quarta-feira, 4 de novembro de 2015

Reuniaun daruak TL-RI konaba fronteira marítima

.

Jornal Nacional Diário - 04 de novembro de 2015

Timor Leste (TL) ho Indonezia, iha loron 29-30 Outubru 2015, halao reúniaun konsulta daruak konabá fronteira marítima, iha Surabaya, Indonezia.

Objetivu husi reúniaun konsulta bá daruak ne’e atu diskuti konabá termu referensia (ToR) no planu traballu bá prosesu delimitasaun fronteira marítima permanente entre Timor-Leste ho Indonezia.

“Reúniaun konsulta ida ne’e hanesan reúniaun bá dalarua. Reúniaun konsulta bá dalarua ne’e hanesan seguimentu bá reúniaun dahuluk ne’ebe halao ona iha loron 18 Setembru 2015, iha Dili, Timor-Leste.

Tuir ajenda ne’ebe iha, Timor-Leste ho Indonezia sei diskute konabá termu referensia no planu trabalhu bá prosesu negosiasaun delimitasaun fronteira maritima permanente entre rai rua ne’e. 

Karik, wainhira remata no parte rua konkorda ona, termu referensia no planu trabalhu ne’e sei sai nudar baze bá parte rua hodi bele hahu prosesu negosiasaun dahuluk konabá delimitasaun fronteira maritima permanente,” informa Sekretariu Jerál Ministiu Negósius Estranjeiru no Kooperasaun (MNEK), Francisco Cepeda, iha komunidade imprensa ne’ebé mak Redasaun Jornal Nacional Diário simu, Segunda (3/11).

Entretantu, iha reúniaun dahuluk ne’ebe hala’o ona iha loron 18 Setembru 2015, iha ediíisiu Ministériu Negósiu Estranjeiru no Koperasaun Timor-Leste, parte rua afirma katak prosesu delimitasaun fronteira marítima entre Timor-Leste ho Indonezia sei bazeia bá direitu internasionál, partikularmente UNCLOS ka Konvensaun Nasoens Unidas konabá Direitu Tasi nian.

Reúniaun konsulta hirak ne’e nu’udar asaun konkreta husi parte rua hodi fó segimentu bá deklarasaun ne’ebé Prezidente Repúblika Indonezia, Joko Widodo no Primeiru-Ministru Timor-Leste, Rui Maria de Araújo, hato’o durante vizita ofisial Primeiru-Ministru bá Jakarta, Indonezia, iha loron 26 Agostu 2015.

Delegasaun Timor-Leste lidera husi Francisco Cepeda, Sekretariu-Jeral Ministériu Negósiu Estranjeiru no Koperasaun Timor-Leste, no kompostu husi ofisiál sira Ministériu Negósiu Estranjeiru no Koperasaun nian, Prezidénsia Repúblika ho Gabinete Fronteira Marítima.*/ixo
.

Sem comentários:

Publicar um comentário

Nota: só um membro deste blogue pode publicar um comentário.