segunda-feira, 19 de outubro de 2015

Eis-ministru Agrikultura no Peska mak hanesan responsável ba infrasaun finanseira - auditoria

.

Sapo TL ho Lusa - 19 de outubro de 2015

Eis-ministru Agrikultura no Peska, Mariano Assanami Sabino maka hanesan responsável “eventuál ba infrasaun finanseira” ba iha kontratu nomós pagamentu ho dolár milloens 11 hosi ninia Ministériu desde 2011 to’o 2014, tuir Kámara Kontas timor-oan nian fó sai.

Tuir auditoria ne’ebé halo ba Ministériu Agrikultura no Peska (MAP), iha kazu balun ne’ebé ninia kontratu ba fornesimentu bens no serbisu hala’o ho empreza ne’ebé iha mos ligasaun ho ministru, tanba ne’e maka lakumpri prosedimentu no ladun fó imajen di’ak ba Estadu.

Iha mapa kona-ba “infrasaun finanseira ne’ebé iha” no “apuramentu hosi responsabilidade” ne’ebé fó sai iha relatóriu Kámara Kontas haktuir katak Mariano Sabino maka hanesan responsável ba infrasaun barak, inklui “uza konta bankária hodi depozita reseita no halo mos despeza lahó autorizasaun hosi ministra Finansas”.

Sabino mos “lahalo tuir prosedimentu hosi provizionamentu nian ne’ebé hakerek ona iha lei, liu-liu, bainhira halo konkursu públiku internasionál, ho valór despeza” hosi kontratu hamutuk dolár milloens 9,21 resin.

Mariano Sabino maka halo “pagamentu adiatamentu latuir lei, nomós kontratu ba empreza fonesedora” ho valór dolár milloens 1,36 resin, inklui empreza ida ne’ebé pertense ba ninia kuñadu no ne’ebé rejista iha loron molok nia fó sai kontratu ba.

Alénde ne’e nia mos maka “halo adjudikasaun no halo kontratu ho empreza ida ne’ebé lahatudu garantia ba konkursu nian, hanesan dokumentu importante ba admisaun hosi ninia proposta”, hodi bele manan tenderizasaun ho valór totál dolár rihun 918.

Iha ezersísiu kontraditóriu no tuir karta ida ne’ebé haruka ba tribunál iha 25-jullu tinan ne’e, eis-ministru ladun fó resposta “polítika”, lahatan espesifikamente ba akuzasaun kontra nia tuir relatóriu fó sai, maibé fó de’it esplikasaun tuir prosedimentu ne’ebé iha.

Esplika de’it katak “bainhira sei asumi knar hanesan ministru iha tempu ne’ebá, ha’u lanevolve ka halo intervensaun ba prosedu aprovizionamentu ruma”.
.

Sem comentários:

Publicar um comentário

Nota: só um membro deste blogue pode publicar um comentário.