quinta-feira, 31 de março de 2016

Edifisiu Foun Ministeriu Finansas Hahu At

.

Timor Post - 31 de março de 2016

DILI—Edifísiu foun Ministériu Finansas (MF) ne’ebé governu harii iha Aitarak-Laran Díli ho osan boot no inagura ona iha tinan kotuk maibé governu seidauk utiliza edifísiu ne’e. Edifísiu refere komesa át dau-daun.

Prosesu inísiu  ba konstrusaun edifísiu foun Ministériu Finansas hahú iha loron 25 Janeiru 2012. Iha loron ne’e kedas, Eis Ministra Finansas Emilia Pires ne’ebé akompaña hosi nia Eis Diretora Serbisu Korporativus atuál Ministra Finansas Santina Cardoso, asina akordu ho PT-PP ne’ebé reprezenta hosi Lukman Hidayat. Totál orsamentu hosi harii edifísiu ne’e hamutuk millaun $27 resin.

Bazeia ba observasaun jornalsta Timor Post nian iha edifísiu foun Ministériu Finansas (MF) iha Aitarak-Laran, Kuarta (30/03), nota katak iha uma nia plafon iha laran no liur triplex kuak maka’as. Aleinde ne’e, iha mós parede lolon sira komesa hatudu ona sinál risku ou nakfera.

Bainhira tenta atu hasai foto ba uma nia plafon ne’ebé maka kuak ka hetan estragus, parte seguransa Gardamor bandu atu labele foti imajen tanba dehan katak uma ne’e sei iha konstrusaun nia laran.

Entretantu, jornalista Timor Post dadalia ho pesoal seguransa Gardamor ne’e haktuir, agora dau-daun malae sira foin maka hatama materiál hosi rai liur mai, tanba ne’e maka agora dau-daun sira (malae) serbisu hela.
Nia dehan katak kompañia rua maka ka’er serbisu iha edifísiu MF—ida hosi nasaun Indonézia no ida seluk hosi nasaun Portugal.

Iha parte seluk, Diretór Organizasaun Naun Governamental (ONG) Luta Hamutuk, Mericio Akara sente triste oituan, tanba uma ne’e gastu osan boot hodi hola fasilidade sira modernu maibé to’o agora uma ne’e seidauk uza.

“Ita nia edifísiu foun Ministériu Finanas (MF) ne’e ita hotu diskontente. Loloos, planu inísiu ne’e atu fó fasilidade modernu atu moderniza sistema, maibé depois prosesu ne’e ita akompaña dinámiku ne’e tún sa’e to’o agora la uza tan. Tan ne’e, ita triste tanba ita la uza didi’ak ita nia investimentu,” haktuir Akara ba jornalista sira iha Palásiu Governu, Kuarta (30/03).

Nia hatutan iha prosesu nia laran la hatene iha manutensaun ka lae. Kondisaun fizikamente hahú iha problema, tanba ne’e tenke husu fila fali ba kontratu antes ne’e ho kompañia oinsá—kompañia maka tenke hadi’a fila fali ka ou governu maka atu hadi’a fali.

“Buat sira ne’e hotu kuandu ita la kuidadu didi’ak maka ami nia konkluzaun maka ita gasta de’it osan. Tan ne’e, ita husu de’it kontratu ne’e oinsá, responsabilidade sei iha kompañia maka atu hadi’a ou iha governu. Sé iha governu tenke hasai tan osan,” Akara informa.

PN Lamenta

Membru Parlamentu Nasionál (PN) hosi bankada CNRT, deputadu Arão Noe lamenta tebes ho edifísiu foun Ministériu Finansas (MF) nian ne’ebé to’o agora seidauk utilizadu.

Tuir Arão katak edifísiu ne’e ninia fizikamente hotu ona, maibé nia problema agora maka instalasaun iha edifísiu ne’e nia laran maka seidauk kompletu liu-liu IT, Internet no buat seluk tan.
Nia hatutan edifísiu ne’ebá ne’e funsiona ba sentrál Ministériu Finansas nian ne’ebé parte hotu-hotu sentralizadu iha ne’ebá, tanba ne’e maka presiza instalasaun ida ke di’ak.

“Problema ida mós ita lamenta tanba prosesu ne’e nunka mais hotu de’it. Ha’u hein katak sé bele konklui tiha molok tinan 2016 ne’e Ministériu Finansas bele uza ona para bele sai hanesan sentru atendimentu ida ba públiku,” nia informa ba jornalista sira iha PN, Kuarta (30/3).

Instala Data Center

Enkuantu, komapaña rua hosi Indonezía ho Portugal komesa ona hala’o instalasaun Data Center iha edifisiu Ministériu Finansas (MF) foun, Aitarak-Laran.

Tuir pesoal seguransa hosi Gardamor Security dehan, iha ona kompañia rua maka hala’o hela serbisu instalasaun data Center ba edifisiu MF foun nian ne’e.

“Ami seidauk haree funsionáriu ruma maka hala’o ona serbisu iha ne’e, maibé kompañia rua hamutuk ho tékniku balun maka hala’o hela serbisu iha laran,” dehan pesoál Seguransa ne’e ba Timor Post iha Aitarak-Laran, Kuarta (30/3).

Nia hatutan kona-ba edifisiu komesa át ne’e la loos ida, tanba plafon ho parede (tembok) ne’ebé maka át ne’e tanba traballadór sira maka halo kuak hodi bele monta fiu ba dada ba laran hodi instala edifisiu foun ne’e nia laran.

Maibé, jornalista Timor Post husu atu halo observasaun ba edifísiu laran parte seguransa ne’e kontaktu fali ba funsionáriu tékniku ida hosi laran sai hasoru jornalista hodi dehan, sé hakarak halo observasaun ba edifisiu ne’e tenki husu lisensa hosi parte Ministériu maka bele.

“Ami labele fó tama ita boot sira tanba uluk Televizaun Timor-Leste (TVTL) mai tama de’it foti notísia Vise Ministru mai ko’alia ho ami primeiru no ikus ona jornalista sira tama ba laran laiha autorizasaun hosi Ministeriu, sé ami maka fó tama ami maka sei sai hosi serbisu,” funsionáriu tékniku ne’e haktuir.

Tuir observasaun Timor Post nian nota katak iha duni movimentu kareta tama sai iha edifisiu foun Ministeriu Finansa ne’e nian hodi tula sasán serbisu nian. (gus/jos/way)
.

Sem comentários:

Publicar um comentário

Nota: só um membro deste blogue pode publicar um comentário.