne’e duni nain 6 mak simu pesoalmente.

“Grupu ne’e servisu ho ita kleur teb-tebes, sira nia membru ida Mario Monika ne’ebe oras ne’e monta hela nia orfunatu iha Bebonok ne’eba,” dehan Hernani.

Hernani informa mos programa Governu ne’ebe mak sei halao   iha fulan Setembro no Outubro nian ba PR Taur Matan Ruak.

“Hanesan ita bo’ot sira hatene katak, iha fulan septembro iha aktividade Asembleia Nasoins Unidas, ne’ebe mak sei partisipa husi Timor, sei lidera husi Primeiru Ministru depois ami akompanha, depois sei vizita ofisial ba Kuba,”tenik Hernani. Avi
.

Sem comentários:

Publicar um comentário

Nota: só um membro deste blogue pode publicar um comentário.