segunda-feira, 18 de janeiro de 2016

PR Taur preokupa kualidade Edukasaun iha TL

.
Foto de Presidência da República de Timor-Leste - Facebook
Jornal Nacional Diário - 18 de janeiro de 2016

Prezidente Republika (PR), Taur Matan Ruak preokupa ba kualidade edukasaun iha rai laran ,tan nee xefi estadu nee bolu urjenti ministru edukasaun iha sesta feira (15/01) hodi fo briefing konaba problema edukasaun iha timor laran tomak.

“Prezidente da Repúblika mak bolu ha’u nu’udar Ministru Edukasaun, mai atu Prezidente fó mós ninia hano’in kona-ba problemas edukasaun iha teritoriu laran tomak, no preokupasaun Prezidente nian mós kona-ba futuru nasaun ne’ebé mak rekursus humanus ne’e fator determinante atu bele nafatin asegura kontinuidade nasaun,” informa Ministro Cordenador asuntu sosiais e Ministru Eeukasaun Antonio da Conceição ba jornalista sira hafoin hasoru malu ho Presidente Republika.

Antonio da Conceição haktuir, iha sorumutu ne’e mós, Prezidente Repúblika husu atu fó nafatin importansia ba edukasaun nia servisu hotu, atu bele halo mellor planeamentu determinasaun prioridades hodi nune’e bele haree didi’ak edukasaun no asegura ninia kualidade.

“Prezidente Repúblika mós husu atu ami nafatin tenke tau matan atu haree mós ba kualidade da edukasaun, li-liu preparasaun ba profesores aban bairua ninian, ne’ebé mak ita nia rai ne’e, nesesidades profesores maka’as tebes atu bele nafatin asegura edukasaun iha Timor Leste,” katak Antonio da Conceição.

Xefe Estadu mós husu ba Ministru Edukasaun atu haree nafatin no asegura edukasaun iha lian portugues ninian, tanba lian portugues importante tebes.

Taur Matan Ruak husu ba Ministru Edukasaun ne’e atu haree didi’ak problema sira ne’e, tanba Xefe Estadu ne’e mós hatene katak, rekursu ne’ebé mak disponivel ho prioridade nasaun ninian, sertamente labele tau buat hotu ba edukasaun, maibé edukasaun tenke hetan atensaun maka’as husi servisu Governu nian.

Kestaun ne’ebé mak agora dada’uk Antonio da Conceição tau hanesan importansia mak, kestaun jestaun institusionál, atu bele mellora jestaun Ministériu Edukasaun, relasiona ho funsionamentu edukasaun iha munisipiu tomak.

Nia hatuir, durante ne’e funsionárius ne’ebé bo’ot liu mak iha Ministériu Edukasaun hamutuk 18 mill.

“ Ha’u nia preokupasaun, prioridade sei tau ba ida ne’e, atu haree kona-ba jestaun do ministériu,” relata Antonio da Conceição.

Eis Ministru Comreciu no Industria nee dehan, agora dada’uk ne’e mós nia hanoin ona atu hahú halo ona projesaun ida kona-ba nesesidade no númeru profesores ne’ebé mak persija atu bele substitui profesores sira ne’ebé hala’o hela servisu ne’ebé ligadu ba iha kooperasaun.

Nia esklarese, dada’uk ne’e mós Ministériu Edukasaun halo hela levantamentu dadus kona-ba infraestrutura ne’ebé mak persija atu hadi’a, tanba kada tinan númeru alunus ne’ebé mak atu tama fali ba edukasaun, implika aumentu sala eskola.

“Tanba ida ne’e mak, prioridade ne’ebé mak ha’u tau atu ami hahú servisu ho orsamentu 2016 nian,” dehan Antonio da Conceição.cos
.

Sem comentários:

Publicar um comentário

Nota: só um membro deste blogue pode publicar um comentário.