sexta-feira, 11 de setembro de 2015

Orsamentu Estadu Gasta Saugate Ba Projetu

.

Jornal Nacional Diario - 11 de setembro de 2015´

Deputadu Parlamentu Nacional (PN) Komisaun E trata asuntu infraestrutura, Manuel Castro konsidera Governu taka matan, tanba la poupa orsamentu Estadu gasta saugate ba projetu ne’ebe mak halo hotu ona haruka sobu fila fali.

“Tuir ami nia hare iha area Toko Baru Bidau nian   ne’eba ema   sira komesa sobu fila fali ona trotoar sira ne’e, hau hanoin Primeiru Ministru kualia kona-ba poupansa, maibe trotoar sira ne’e foin halo hotu tinan rua liu ba, maibe tinan ida ne’e sobu fila fali,” afirma Manuel Catro ba JNDiario iha PN, Kuarta (9/9/2015).

Manuel Castro dehan, la hatene tizolu sira lori ba tau iha ne’ebe, nusa mak labele uza fali, tanba tizolu sira ne’e sei diak hela.

“Primeiru Ministru kualia kona-ba poupansa mas iha kotuk hela hanesan ne’e, Primeiru Ministru taka hela matan, Minstru Dezenvolvimentu mos taka hela matan,”dehan Manuel Castro.

Tuir Manuel Castro, lolos ne’e komesa husi area Parlamentu Nacional hodi tesik mai edefisiu Eletridade de Timor Leste (EDTL) Colmera nian ne’e iha tiha ona valeta bo’ot foin mak konstrui ne’e la presiza ke tan valetas, maibe buka identifika ida ne’ebe mak kuak ne’e ke’e fali bele kanaliza bele lao los hotu ona.

“Ita hakarak buat hot-hotu ita sobu tiha tau fali samea iha leten karik, hau hanoin tau tizolu sira ne’e wainhira rahun tiha mak sobu, ne’e mak ita dehan poupansa, mas diak hela mak sobu fali ne’e ita gasta osan fo ba kompanheiru sira para hetan osan lalais,” tenik Manuel Castro.

Relasiona ho trotoar ne’ebe mak sobu fila fali hanesan iha area Bidau nian ne’e, Manuel Castro dehan,   laos deit Ministerio la halo estudu antes implementa obra sira, maibe kuaze Governu tomak la halo estudu, tanba ohin halo aban sobu. Laos halo tinan ida, tinan oin sobu.

“Ami fo hanoin bei-beik ba Governu, maibe Governu ne’e tilun diuk matan delek la rona, la hare, tau ajensia bar-barak maibe nuka kontrola projetu, entaun ida ne’e ami kualia hanesan ami nia ulun fatuk atu moras, diak liu ami nonok husik sira halo ba, bainhira sira puas riku ona, entaun sira para ho ne’e,” haklaken Manuel Castro.

Biban ne’e, membru Deputadu Parlamentu Nacional (PN) sira ‘sadik’ Governu foti disizaun ba kompanha ne’ebe mak fui alkatraun la iha kualidade iha parte hudi laran tesik ba Delta.

“Uluk ami seidauk resesu ne’e ami hakilar, estrada kuak barak mak iha Delta ne’eba, tanba alkatraun nia kualidade la diak, tanba ne’e PN hakarak hato ba iha Ministerio kompotente atu bele hare tok projetu ne’e iha kualidade ka lae, see la iha kualidade medidas sa ida mak Governu atu fo hasoru kompanha ne’e,” esplika Deputadu PN Bankda Fretilin Paulo Monis.

Deputadu PN Bankada CNRT, Cristovão Barros, husu Governu kontrola kontrola laboratorium alkatraun ne’ebe mak nain husi kompanha sira atu nune’e bele garante kualidade de estrada.

Cristovão Barros esplika, atu garante kualidade alkatraun ne’e iha parte rua tenki servisu hamutuk, primeiru husi Obras Publika nia tenki halo orario kontinua atu tun ba baze hare tuir obra ne’e lao tuir kontratu   ne’e ka lae.

Segundu ema sira tekniku husi kompanha nia tenki lao tuir kontratu ne’ebe mak Governu fo ba sira, depois uza material ne’ebe mak Ministerio orienta ona ba sira, maibe   to iha terenu mak kompanha sira halo la tuir kontratu, entaun ne’e responsavilidade sira nian, wainhira Obras Publika tun ba hare mak hare projetu ne’e la tuir standar entaun Kompanha tenki responsavilidade estrada ne’e.

Deputadu PN Komisaun E trata asuntu infraestrutura, Manuel Castro hateten, estrada parte Hudi Laran tesik ba Delta Dili kuak bebeik, tanba impaktu husi drainazen la iha nune’e be hoban hela estarad to kuakba bebeik.

Tuir Manuel Castro katak, kuandu estrada mak drainazen la diak ne’e impaktu be hoban hela iha estrada laran, depois be la halai ba valeta nee’ mak hodi fo impaktu ba estrada sira ohin fui alkatraun aban a’at, tanba be ne’e hoban hela deit.

Atu garante estrada nia kualidade, Manuel Castro dehan, tuir lolos ne’e beach Chose ne’e be mak mak kompnaha sira nahe ba estrada selentru tenki sama dala atus ida to nia metin depois mak fui alkataun ba leten.

Governu tenki koloka project Maneger kada projetu para loron ba loron hare projetu sira mak implementa husi Kompanha sira ne’e atu nune’e emprezario   sira labele malandru ona.

“Ita servisu ba ita nia rai tenki servisu ho responsavilidade para halo dezenvolvimentu ba ita nia rai,”tenik Manuel Castro.Avi
.

Sem comentários:

Publicar um comentário

Nota: só um membro deste blogue pode publicar um comentário.