quarta-feira, 18 de novembro de 2015

Krizi 2006: Timor-Leste hatudu importánsia hosi unidade - PR

.

António Sampaio, Ajénsia Lusa

Krizi 2006 iha Timor-Leste hatudu importánsia hosi lideransa timor-oan ninia unidade nomós importante atu hametin liu tan serbisu hamutuk, no sai nu’udar lisaun kona-ba oinsá atu hatan ba dezafiu iha tempu oin mai, dehan Prezidente Repúblika, Taur Matan Ruak.

Iha entrevista ba Lusa Taur Matan Ruak, ne’ebé iha tempu ne’ebá sei hanesan xefe Forsa Armada, rejeita katak situasaun ne’e hanesan funu sivil iha Timor-Leste, maibé nia konsidera hanesan oportunidade ba timor-oan sira atu hatene di’ak liu tan no fó koñesimentu ba nasaun seluk.

"Haree ida ne’e hanesan oportunidade ida, no la’os problema ida. Oportunidade atu hatudu ami ne’e hanesan saida, ami ne’e see no saida maka ami bele halo", hateten.

Konsidera katak krizi ne’e mosu tanba “jestaun ladi’ak hosi nasaun”, nomós iha parte seluk mosu tanba lideransa timor-oan nian laiha esperiénsia, maka xefe Estadu konsidera lapermiti atu jere espetativa timor-oan nian.

“Sira ne’ebé halo ida ne’e, laiha nosaun lolos kona-ba saida maka sira halo. Ne’e tanba ladun esperiénsia”, dehan hodi hatutan tan katak maski iha aproveitamentu balun, iha duni rai laran no nasaun seluk, maibé krizi ne’e ultrapasa ona.

“Ami hotu, ikus mai hakarak atu rezolve lalais problema refere no ami rezolve duni, liu hosi apoiu komunidade internasionál nian, liu-liu apoiu hosi Falitil ne’ebé hetan atake. Ami hatudu duni katak ami bele, sira bele fó sira-ninia kontribuisaun”, hateten.

Hanesan krizi iha 2008, bainhira mosu atake kontra Ramos Horta no Xanana Gusmão, hatudu de’it katak timor-oan sira tenke iha unidade maka’as, no tenke luta hamutuk.

“Ami aprende barak hosi krizi 2006. Ami unidu liu tan no hametin liu tan unidade ne’e iha sosiedade timor-oan ninia leet. Foin daudaun mos iha buat balun maka koko ami, maibé ami ultrapasa ona. Sei kontinua iha teste. Importante maka timor-oan sira perepara-aan ba saida maka akontese daudaun no sei akontese”, dehan.

Teste foun maka bainhira halo operasaun bot hodi buka no ka’er eis-komandante rezisténsia Mauk Moruk, ne’ebé ikus mai mate duni hafoin tiru malu ho forsa timor-oan sira.

"Ha’u husu deskulpa bainhira nia mate. Hanesan Prezidente Repúblika ha’u lahatene evita, ha’u lakonsege halo buat barak atu evita ida ne’e. Maibé saida maka ha’u apela, katak ida ne’e maka ikus ona”, dehan.

"Konsolida dame, estabilidade. Tanba importante maka dezenvolve ita-rain ekonomikamente no fó benefísiu ba ita-ninia sidadaun sira, hadia sira-ninia moris, serbisu ba sira-ninia moris di’ak", hateten.

SAPO TL ho Lusa
.

Sem comentários:

Publicar um comentário

Nota: só um membro deste blogue pode publicar um comentário.