quarta-feira, 20 de julho de 2016

SOSIEDADE SIVIL HUSU PR TAUR VETO OR US$ 390,7 MILLOENS

.

Jornal Nacional Diário

Sosiedade Sivil sira husu ba Prezidente  Republika (PR), Taur Matan Ruak, atu veto tiha Orsamentu Retifikativu (OR) ho montante US$ 390,7 milloens, ne’ebe aprova ona ho unanimidade husi Parlamentu Nasional.

“La’o Hamutuk sujere  ba PR atu  veto  OR 2016 atu  bele salva sustentabilidade  fiskal, sustentabilidade fundu petroliferu,  bele  salva futuru jerasaun sira liu husi  la gasta osan arbiru,”esplika peskizador La’o Hamutuk, Juvinal Dias ba jornalista  iha nia kna’ar fatin Bebora Dili, Segunda (18/07).

Tuir Juvinal Dias,   OR ne’e la’os maioria ba dívidas, maior parte ba  projetu infraestrutura hanesan Supply base ho Portu Tibar inklui  drainazen  iha Dili ne’e.

“Ponto de vista Sosiedade Sivil maka ami hanoin la nesesariu  atu  iha tinan ida ne’e iha OR,”hateten Juvinal Dias.

 La nesesariu tuir Juvinal Dias katak, Portu Tibar, lolos ne’e Governu tenki preve ida ne’e iha orsamentu original  tinan 2016 antes, tanba sira halo predisaun antes, maibe sira finji lakohi tau.

“Tanbasa maka ami dehan OR  labele iha tanba  iha mos projetu supply base, projetu supply base nian kontratu Tribunal la fo vistu,  ita  agora seidauk iha follow up husi Tribunal de Contas,”dehan Juvinal Dias.

 Juvinal Dias hatutan, kompañia Koreana Hyundai rasik  sira sai ona husi kontratu ida  ne’e, signifika katak,  la iha kontratu ba kompañia ida ne’ebe maka manan kontratu, entaun  la iha razaun tau OR ba  projetu supply base, impossivel ba Governu atu halo tenderizasaun lalais liu ba projetu supply base.

“Ami hanoin katak, ladun lejitimu  atu halo tenderizasaun  ne’ebe maka  lalais liu dentru fulan  ida ne’e nia laran,  depois  implementa lalais  iha tinan ida ne’e nia laran. Se Governu seriu ba implementasaun projetu supply base,  sira tenki halo re-avaliasaun ba kustu projetu, benefisiu projetu,   wainhira sira serteza kuandu projetu ne’e fo benefiu duni, entaun   orsamentu  bele aprova  iha tinan 2017 nian. Infelismente projetu sira ne’e la iha analiza sosial,  la iha analiza ekonomia no ambiental  ne’ebe klean,   entaun ami nafatin duvida projetu ne’e fo benefisiu,” hateten Juvinal Dias.

Nia hatutan, maske polemika politika bele akontese  maibe  ne’e maka dehan  valor  demokrasia.

 “Importante maka ita tenki salva  interese povu Timor Leste,  la’os interese partidaria nian ka grupu ida nian ba eleisaun tinan 2017 mai,”dehan Juvinal Dias.

Juvinal Dias afirma, kona ba Kompañia Hyundai retira husi projetu supply base, Tasi Mane, tanba  projetu ne’e laiha serteza ba kontratu.

 “Kompanha ida labele gasta sira nia tempu  sira nia enerjia ba projetu ne’ebe maka la klaru, kompanha nia objetivu maka buka osan, la’os mai hein, se sira hein deit iha  ne’e ba tinan ida, sira lakon rekursu,”esplika Peskizador La’o Hamutuk, Juvinal Dias.

Juvinal hateten, buat ne’e akontese tanba  Estadu  nia planeamentu ba projetu supply base ne’e komplikadu, sira la honestu ba publiku, sira inventa dadus  kustu bo’ot liu,     sira koko atu subar husi publiku  la transparante,    depois  sira asina kontratu nein media ida hatene.

“Taka ba publiku,  sira iha intensaun ne’ebe maka ladiak ba projetu  ida ne’e. Depois sira involve kompañia ida ne’ebe iha kazu mos, kazu ba korupsaun lubuk  iha Korea mai halo fali projetu ida ne’e,” hateten Juvinal Dias.

Juvinal Dias dehan, tuir  La’o Hamutuk nia opiniaun, bainhira  kuandu kompañia sai ona husi kontratu ba projetu supply base  ne’e,  diak liu labele tau osan tan.

Iha parte seluk, Diretora  Interina  Forum  Tau  Matan  (FTM)  Zelia Fernandes konsidera, orsamentu ne’ebé mak  tinan-tinan  Parlamentu Nasional  (PN)  aprova  ho  montante  bo’ot ne’e,  balun  tama  ba  ministru  no  sekretariu  Estadu  sira  nia  bolsu, tamba  ne’e mak mosu dividas.

 “Ha’u  haree ezekusaun orsamentu kada tinan fraku tebes  iha  jestaun, tamba  maioria  ezekuta  osan  la  tuir  planu  ne’ebé  mak  iha  no  osan  hirak  ne’e  ba  ema  balun  nia  bolsu  de’it, hodi  hariku  an depois Estadu mak selu fali,”hatete Zelia  Fernandes.

Tuir nia, tenki halo investigasaun klean ba membrus  Governu, hodi hatene tanba sa mak dividas ne’e iha hela deit, nune’e  povu  bele  hatene.

Nia mos konkorda ho eis Primeiru Ministru atual sekretariu  Jeral  Partidu  FRETILIN  Mari  Alkatiri katak, wainhira  hala’o  investigasaun ba  membru   ho  sekretariu  Estadu  sira  mak  iha   sala  ruma  tenki  prosesa  tuir  justisa  ne’ebé  mak  iha  katak,  sala  tenki  ba  toba  iha  hotel  Becora, tamba  osan  ne’e  povu  nian.

Nia akresenta, iha  tinan  ida  ne’e  total  orsamentu  ho montante  $1.5  bilioens  ne’ebé  aumenta  tan  ho  orsamentu  retifikativu  konta  dehan  katak, hamutuk  $1.9  bilhoes  ne’ebé  husi   orsamentu  ne’e  konta  sei  laiha  dividas, maibé  realidade  iha  dividas nafatin.

Nia mos sujere ba  ministerio  sira  katak,  wainhira  halo  planu  tenki  tuir  kapasidade  ne’ebé  mak  iha, labele  husu  osan bo’ot, maibe ezekuta  fraku  iha  jestaun.avi/tos
.

Sem comentários:

Publicar um comentário

Nota: só um membro deste blogue pode publicar um comentário.