quarta-feira, 14 de outubro de 2015

TL-RI implementa ona vistu livre

.
Jornal Nacional Diário - 14 de outubro de 2015

Vise Prezidenti Parlamentu Nasional (PN), Aderito Hugo da Costa hatete Timor Leste ho Republika Indonesia implementa ona vistu livre tamba nasaun rua nee iha kooperasaun bilateral ida nebe diak teb-tebes.

Vise Prezidenti Parlamentu Nasional (PN), Aderito Hugo da Costa, konsidera katak, implementasaun vistu livre ne’e sei lori benefisiu ba TL, maibe husu Imigrasaun tenke halo kotrola maka’as.

“Hau hakarak hateten katak, ne’e diak teb-tebes, tanba ita mos hein hela tanba ita iha estudante rihun mak eskola iha Indonesia wainhira familia ruma vizita mos fasil no hanesan benefisu bot, maibe iha kontestu seluk kontrolu Imigrasaun ne’e tenke serbisu maka’as atu nune’e bele kontrola ema ne’ebe mak tama mai livre no MNEK la bele nonok deit hanesan visa livre ne’ebe mak implementa ho Uniaun Europeia,” afirma Aderito Hugo ba Jornalista sira iha Parlamentu Nasional, Tersa (13/10/2015).

Aderito Hugo dehan, povu tomak pesiza hatene informasaun no tuir lolos Ministriu Negosiu Estranjeiru no Koperasaun la bele tur nonok deit, maibe tenke fahe informasaun ba publiku oinsa bele asesu informasaun kona ba visa livre iha Uniaun Europeia no atu implementa mos entre TL-RI.

“Foin lalais hau halo protesta ba MNEC relasaun ho desizaun visa livre ba Uniaun Europeia, tanba laiha entidade ida halo kampanha informasaun ne’e ba publiku tanba iha kazu balu depois halo tiha visa livre Timor oan sira ba iha Inglatera ema la fo no duni fila tanba sira laiha informasaun,” hatutan Aderito.

Iha fatin hanesan Membru Komisuan B Parlamentu Nasional asuntu Negosiu Estarnjeiru, Cesar Valente de Jesus realsa tan katak, implementa visa livre iha parte ASIA , nia desvantazen mak bot liu.

“Visa Livre entre TL ho Eropa ne’e nia desvantazen nee’ ki’ik, maibe iha ASIA nia desvantazen mak bot liu-liu iha parte seguransa nian, tanba ne’e ami sei bolu Ministru Defeza no Seguransa atu esplika hodi hasa’e volume seguransa nian hodi halo kontrolu ne’ebe mak bele garante sidadaun sira nia movimentu ne’ebe mak legal,” afirma Deputadu Cesar Valente de Jesus. mia
.

Sem comentários:

Publicar um comentário

Nota: só um membro deste blogue pode publicar um comentário.