quarta-feira, 2 de setembro de 2015

Emilia Pires manan $30,000 fulan, Rui Araujo tenke ba hatan iha PN no hatan povu

.

Oan Kiak

Dra Emilia Pires, eis ministra Finansas no hanesa ema ida que hein julgamentu tanba deskonfia katak nia komete krime korupsaun, oras ne'e tuir Jornal Independente no Jornal Timor Post, nia hetan kadeira boot ida hanesa asesora internasional iha Ministeriu Finansas no manan osan bot liu ita nia PR no PM, kada fulan Emilia manan $30,000 amerika dolar nian.

Ha'u admira tebes ho Rui Araujo nia governasaun tanba Emilia Pires uainhira servisu hanesa ministra Finansas, nia hatudu momos ba ita hotu katak laiha kompetensia hodi kaer knaar ida ne'e no aat liu tan deskonfia katak nia halo korupsaun no Governu sei hili nia hodi sai asesora iha Ministeriu Finansas no simu osan bot tebes, osan ida ne'e povu nian, ita hotu nian ne'ebe tenki husu ba povu nia reprezentante iha Uma Fukun hodi bolu Rui Araujo ba hatan kazu ida ne'e.

Deputadu sira iha Uma Fukun tenki ezizi Rui Araujo ba halo esplikasaun klean ba kazu ida ne'e. Laiha Maubere Oan seluk ba fo asesoria ba Ministeriu Finansas, governu tenki hili ema ida que hatudu ona ba Maubere Oan ninia inkompetensia no iha prosesu judisial hasoru nia?

Ida ne'e mak Rui Araujo bolu reforma iha administrasaun? Governasaun ho transparensia no sei la tolera korupsaun? Ita hotu hatene ona katak to'o sentensa ida mai hosi tribunal, ita labele dehan katak Emilia ema kulpadu, maibe governu Rui nian mak tenki iha konsensia oituan no la fo'o servisu ba ema ida que iha kazu korupsaun iha tribunal hasoru nia no aat liu tan selu nia osan bot tebes, Maubere Oan nia osan, laos Rui nia osan, laos osan que nia aman ka nia abo sira fo'o ba nia. Osan rihun 30 que Emilia simu fulan fulan Maubere Oan nia osan, povu nia osan no povu ida ne'e sei hetan difikuldade bar barak iha sira nia moris loron loron. Bispu Baukau rasik lamenta hare labarik sira iha liuron husu ismola. Labarik sira sei tane liman iha liuron no ita nia Governu sei la halo buat ida maibe labarik sira nia osan sira fahe ba ema ida que deskonfia nia naok hosi Maubere Oan.

Rui Araujo nia governasaun la'o sabraut duni no povu tenki hamirik no husu esplikasaun ba Emilia nia vensimentu, povu labele nonok, labele husik sira fahe malu povu nia osan hanesa sira nian. Povu tenki husu ba Governu tanba sa mak Governu selu Emilia Pires hanesa ema internasional? Tanba iha pasaporte rua? Ita bele dehan katak ida ne'e hanesa fraude ka krimi hasoru  Estadu ka lae?

Ha'u preokupa ho osan maibe ha'u preokupa liu tan Rui Araujo nia Governu jogadas foer hodi fahe servisu ba ema hanesa Emilia no aat liu tan, Emilia sai asesor laos hanesa ema Timor ida maibe hanesa ema internasional ida. Uainhira Emilia hakarak sai ministra nia Timoroan, uainhira hakarak hetan kadeira hanesa asesor troka fali kulit no nia ema internasional? Governu nia hahalok krime hasoru Maubere Oan ka lae?

Timoroan ho pasaporte rua mak nain duni ba ita nia rai, ami pasaporte ida mak susar iha ita nia rain. Governu tenki bandu ema ho pasaporte rua, ka bandu sira ho pasaporte rua hetan fatin aas iha ita nia Administrasaun Publiku tanba ita la bele fiar sira, karik sira halo korupsaun sira bele halai lakon ba rai liur no se mak ba kaer sira? Ho ema ho pasaporte rua, ita Timoroan sei lakon beibeik, sei atan nafatin.

Maubere Oan mak la hetan servisu ho salariu hanesa Emilia nian, tanba ema que mai hosi rai liur mak 'matenek' tebes, sira mak mai 'hanorin' ita, tanba Maubere Oan ema 'beik', ita la beik de'it uainhira funu hasoru Indonesia hodi ohin loron sira que mai hosi rai liur susu ita nia terus no susu Maubere Oan nia ran no ruin. Injustisa bot sei akontese iha ita nia rain, mai ha'u ita nia situasaun ohin loron hanesa malisan ida tanba Maubere Oan moris fila fali iha  kolonialismu foun nia okus.

Maubere Oan sei kiak ba beibeik, sei terus ba beibeik, sei mukit ba beibeik no nafatin sai pendatang ida iha nia rain rasik. Independensia lulik ida ne'e lolos se mak goza?
.

Sem comentários:

Publicar um comentário

Nota: só um membro deste blogue pode publicar um comentário.