quinta-feira, 31 de março de 2016

Taur Trauma Xanana Devolve Medalla

.
Foto: Presidência da República de Timor-Leste
Timor Post - 31 de março de 2016

MAUBARA—Prezidente Repúblika (PR), Taur Matan Ruak, hatete, trauma bainhira eis Komandante da Luta Libertasaun Nasionál, Kay Rala Xanana Gusmão entrega hikas medalla ordem Kollar hosi estadu.

“Horibainhira maun Xanana entrega nia medalla ha’u trauma loos imi entrega fali imi nian ne’e...! Maibé medalla ne’e ita nia oan sira dehan laiha folin,” Prezidente, Taur Matan Ruak hatete  liu hosi diálogu komunitária iha suku Viviquini, postu administrativu Maubara, munisipiu Likisa, Tersa, (29/03) bainhira xefe estadu hato’o problema kona-ba veteranus nian sobre veteranus balun ne’ebé simu pensaun no balun simu de’it medalla rekoinesimentu.

Xefe estadu hatete , lei ba veteranus nian ne’e governu mak halo tanba ne’e banhira lei ne’e sei vigor mak ema hotu tenki kumri lei refere.

“Lei ne’e halo iha primeiru governu konstitusional, agora ne’e ita implementa lei,”dehan PR Taur.
Prezidente hatete , problema veteranus ne’e problema nasionál tanba ne’e veteranus sira mak tenki hamutuk hodi rezolve problema sira ne’e.

Durante diálogu komunitária, veteranus sira hato’o kona-ba problema veteranus nian liu-liu lei ne’ebé mak regula veteranus sira hodi hetan pensaun veteranus nian.

Antonio Oliveira Moniz hanesan veteranu husu ba xefe estadu oinsá  mak bele kontrola osan veteranus nian tanba dala barak veteranus sira simu tiha osan gasta saugati de’it.

Estadu presija akompaña gastus sira ne’e hodi nune’e bele investe hikas iha area seluk ne’ebé mak bele sustenta fali estadu no veteranus sira iha futuru.

“Estadu ladun kontrola ba osan sira ne’ebé mak lakon ba veteranus sira tanba osan veteranus sira ne’e la produtivu,”dehan nia.

Nia mós husu ba governu atu bele hadi’ak sistema sira hodi nune’e bele tau matan ba veteranus hotu ho di’ak.(dgx)
.

Sem comentários:

Publicar um comentário

Nota: só um membro deste blogue pode publicar um comentário.