terça-feira, 13 de outubro de 2015

Hafoin Halo Operasaun Infermeira Virna Mate iha HNGV

.

Timor Post - 13 de outubro de 2015

DILI—Familia vitima Virna Ximenes nu’udar mós infermeira iha Óspital Referensia Maliana hakotu nia is iha Hospital Nasional Guido Valadares hafoin halo operasaun sejariana.
           
Informasaun ne’e hato’o hosi familia vitima (Virna) Isabel Monis iha mate uma Bebora sabadu (10/10) katak, vitima nu’udar infermeira iha Óspital Maliana, maibé matebian mai atu partu iha HNGV, nia maluk profesional médiku sira labele salva nia vida hafoin hala’o operasaun sejariana.
           
“Vitima hafoin operasaun muda ba sala ICU kabun bubu hodi hakotu ís, tan ne’e ami haree katak fallansu iha doutor sira halo operasaun ne’e,”Informa Familia vitima Isabel Monis iha mate uma Bebora Sabadu 10/10.
           
Familia vitima ne’e deskonfia dotor sira ladun iha profesionalismu hodi hala’o operasaun, tanba hafoin hala’o operasaun matebian nia kabun bubu fali.
         
 Tanba ne’e, familia sira sei konsentra hela iha prosesu serimonia funebre hafoin bele halo prosesu hasoru HNGV hodi hatan.
           
“Agora ami konsentra ba seremonia funebre lai, depois ami sei lori prosesu ne’e ba oin,hodi husu HNGV nia responsabilidade”hatete Isabel.
           
Relasiona ho kazu ne’e Xefi Departementu Globu Operatoriu, Flavio Brandão haktuir, hanesan xefi departementu hatene iha duni operasaun ba inan feton ida iha dadersan madrugada iha loron Sesta (9/10).
           
“Tuir relatoriu ne’ebé mak hau hetan katak operasaun la’o di’ak iha sala operasaun, depois muda sai ba sala ICU, depois iha tiha sala ICU liu tiha oras rua ou tolu nia laran hodi fila-fali pasiente ne’e mai halo opera dala ida tan” Flavio, haktuir.

Maibé hafoin hala’o tiha segundu operasaun ba pasiente ne’e rasik, ikus mai labele salva infermeira ne’e nia moris hosi nia maluk profesional médiku sira.

  Xefe departementu ne’e konta tuir katak iha operasaun ba infermeira óspital Maliana ne’e hosi ekipa Surijiaun liu-liu médiku opteti genokologia mak halo operasaun.

 “Hau rona informasaun katak, pasiente ne’e hala’o transferensia hosi óspital referensia Maliana atu halo operasaun ba sezariana, ne’e la’o normal tanba bebee bele salva, inan mak la hetan salva depois halo operasaun dala rua” Flavio, haktuir.

Portantu tuir informasaun ne’ebé mak Jornalista rekolla hosi banco de Sangue Nasional (BSN), Xefe Unidade Arsenio José informa katak, hafoin halo operasaun sejariana.

Tuir informasaun katak pasiente infermeira ne’e ran fakar barak, nune’e iha kalan ne’e kedas fo ran pakote 6 no pakote rua iha dader, hamutk pakote 8.(gus)
.

Sem comentários:

Publicar um comentário

Nota: só um membro deste blogue pode publicar um comentário.