terça-feira, 29 de março de 2016

Kestiona karta divorsiu, CNRT konsidera PD laiha memoria institusional

.

Jornal Nacional Diário - 29 de março de 2016

Prezidenti Komisaun Juridiku partidu CNRT atual Vise Prezidenti Parlamentu Nasional (PN), Aderito da Costa Hugo, konsidera Partidu Demokratiku (PD) la iha memoria institusional, tanba kestiona karta divorsiu ne’ebe mak CNRT haruka.

“PD kestiona karta ne’e mai husi se? Ne’e mak problema, hau triste tebes, partidu seluk mak halo hanesan ne’e karik, mas CNRT lae. Kestiona substansia husi desizaun ne’e hau bele imagina katak sira laiha memoria institusional, iha tinan 9 nia laran halo aliansa ho CNRT laaproveita netik buat ruma atu aprende, dialogu ba asuntu saida atu loke fali rekord sira nian tinan sia nia laran, mais desizaun ne’e final ona, tanba desizaun ne’e foti liu husi kuadrus partidu nian, laiha partidu ida ema ida mak foti desizaun, hau hein katak katak partidu sira seluk funsiona hanesan ne’e, hau tauk mak sira seluk lafunsiona hanesan CNRT, ne’ebe kestiona fali ema nia desizaun ne’ebe uma mekanismu internal partidu nian hodi hateten katak keta karta ne’e mai husi ema seluk karik,” esplika Aderito Hugo hodi responde jornalista iha Akademia PNTL, Comoro-Dili, Segunda (28/03/2016).

Atual vise Prezidenti PN ne’e klarifika katak, CNRT hanesan partidu ida bot toma responsabilidade tomak konfiansa povu nian desde iha tinan 2007 to’o agora iha responsabildade atu tau ba dezenvolvimentu nasional no interese povu nian.

“CNRT loke odamatan ba PD nian desde kedas tinan sia nia laran ona hodi PD halo aleadu kontinua aleadu iha AMP nia tempu tinan lima, maske dezafius oi-oin no pratika oi-oin husi PD nian, kontinua tan komprimisu foun iha tinan 2012, hanesan portidu mais votadu, CNRT nafatin hetan konfiansa, se hakarak dialogu bele atu nune’e loke fali rekor sira durante ne’e,” dehan Aderito.

Prezidente Partidu Demokratiku, Adriano do Nascimento antes ne’e dehan, PD simu ona karta husi CNRT ne’ebe dehan lainklui ona PD iha Bloku Koligasaun, nune’e mos parta PD nian mos responde fali ona karta ne’e.

“Ami simu ona karte husi CNRT nian dehan sira lainklui ona ami iha Bloku nia laran, ami mos haruka fali ona karta ida ba sira hodi responde karta sira nian, ami iha posivel atu hasoru malu ho Prezidente CNRT, Maun Xanana Gusmão, mais lakoalia deit sobre karta ne’e, mais ho asuntu inportante sira seluk, tanba antes ne’e ami hasoru ona Primeiru Ministru, Rui M. Araujo, Prezidente Republika, Taur Matan Ruak,” dehan Adriano.

Karta ne’ebe mak CNRT haruka ba PD iha Sesta (11/03/2016), ho nia kontiudu, hasai formalmente PD husi Bloku koligasaun, tanba konsidera PD durante ne’e laobedese ona ba komprimisiu bloku nian. mia
.

Sem comentários:

Publicar um comentário

Nota: só um membro deste blogue pode publicar um comentário.