quinta-feira, 31 de março de 2016

PD KONKORDA HO DIVORSIU HO CNRT

.

Timor Post - 31 de março de 2016

DILI—Partidu Demokrátiku (PD) haruka ona karta resposta ba Partídu CNRT (Congresso Nacional da Reconstrução de Timor) iha loron 22 Marsu 2016 katak PD konkorda divórsiu ho CNRT.

“Sira (PD) nia karta ne’e hatete , primeiru dehan simu katak konkorda ho desizaun ne’ebé CNRT foti, depois opsaun ikus maka hakarak diálogu,” membru bankada CNRT, deputadu Arão Noe de Jesus informa ba jornalista sira iha Parlamentu Nasionál (PN), Kuarta (30/3).

Nia hatutan diálogu ne’e sira (PD) hakarak diálogu ho prezidenti partidu la’os ho partidu. Tanba sira (PD) nia pedidu ne’e ba prezidenti atu diálogu ho sira hosi Komisaun Polítika Nasionál.

“Agora ida ne’e buat seluk ida. Agora, sé husu para diálogu  ho partidu entaun bele halo diálogu ho partidu. Maibé, sé husu ba prezidenti, ne’e prezidenti partidu nia kompeténsia para halo ka la’e diálogu ne’e,” Vise Prezidenti Komisaun A PN ne’e esplika.

Iha fatin hanesan, Deputadu Duarte Nunes, nu’udar mós Segundu Vise Sekretáriu Jerál Partidu CNRT reforsa tan katak karta PD nian ne’ebé CNRT simu ona ne’e, sira (PD) husu atu halo diálogu ho Prezidenti Partidu.

Nia dehan katak ba dau-daun ne’e seidauk iha diálogu entre PD ho CNRT tanba Prezidenti Partidu foin fila hosi rai liur.

“Prezidenti foin to’o  horsehik (horibainrua-red). Keta sira diálogu ona iha fatin ruma karik ami seidauk hatene. Ne’ebe, ami hein de’it keta iha diálogu ona horikalan karik, orsida karik depois maka ita haree nia rezultadu diálogu ne’e,” Nunes informa ba jornalista sira iha Parlamentu Nasionál (PN), Kuarta (30/3).

Enkuantu, membru bankada Partidu Demokrátiku (PD), Deputadu Virgílio Hornai hatete , kontiudu karta ne’ebé PD intrega ba CNRT maka atu husu diálogu para bele inteira malu.

“Ha’u hanoin resposta hosi PD nian ba iha karta ne’ebé haruka hosi partidu CNRT, haruka tiha ba ona. Nafatin katak PD ninia karakter maka buat ida kualker problema, kualker dezentendimentu ruma ne’e tenkeser liu hosi diálogu,” Virgílio informa ba jornalista sira iha Parlamentu Nasionál, Kuarta horsehik. (jos)
.

Sem comentários:

Publicar um comentário

Nota: só um membro deste blogue pode publicar um comentário.