quarta-feira, 21 de outubro de 2015

MUTL konsidera PN la reprezenta povu

.

Jornal Nacional Diário - 21 de outubro de 2015

Movimentu Universitariu Timor Leste (MUTL) konsidera Membru Parlementu Nasional (PN) la resprezenta povu, tanba to’o ohin loron PN taka an ba MUTL no la responde ejijensia hodi halo revizaun ba lei pensaun vitalisia.

“Ami sei kontinua hein sira to’o bainhira sira mai hasoru ami tanba se sira lakohi mai hasoru ami hodi nonok, ami konsidera sira ne’e hanesan traisaun ba povo maubere ida ne’e, tanba sira la konsidera povo nia oan sira ne’ebe maka halao asaun pasifiku ida ne’e atu nune’e sira kontinua ignora para loron ida povo ne’e sai atan ba grupu kikoan balun ne’ebe mak la’o hamutuk ho sira,”portavos MUTL , Faustino Soares ba jornalista sira iha kampus sentral UNTL Tersa (20/10) horseik.

Iha oportuniadde ne’e MUTL kontinua ejije ba PN atu iha tempu badak nia laran ne’e hasoru malu ho sira para bele hato’o ejiejnsia sireita ba PN.

Maibe enkuantu PN nafatin taka an ba MUTL maka, MUTL sei mobiliza manifestasaun bo’ot hasoru PN involve povu bai-bain inklui entidades hotu-hotu ne’ebe durante ne’e preokupa ba lei pensaun vitalisia.

“Ami sente katak ami mos jerasaun ba sira nian, tanba saida mak sira lakohi hasoru ami atu kolia? Ami sei kontinua hein sira iha semana ida ne’e nia laran mak sira kontinua lakohi mai hasoru malu ho ami, maka semana oin ami sei unifika ami nia forsa sira ne’e hotu depois ami sei disidi ami nia estratezia ne’e los ona mak ami sei tun,”afirma nia.

Tuir planu MUTL sei tama sai uma komunidade hodi espelika ba komunidade konaba impaktu husi lei pensaun vitalisia ba futuru mai ne.e

“Ami mos iha ona politika ida atu tama uma sai uma hodi esplikasaun ba impaktu husi lei refere iha tempu agora no futuru ne’ebe ami sei halao uluk iha kapital Dili atu nune’e sira bele hatene impaktu husi estabelesementu lei refere. Ne’ebe agora dadauk primeiru faze ami halao sosializasaun liu husi panfletu no segundo faze oras ne’e dadauk ami halao ona koperasaun ho autoridade lokal balu,”dehan nia.

Ativista CPD-RDTL ejije PN altera lei PV

Entretantu iha fatin la hanesan porta-voz ativista Pro Conselho Popular Demokratika Republika Demokratica de Timor-Leste (CPD-RDTL) ejije mos ba ba PN atu halo lalais revizaun ba lei pensaun vitalisia, tanba konsidera lei refere injustisa.

“Ativista Pro-CPD RDTL apoiu Movimentu Universitariu Timor-Leste (MUTL) ne’ebe maka oras ne’e dau-daun hala’o manifestasaun kontra lei Pensaun Vitalisia, tanba pensaun vitalisia ne’e injustisa ne’ebe habokur membru Governu balun deit e ami konsidera lei ne’e hamosu kriminasaun,”deklara porta-voz ativista Pro CPD-RDTL, Gil Ferdes da Costa.

Iha biban ne’e mos nia argumenta mos katak, liu husi Ativista Pro-RDTL iha CPD-RDTL, ami husu ba Governu liu-liu Diresaun Nacional Terras Proprieridades DNTPSC atu buka fatin seluk nune’e sira (CPD-RDTL) bele uza.

“Ami husu Senhor Jaime Xavier no Romão Guterres nian desizaun arbitraria espasu rai no uma Estadu ne’ebe anteriormente utiliza ba Sede CPD-RDTL, governu atraves Dirasaun Nacional Terras Proprieridades i Servico Cadastrais (DNTPSC) atribui tiha ona ba PNTL no husu atu buka fali fatin seluk” tenik nia.

Nia haktuir desizaun ne’ebe governu foti hodi hasai sira husi fatin refere Ativista Pro-RDTL konsidera hanesan abuzu de poder no injustu tanba, espasu rai no uma refere nu’udar sede sentral ba Restaurasaun RDTL ne’ebe CPD-RDTL utiliza desde tempu UNAMET.

Porta voz Gil da Costa mos dehan tan katak, desde CPD-RDTL halao Kooperativas ba Produsaun Agrikula husi tinan 2012 iha Welaluhu-Same, nudar modelu atu hametin Eestadu RDTL nian Soberania ekonómika, maibe V Governu hola fali Rezolusaun injusta husi tinan 2012 no 2014 hodi hasoru CPD-RDTL ne’ebe ho inisiativa diak. Ola/Ves
.

Sem comentários:

Publicar um comentário

Nota: só um membro deste blogue pode publicar um comentário.