sexta-feira, 1 de julho de 2016

Nomeia ona prezidente komisaun konsiliasaun fronteira Timor-Leste-Austrália

.

Diplomata dinamarkés Peter Taksoe-Jensen, eis-sekretáriu-jerál adjuntu Nasoins Unidas nian ba asuntu jurídiku hetan nomeasaun hanesan prezidente Komisaun Konsiliasaun ne’ebé tenke hetan entendimentu ida kona-ba Fronteira Marítima entre Timor-Leste no Austrália.

Governu timoroan konfirma horisehik iha komunikadu katak atuál embaixadór dinamarkés iha India eleitu hodi prezide komisaun hosi membru haat komisaun nian ne’ebé hetan nomeasaun hosi Timor-Leste no Austrália (rua ba kada).

"Mediadór sira ne’e hanesan peritu iha Direitu Internasionál no independente. Nomeasaun Prezidente nian permite atu prosesu konsiliasaun ne’e bele adianta ba etapa tuir mai - reuniaun dahuluk hosi diskusaun prosesu no prosedimentu sira ", esplika nota badak Governu nian.

Timor-Leste hili nia reprezentante sira mak alemaun Rudiger Wolfrum, profesór direitu internasionál hosi Universidade de Heildeberg no juís horikedas 1996 iha Tribunál Internasionál ba Lei Tasi nian (ne’ebé nia prezide entre 2005 no 2008) no Abdul Koroma, hosi Serra Leoa, juís iha Tribunál Penál Internasionál entre 1994 no 2012.

Iha nia parte Austrália, nomeia australiana Rosalie P Balkin, eis-sekretária-jerál adjunta iha Organizasaun Marítima Internasionál no profesora universidade sira iha Austrália, Áfrika Súl no Reinu Unidu no mós Donald Malcolm McRae, jurista kanadianu espesialista iha oseanu no direitu internasionál.

Identidade membru haat komisaun nian foin fó sai horisehik maski nomeasaun ne’e konklui tiha ona iha loron 02 maiu, iha lorono ikus prazu nian - iha semana hirak nia laran Timor-Leste halo ida ne’e - Austrália nomeia sira-nia mediadór na’in rua.

Hanoin hikas katak iha loron 11 abril Timor-Leste dezenkadeia Prosedimentu Konsiliasaun Obrigatória (PCO) iha Nasoins Unidas tanba konsidera katak maski iha akordu temporáriu atu fahe rekursu Tasi Timór kontinua laiha fronteira permanente entre nasaun rua ne’e.

Dili sustenta katak faktu Austrália retira hosi prosedimentu rezolusaun internasionál limita " meiu Timor-Leste nian hodi kumpre nia direitu iha direitu internasionál".

Mediadór haat ne’ebé nasaun rua ne’e nomeia hamutuk ho dalima ne’ebé hili entre sira, komisaun konsiliasaun ne’ebé sei rona pozisaun kada Estadzu no, karik laiha akordu, sei aprezenta ba sekretáriu-jerál ONU nian relatóriu ida hodi rekomenda apoiu iha rezolusaun ne’e.

Kamberra ho Dili iha obrigasaun atu negosia ho “boa-fé”, bazeia ba relatóriu komisaun nian.

Konsiliasaun obrigatória hanesan prosesu ida ne’ebé prevee iha Konvensaun Nasoins Unidas kona-ba Direitu Tasi nian (CNDUM) no obriga Austrália atu partisipa iha prosesu formál ne’ebé kondús hosi painel independente peritu sira ne’ebé hanaran "komisaun konsiliasaun nian".

Prosedimentu ne’e bele uza iha kazu sira iha ne’ebé parte sira lahetan akordu ka Estadu ida foti desizaun atu esklui jurisdisaun instituisaun internasionál ne’ebé dedika hodi media konflitu kona-ba fronteira marítima.

SAPO TL ho Lusa
.

Sem comentários:

Publicar um comentário

Nota: só um membro deste blogue pode publicar um comentário.