domingo, 6 de dezembro de 2015

PR TAUR SEI LA PROMULGA OJE 2016 – REDUZ ORSAMENTU ZEESM

.

Jornal Nacional Diário

Prezidenti Repúblika (PR) Taur Matan Ruak ameasa sei la promulga Proposta Orsamentu Jeral Estadu (OJE) 2016, kuandu Governu fó nafatin prioridade ba projetu infra-estrutura Zona Espesial Ekonomia Sosial Merkadu (ZEESM) Oe-cusse, no Projetu Kosta Sul.

Taur Matan Ruak dehan, agora dada’uk Parlamentu Nasionál (PN) ho Governu halo ona debate ba OJE 2016.

“Ha’u apela ba Parlamentu Nasionál para hatun osan ba infra-estrutura agora, i tau osan ba edukasaun, saúde, bee no saneamentu no agrikultura, tanba ha’u bele la promulga orsamentu tinan ida ne’e, sé sira kontinua hanesan ne’e,” dehan Taur Matan Ruak ba Jornalista, iha tasi laran parte Karimbala nian, bainhira fila husi Oe-cusse ho roo Naval Falintil Forsa Defeza Timor Leste (F-FDTL) nian, Kuarta (02/12).

Xefi Estadu ne’e ejiji ba Parlamentu atu reduz orsamentu hotu ne’ebé halai ba projetu infraestrutura bo’ot sira ne’e.

“Projetu infra-estrutura ne’e, iklui ZEESM ho Kosta Sul tenki hatun osan, aumenta ba edukasaun, saúde, bee no saneamentu no agrikultura, tanba sira ne’e mak prioridade liu ba povu nia moris,” dehan Xefi Estadu ne’e.

Taur Matan Ruak dehan, nia hakarak Governu fó prioridade liu ba área hat ne’e, (Edukasaun, Saúde, bee no Saneamentu no Agrikultura), tanba Xefi Estadu ne’e ulun fatuk moras ona ho problema ne’ebé afeta ba povu iha Sukus hotu iha Timor laran tomak.

“Ha’u koñese Timor liu kualker sira ida, tanba ne’e mak ha’u hakarak husu ba sira, maibé sé sira la tau enkonsiderasaun ha’u nia pedidu ida ne’e, orsamentu ha’u sei haruka fila fali, ha’u sei la promulga,” Taur Matan Ruak fundamenta.

Xefi Estadu ne’e husu ba Governu atu kria ekilibru ida entre projetu bo’ot, no projetu bázika sira ne’ebé responde populasaun ninia nesesidade.

“Ha’u vizita Suku 370 resin ona, kuandu ha’u esplika, povu dehan, Prezidenti, Aeroportu ne’e, milloens no Portu mós milloens, mas osan laiha fali para atu dada bee ida ba ami,” dehan Taur Matan Ruak.

Alénde ne’e Prezidenti Repúblika konsidera projetu infraestrutura ne’ebé bo’ot ne’e, Governu ladun iha kapasidade atu ezekuta.

“Ha’u espera katak, sira kompriende ha’u nia preokupasaun, tanba ne’e ha’u lori povu hotu ne’ebé ha’u vizita, tanba ha’u reprezenta sira atu hato’o sira nia pedidu ba Governu,” tenik Taur Matan Ruak.

Xefi Estadu ne’e dehan, tinan-tinan Orsamentu Jeral Estadu nian, Prezidenti hein de’it, maibé tinan ida ne’e Prezidenti sei uza kompetensia Prezidenti nian, para salva guarda no interese mais elemetares sidadaun sira nian.cos
.

Sem comentários:

Publicar um comentário

Nota: só um membro deste blogue pode publicar um comentário.