terça-feira, 1 de dezembro de 2015

Xanana harohan bolu matebian – Timor oan matenek rona liu ema liur

.

Jornal Nacional Diário - 01 de dezembro de 2015

Serimonia isar bandeira hodi komemora loron historiku proklamasaun independensia ba dala-40 (28 Novembru 1975-28 Novembru 2015) iha Tasi Tolu, sai momentu ne’ebe halo komunidade ho konvidados sira neon ‘taridu’ oituan, tanba rona Komandante em Xefi das FALINTIL, Kay Rala Xanana Gusmão, hamulak hodi bolu matebian sira ne’ebe fo an ba mate hodi nakfila rai ida ne’e sai nasaun soberanu ida, atu bele tau matan no haraik kbi’it nafatin mai Timor oan sira hotu.

“Matebian rai nain sira, tau matan ba ami, hametin unidade, hametin hahalok ne’ebe diak, hadia ami nia karater, ami la’o fa’an ami nia neon ba ema seluk hodi haketak Timor oan sira, tau matan nafatin ba ami ba,” afirma Xanana Gusmão, bainhira prezide minutu ida hakmatek (um minuto de silençio).

Ministru Planeamento no Investimentu Estratejiku (MPIE) ne’e reafirma katak, Estado Republika Demokratika de Timor-Leste (RDTL) kaer rasik nia distinu to’o ona tinan 13 ho balun, maibe tinan hirak liu ba ema barak mate buka ukun an.

“Ita hakru’uk ba sira hodi soe hahalok at ne’ebe ohin loron bele tenta hela ita. Ita harohan ba sira atu hametin unidade nasional, tanba ema at husi liur sei buka sobu ita nudar povu, Timor oan matenek barak fo tilun liu ba ita nia advensario sira husi liur do que hanoin atu responsabilidade ba nasaun no ba povu,” hateten Xanana Gusmão.

Seremonia komemorasaun loron Proklamasaun Inependensia ne’e prezide rasik husi lider karismatiku Kay Rala Xanana Gusmão, ne’ebe antes serimonia hahuu, halo uluk pasa revista ba formatura ne’ebe akompnaha husi inspektur seremonia Capitão Infantaria Francisco Pinto.

Hafoin pasa revista formatura, korpu isar bandeira ne’ebe mak responsabiliza husi estudante sira akompanha mos husi membru Falintil-Forsa Defeza Timor-Leste (F-FDTL) hahuu tama ba kampo hasa’e bandeira.

Korpu isar bandeira tama ba kampu no marsa ba simu bendeira nasional husi eis Primeiru Ministru Kay Rala Xanana Gusmão, durante minutu lima nia laran kesi bendeira ne’ebe mak tane hanesan osan mean no dada sa’e bendeira akompanha kedas ho Hino Nasional Patria-Patria husi koru estudante São Pedro.

Iha momentu ida ne’e mos le diskursu Prezidente Republika Timor-Leste, Taur Matan Ruak husi Sekretaria Estado Artes no Kultura, Isabel Ximenes.

Komemorasaun proklamasaun unilateral 28 Novembro ne’e remata, formatura kompostu husi F-FDTL, PNTL, Bombeiros, Seguransa Civil, Guarda Municipiu Dili, Moradores, Uniaun Eskuteiro TL, inklui estudante sira husi universitario UNPAZ, UNDIL, DIT no UNITAL. Nune’e mos estudante sekundaria sira tantu husi eskola sekundaria Canossa, São Miguel, São Pedro no mos eskola secundaria publika sira seluk marsa hodi ba komprementa partisipantes sira.

Maske loron manas hanas no kosar metan sulin, maibe povu doben Timor-Leste lahakiduk hodi asiste seremonia loron istriku ne’e ho antosiasmu, tanba ho neon ida katak loron inportante selebra iha tinan ida dala ida. Seremonia ne’e komesa iha dadersan tuku 09:00 Otl no remata tuku 10:00 Otl, durante seremonia ne’e hahu la’o ho diak, tanba hetan seguransa masimu husi PN no F-FDTL.

Duni jornalista ba-mai

Komisaun Organizadora (KO) ba seremonia komemorasaun loron proklamasaun indpendensia 28 Novembru 2015, ne’ebe mak organiza husi Ministeriu Administrasaun Estatal (MAE) duni jornalista tantu husi media imprensa ho elektronika ba mai.

Antes seremonia hahu komisaun organizadora aviza husi mikro katak, jornalista sira la bele halo movimentu ba mai no mos kuandu atu hasai imagem bele hambrik dok, se lae bele interope seremonia.

Ho ida ne’e, jornalista sira la satisfeito ho fatin ne’ebe mak prepara husi komisaun organizadora ne’ebe mak dok tebes husi partisipantes sira.

Tanba kumpri regra, jornalista hirak ne’e mos halo tuir deit saida mak komisaun organizadora sira dehan, maibe iha jornalista balun la satisfeito nafatin hodi ba koalia ho Vise Ministru MAE, Tomas Cabral kona ba fatin.

Lakleur Vise Ministru Tomas Cabral bolu tiha jornalista sira ne’ebe mak foti imagem no fotografia hodi ba besik iha fatin hasa’e bandeira nian, maibe lakleur deit aviza fali ona husi protokolu Anito Matos katak husu komprensaun Jornalista sira atu hamamuk fatin ne’ebe mak sira okupa, tanba taka netik partisipantes sira.

Ho ida ne’e, Jornalista ida husi Suara Timor Lorosa’e (STL) News, João Anibal Almeida, dehan katak, lolos ne’e komisaun tenke prepara ketak fatin ba jornalista sira, maibe tenke besik ho fatin hasa’e bandeira, tanba sira uja kamera bele foti imagen.

“Lolos ne’e komisaun tenke prepara fatin ketak ba Jornalista sira labele duni ami ba mai hanesan ne’e, seremonia ne’e inportante ne’ebe ami presija atu halo kobertura, ne’e maka notisia,” dehan Jornalista Almeida bainhira koalia hela ho Media Office MAE nian iha fatin seremonia.

Iha fatin hanesan, Fotografer Acacio husi Jornal Timor Post mos kestiona katak, nia labele hambrik dok para hasai foto, tanba ne’e maka presija fatin ne’ebe diak hodi hasai foto.

“Lolos ne’e ami nia fatin iha ona, bai-bain seremonia bot sira ema prepara kedas ona fatin, ami mos hatene katak seremonia sira hanesan ne’e lamerese atu la’o ba mai. Se ami nia fatin tau dok oinsa maka bele hasai foto ne’ebe diak no kualidade,” dehan Acacio. mia
.

Sem comentários:

Publicar um comentário

Nota: só um membro deste blogue pode publicar um comentário.