quarta-feira, 20 de julho de 2016

Timor oan 570 hetan HIV-SIDA, Maioria joven ho idade produtivu

.

Jornal Nacional Diário

Sekretariu ezekutivu Comissão Nacional  de  Combate  ao  HIV-SIDA, Daniel Marçal, informa, dadus  estatistika  Ministeriu  Saude  (MS)  hatudu, Timor  oan nain 570 mak hetan ona moras HIV-SIDA, husi numeru ne’e ema nain 67 mak mate ona no nain 212 hala’o  hela  tratamentu.

HIV-SIDA ataka ema nain 570 ne’e, maioria joven  feto  ho  mane  ho  idade  produtivu   tinan  15  to’o  25 no tinan 44.

Daniel Marçal esplika, kauza sira ne’ebé  kontribui  direta  no  indireta  ba  transmisaun  HIV ne’e mai  husi  ransu  no  sexu  livre. Dala barak joven feto no mane lori malu ba namora iha jardin Motael, Jardin  Largo, Jardin 5  de  Maio  no  tasi  ibun to’o halo relasaun seksual, ikus  mai  tenki  kaben sedu, isin rua  sedu, soe  oan  no  para  eskola.

Iha parte seluk, diskoteka no fatin kumu isin barak  iha  Dili  laran, ne’ebé  hanesan  fatin  diak  ba  joven  no  kaben  nain  balun  hodi  halo  ransu  livre  no  negosiasaun sexual, nune’e mos aktividade  prostituisaun  feto  ho  mane  no  mane  ho  mane.

“Tuir  dadus  ne’ebé  iha,  feto  Timor  oan  1.000  resin  mak  hala’o  vida  prostituisaun, seidauk  konta  ho  feto  estranjeirus  hanesan  China, Indonesia  no  sira  seluk tan,” dehan nia.

Tantu asaun konkretu ne’ebe Comissão  Nacional  de  Combate  ao  HIV-SIDA halo hodi hamenus  numeru  moras  HIV-SIDA  mak,  kontrola  fatin hirak  ne’ebé  sai  potensia  no  forsa  makas  ba transmisaun moras ne’e, hanesan fatin kumu isin sira no jardin públiku.

Nia mos fo hanoin katak, moras HIV-SIDA laos moras babain, ne’ebe tenki prevene agora. Joven mak  hun, rin  no  futuru   nasaun  ida  ne’e, tan ne’e tenki kuidadu an, atu  labele  sai  vitima  ba  HIV-SIDA, laos tanba deit domin no direitu ne’ebe tenki implimenta relasaun seksual.

Ikus nia dehan, Comissão  Nacional  de  Combate  ao  HIV-SIDA kria ona uma rekoperasaun saude ba  ema  ho  virus  HIV-SIDA iha  Tibar, hodi bele halo tratamentu ba vitima hodi hemu aimoruk rutina, bainhira rekopera tiha mak sira fila fali ba sira  nia  hela  fatin  hodi  kontinua  sira  nia  moris.

Nia realsa, Timor  oan  ne’ebé  hetan  ona  moras  HIV-SIDA no konsege  rejista  ne’e  mak hamutuk 570,  seidauk  konta  ho  sira  ne’ebé  mak la’o lemorai iha  liur.Tos
.

Sem comentários:

Publicar um comentário

Nota: só um membro deste blogue pode publicar um comentário.