sexta-feira, 20 de novembro de 2015

Ambulánsia laiha, doutor uza kuda tula moras – PR Taur fó apoiu kuda 2

.

Jornal Nacional Diário - 19 de novembro de 2015

Doutor iha Suku Liurai, Postu Administrativu Turiskai, Munisípiu Manufahi, durante ne’e utiliza komunidade nia kuda hodi tula moras no aimoruk husi Aldeia izoladu sira ba postu saude ne’ebé lokaliza iha Suku liurai, tanba ambulansia laiha.

Doutor Salvador Amaral informa situasaun ne’e, ba Prezidente da Repúblika Taur Matan Ruak, bainhira Xefe Estadu ne’e dialogu ho povu iha Suku Liurai.

“Kuandu pasiente moras ruma, ha’u husu povu sira nia kuda hodi tula aimoruk ba Suku sira ne’ebe dok hanesan Suku Lesuata, no fatuk makere, no dalaruma povu tula moras ho kuda mai postu saúde,” informa doutor Salvador Amaral, ba Prezidente da Repúblika, Kuarta (18/11).

Salvador husu ba Governu atu reforsa tan parteira ida ba Suku refere, tanba nia mesak, difisil atu halo atendementu ba komunidade hotu iha Suku refere, tanba iha Aldeia barak mak kareta motor labele tama to’o iha ne’eba.

“Ha’u iha ne’e mediku ha’u mesak, postu saude iha ne’e, hamrik ona parteira laiha, iha ne’e, feto isin rua barak mak hakat an to’o turiskai ne’eba hodi buka parteira,” husu Salvador.

Salvador husu ba Governu atu reforsa tan parteira ida ba postu saude Suku Liurai ne’e tanba feto isin rua sira mo’e atu halo konsulta ba doutor mane. Hatan ba preokupasaun ne’e, Prezidente da Repúblika Taur Matan Ruak hatete katak, nia se transmiti preokupasaun ne’e, ba Governu hodi bele tau matan lalais.“Parteira ne’e ami aponta hela hodi transmiti ba ministériu saúde,” dehan Taur Matan Ruak.

Iha okaziaun ne’e, Xefe Estadu ne’e agradese ba doutor ne’e, tanba maske husi rai lorosa’e, maibé prontu atu servisu ba povu iha Suku sira ne’ebe izoladu hanesan ne’e.

“Kuda ha’u sei haruka ha’u nia asesor sira atu hola kuda rua atu agora kedas, ida ita bo’ot sa’e, ida lori tula aimoruk,” dehan Taur Matan Ruak.cos

Foto de Presidência da República de Timor-Leste, Facebook.
.

Sem comentários:

Publicar um comentário

Nota: só um membro deste blogue pode publicar um comentário.