quarta-feira, 2 de setembro de 2015

Manuel Monteiro: Justisa Tenke Hatur Lolo’os Iha Nia Fatin

.

Jornal Nacional Diário - 02 de setembro de 2015

Diretor Organizasaun Não Govermental (ONG) Yayasan HAK Manuel Monteiro informa, HAK nia ejiji Estadu tenke hatur justisa iha ninia fatin no husik órgaun estadu ida-idak la’o tuir ninia dalan.

“Ami nia ejijénsia maka ne’e justisa tenki hatur lo-loos iha ninia fatin, polítika nain sira labele halo intervensaun polítika ba servisu judisiáriu ninian, husik órgaun estadu ida-idak la’o tuir ninia dalan no halo ida-idak ninia kna’ar tuir konstituisaun RDTL artigu 69 ne’ebé koalia kona-ba prinsípiu separasaun de poderes”, hateten Manuel Monteiro ba JN-Diário iha ninia kna’ar fatin Farol-Díli, Tersa Feira (01/09).

Manuel Monteiro hatutan katak, atu dehan demokrasia halo nusa se desizaun hotu-hotu iha lider ida nia liman.

“Ezemplu lider ida hasai liafuan ida ema hotu-hotu tetuk hanesan raihenek, nonok, tuir de’it mezmu ninia desizaun no polítika ne’ebé nia foti ne’e sala, maibé ema lakohi halo komentáriu di’ak liu hili dalan nonok. Ne’e signifika hahú tama ona ba sistema ditadura no militarizmu”, hateten Manuel Monteiro.

Manuel Monteiro lembra katak, ezemplu ida mak akontese ho rezolusaun ida hasai juis sira, iha Tribunal Distrital.

“Ida ne’e kontra konstituisaun RDTL no prinsípiu estadu de direitu laiha tiha ona, tanba ukun na’in sira maka hafraku lei no prinsípiu estadu ninian, sira maka ka’er kargu iha Parlamentu Nasionál (PN), okupa fatin iha órgaun estadu no sira maka halo lei ne’e, maibé sira kontra fila-fali lei ne’e entaun signifika katak, sira hatudu hela marjen ka presidente ladi’ak ba iha futuru”, Manuel Monteiro esklarese.ves
.

Sem comentários:

Publicar um comentário

Nota: só um membro deste blogue pode publicar um comentário.