terça-feira, 13 de outubro de 2015

Governu Sentral La Mete Pagamentu Ba Komunidade Afetadu Projetu ZEESM

.

Timor Post - 13 de outubro de 2015

DILI—Komunidade sira iha Inur Sakato, Postu Administrativu Pante Makasar, Rejiaun Eespesial Administrativu Oe-Cusse Ambeno seidauk simu kompensasaun maske governu foti ona sira nia rai héktares haat (4) hodi harí sentral elétrika.

Governu mós promete ona ba komunidade sira ne’e atu ida-idak loke sira nia konta bankaria (rekening-red), hodi governu bele transfere osan ba iha sira nia konta, maibé to’o agora laiha rejultadu.

Ho problema ne’e, Diretór  Jerál  EDTL, Virgílio F. Guteres hatete, ba projetu eletrisidade iha Sakato la’ós  responsabilidade hosi governu sentral, ida ne’e responsabilidade Reijiaun Espesial Administrativu Oe-Cusse Ambeno.

“Ne’e la’ós  governu sentral nia responsabilidade, governu sentral fó asisténsia  téknika  totalmente ba iha Oe-Cusse, maibé orsamentu tomak harí  sentral ne’e hosi orsamentu autoridade Oe-Cusse ninian, portantu, ida ne’e husu ba iha Autoridade Reijiaun Espesial Administrativu Oe-Cusse maka bele esplika di’ak  liu kona-ba ida ne’e,” nia informa ba Timor Post iha nia servisu fatin Caicoli, Segunda (12/10).

Iha fatin la-hanesan, Portavos Komunidade Afeitada, Agostinho da Costa hatete, komunidade sira ne’ebé maka afeita kona-ba ólio-pezadu  seidauk hetan kompensasaun hosi  governu.

“Projetu eletrisidade ninian, ida ne’e mós kuaje atu remata ona, nune’e husu ba governu sentral tau matan lalais ba maluk sira ne’ebé afeita kona-ba ólio-pezadu  ninian, tanba ema sira ne’e iha ona konta bankaria, maibé seidauk iha pagamentu,” Agostinho informa liuhosi  konferénsia  imprensa ba jornalista sira iha Fundasaun Haburas, Farol, Sesta (09/10).

Nune’e mós Diretór  Redi ba Rai, Roberto Aleixo da Crus hatete, sentru eletrisidade ne’ebé harí ’i iha Inur Sakato, iha ne’eba iha ema nian 10, sira nia rai hamutuk héktares  haat, ne’e maka foti ba harí fatin eletrisidade, maibé to’o agora seidauk iha kompensasaun.

To’o notísia ne’e tun seidauk iha konfirmasaun ho Autoridade Rejiaun Oe-Cusse lideradu eis Primeiru Ministru, Marí Bin Amude Alkatiri. (jos)
.

Sem comentários:

Publicar um comentário

Nota: só um membro deste blogue pode publicar um comentário.