segunda-feira, 19 de outubro de 2015

CNRT sei altera lei pensaun vitalisia antes 2017

.

Jornal Nacional Diário- 19 de outubro de 2015

Partidu Congresso Nacionál de Reconstrucção Timorense (CNRT), sei altera lei pensaun vitalisia antes tinan 2017, tanba pensaun vitalisia ne’e la kondis ho realidade moris povu Timor Leste nian agora.

Sekertariu Jeral Partidu CNRT, Dionisio Babo informa katak, hanoin ida n’e mosu kedas iha CNRT iha ninia kongresu nasionál 2012, iha diretiva ida rekomenda katak, tenke halo alterasaun ba lei pensaun vitalisia.

“Ida ne’e para labele kria fali buat ida kecemburuan sosial, maibé ita hatene katak, lei ne’e halo iha primeira legistlatura, maibé tuir fali mai ne’e, legistlatura nain rua ne’e, hatete katak, persija duni atu halo alterasaun, i CNRT espera katak, antes eleisaun 2017, alterasaun ne’e tenke halo ona,”katak Dionisio Babo ba jornalista sira iha Palacio Prezidensial Aitarak Laran Dili, Sesta (16/10), hafoin hasoru malu ho Prezidente da Repúblika Taur Matan Ruak.

Dionisio hatutan, tuir informasaun ne’ebé nia rona husi Parlamentu Nasionál katak, agora dadauk sira diskuti ona lei pensaun vitalisia ne’e. ne’eduni Dionisio husu ba públiku, li-liu ba estudante sira ne’ebé oras ne’e dadauk halo hela manifestasaun ne’e atu kalma, konsentra ba estuda, tanba Governu ho Parlamentu Nasionál mós sei esforsa atu halo duni mundansa ba lei pensaun vitalisia ne’e.

“Rekomendasaun ida ne’e, ha’u insiste nafatin ba bankada hanesan Sekertariu Jeral CNRT, Sr. Prezidente Kay Rala Xanana Gusmão mós insisti nafatin, ami husu para, Parlamentu liu husi bankada sira, konsidera lalais ida ne’e hanesan, ajenda importante ida, hodi bele halo alterasaun, tanba nesesita duni atu halo alterasaun ba lei pensaun vitalisia ne’e,”informa Dionisio Babo.

Nia esklarese, orientasaun CNRT rasik mak, tenke haree tuir situasaun no kondisaun real iha Timor Leste, tanba maske iha nasaun hotu ne’e, buat ida ne’ebé hanaran dignifikasaun orgaun titulares Estadu ne’e sepre iha.

Maibé Dionisio afirma, agora tenke halo alterasaun para kondis ho realidade sosial ekonomika povu Timor Leste nia moris.

Nia esplika, atu halo alterasaun ba lei pensaun vitalisia ne’e, la’os hato’o proposta, maske iha bankada balu hato’o proposta, maibé bankada balu husu atu ajenda.


“CNRT sujere para halo ajenda mais rapidu, i ajenda tiha mak ita diskuti, la’os hein hela fali proposta. Lider bankada sira mak tenke tu’ur hamutuk atu ajenda, sei sira latau hanesan prioridade, ida ne’e la’os ajenda, ne’e ita bele ko’alia no proposta bele to’o tiha 10 mós,”katak Dionisio Babo.cos/nes
.

Sem comentários:

Publicar um comentário

Nota: só um membro deste blogue pode publicar um comentário.