segunda-feira, 12 de dezembro de 2016

Hanesan onra ba Lu-Olo tanba Fretilin hili nia nu’udar kandidatu ba Prezidénsia Timor-Leste

.

Prezidente Fretilin, Francisco Guterres Lu-Olo, ohin dehan katak “hanesan onra bot ida” tanba kuadru no militante partidu nian, fó konfiansa, hodi desidi apoia ninia kandidatura ba eleisaun prezidensiál 2017 iha Timor-Leste.

"Desde inisiu tinan ne’e, ha’u simu ona mensajen no deklarasaun apoiu hosi kamarada rejiaun hothotu nian, veteranu no konteráneu sira, maski la’os militante Fretilin nian, maibé sira fi’ar ba kbi’it ne’ebé ha’u iha hodi ukun nasaun ne’e hanesan Prezidente ba timor-oan hothotu”, dehan Lu-Olo ohin durante konferénsia imprensa ida ne’ebé hala’o iha Dili.

"Ha’u sente hanesan onra bot ida ba ha’u, tanba hetan konfiansa hosi kuadru no militante Fretilin, inklui sidadaun seluk ne’ebé tau fi’ar ona ba ha’u. No ho onra, ha’u simu dezafiu ne’e, no fi’ar katak ita hotu sei manan”, dehan Lu-Olo.

Konferénsia imprensa ne’e hala’o iha sede partidu nian ne’e, hodi aprezenta Lu-Olo ninia kandidatura ba eleisaun prezidensiál iha fulan marsu, 2017.

Sorumutu ne’e, akompaña hosi membru Governu balun ne’ebé hanesan mos militante no dirijente partidu, deputadu no elementu Fretilin (Frente Revolucionária de Timor-Leste Independente) seluk, no José Reis, sekretáriu jerál adjuntu maka lee rezolusaun ne’ebé aprova durante Komisaun Polítika Nasionál, hodi formaliza Lu-Olo ninia kandidatura.

“Komisaun Polítika Nasionál, hasoru malu iha sede nasionál hodi aprezenta kamarada Francisco Guterres Lu-Olo, hanesan kandidatu partidu ba eleisaun prezidensiál 2017”, tuir saida maka fó sai hosi rezolusaun Fretilin.

Testu ne’e, rekoñese “aspirasaun” hosi kongresista hirak ne’ebé halo parte iha Kongresu Nasionál partidu nian iha fulan outubru liu ba, hodi “hatudu vontade unánime durante ” iha konferénsia subnasionál hothotu” no ne’ebé Lu-Olo “iha kualidade hothotu atu asumi kargu hanesan xefe Estadu”.

Atuál prezidente, Taur Matan Ruak, ohin hahú rona partidu hothoti define kalendáriu eleitorál, ne’ebé sei hakotu ho tomadaposse ba sira-ninia susesór iha 20-maiu-2017.

Lu-Olo hanesan kandidatu datolu ne’ebé fó formalmente ona ninia kandidatura, hafoin António Maher Lopes (Fatuk Mutin), ne’ebé apoiu hosi Partido Socialista de Timor (PST), ho José Neves, eis-visi-komisáriu hosi Komisaun Antikorupsaun (CAC), aprezenta-aan hanesan independente, fó sai sira-ninia kandidatura.

Ida ne’e hanesan vez datolu maka Francisco Guterres, tinan 61 kandidata hikas fali ba Prezidente, hafoin lakon iha 2007 no 2012.

Iha eleisaun volta dahuluk, tinan 2007, Lu-Olo maka hetan votu barak liu, entre kandidatu ualu, ho votu 28%, maibé nia lakon iha vlta daruak, tanba José Ramos Horta maka hetan apoiu maka’as hosi kandidatu sira seluk ho votu 69,13%.

Iha 2012, Lu-olo hanesan mos kandidatu ida hosi 12 ne’ebé aprezenta ba eleisaun no manan fali iha volta dahuluk, maski iha segunda volta lamanan, tanba hetan de’it votu 39,15 kontra 60,85%, hosi votu ne’ebé Taur Matan Ruak, atuál prezidente hetan.

Iha kampaña ne’e, Taur Matan Ruak hetan apoiu hosi eis-Prezidente Xanana Gusmão.

Ohin loron dinámika lahanesan no iha evidénsia ne’ebé hatudu katak iha prosimidade entre lideransa Fretilin ho Xanana Gusmão, prezidente CNRT (Congresso Nacional para a Reconstrução de Timor-Leste), hanesan partidu ne’ebé ladauk aprezenta ninia kandidatu ruma.

Taur Matan Ruak konfirma ba Lusa iha tinan 2015 katak, nia sei lakandidata-aan ba mandatu daruak Prezidénsia, maibé sei aprezenta-aan iha lejislativa partidu foun Partido de Libertação do Povo (PLP).

SAPO TL ho Lusa
.

Sem comentários:

Publicar um comentário

Nota: só um membro deste blogue pode publicar um comentário.