sexta-feira, 6 de janeiro de 2017

TAUR MATAN RUAK SEI LA SIMU OSAN PENSAUN VITALISIA - SOSIEDADE SIVIL HATOO PETISAUN HALAKON PV

.

Jornal Nacional Diário - 06 de janeiro de 2017

Primeira Dama, Isabel da Costa Ferreira, deklara, mandatu Prezidenti Repúblika (PR), Taur Matan Ruak nian mak remata, nia sei la simu osan Pensaun Vitalisia (PV).

Primeira Dama Isabel Ferreira hanesan espoza husi PR Taur Matan Ruak nian hato’o lia hirak ne’e iha salaun enkontru Sentru Queshadip Ruak Tabessi, Dili, Kuarta (07/09), hodi responde jornalista kona ba PR Taur nian pozisaun kona ba osan PV.

“Ha’u hanoin ida ne’e maka tenki ser halo. Se ita la konkorda ho pensaun vitalisia, Prezidente kuandu hotu ninia mandatu, nia sei la simu osan PV ida ne’e,”promete Primeira Dama, Isabel Ferreira.

Primeira Dama, Isabel Ferreira, dehan tan, sira nian parte rejeita hodi lakohi simu osan Pensaun Vitalisia ne’e, desde uluk kedas, la’os foin agora.

“Ezemplu ida kuandu Prezidente uluk rezigna-an husi Xefi Estadu maior Forsas Armadas iha tinan 2011, nia mos  benefisiu ba lei pensaun vitalisia, maibe iha momentu ne’e hatete kedas la simu osan ne’e. Iha momentu ne’e ami hatete kedas, Prezidente la simu osan ne’e, osan ne’e ami aloka fali ba fundasaun ida faluk no oan sira ne’ebé presiza osan hodi selu oan sira  ba eskola. Entaun osan naton ne’e, ami entrega ba fundasaun, ami laiha osan refere. Ne’ebe wainhira prezidente remata nia mandatu tinan oin (2017), nia sei la simu osan pensaun vitalisia ne’e,”tenik Isabel Ferreira.

Iha parte seluk, bainhira husu kona ba informasaun ne’ebé espalla iha media sosial ema akuza PR Taur uza osan Estadu ba vizita suku retornu la iha, no returnu mak halo uma palasiu privadu ida iha Metiaut, parte Prezidente Repúblika ho Primeira Dama atu lori ema sira ne’e ba tribunal? Primeira Dama, Isabel Ferreira, hatán katak, sira la hanoin atu levanta kazu ne’e ba tribunal. Maibe importante ba sira (Familia PR Taur nian) mak klarifika ba públiku atu hatene deit katak uma ne’ebé sira halo no hetan kestiona husi públiku hanesan palasiu privadu ne’e, la’os uza osan Estadu nian, maibe uma ne’e uza osan privadu ka kosar ben rasik.

Petisaun halakon PV     

Sosiedade Sivil hanesan ONG sira, estudantes no individual sira ohin Kinta (08/09), sei lori petisaun ka deklarasaun konjunta ne’ebé husu atu halakon tiha deit Pensaun Vitalisia (PV), entrega ba Estadu, hanesan Prezidente Repúblika, Parlamentu Nasional, Governu no Tribunal Rekursu.

Tuir  portavoz sosiedade sivil, estudantes no individual ne’ebé asina deklarasaun hamutuk hodi husu atu halakon pensaun vitalisia ne’e, Mericio Akara, atual Diretor Organização Não Governamental (ONG) Luta Hamutuk liu husi konferensia ba imprensa ne’ebé hala’o iha salaun enkontru Sentru Queshadip Ruak Taibessi, Dili, Kuarta (07/09), hatete, moris iha situasaun ida Timor oan  barak moris iha mizeria ka kiak nia laran, la justu iha grupu sira balun moris liu fali posibilidade nasaun nian, tanba deit serbisu ne’ebe presta ba povu no Estadu.

Tuir Mericio Akara, serbisu publiku ne’ebé ezekuta hanesan titular ba orgaun soberania tenki hetan rekompensa ho justu remunerasaun no previlejiu balun ne’ebé dala ruma atribui ba ninia dezempeñu. Maibe  atu justifika ba tinan 1,5 ka 10 tenki iha atribuisaun pensaun ida no previlejiu vitalisia sira, ne’ebe liu fali seguransa sosial previstu iha artigu 22 deklarasaun universal ba diretus humanus no iha artigu 56  konstituisaun nian.

“Sidadaun sira hotu iha direitu ba seguransa no asistensia sosial, iha termus lei nian, maibe lei ne’e hatudu injustisa, ema ida la’os deit atu desobedese, maibe nia iha obrigasaun atu la halo. Haree katak Estadu iha deit  obrigasaun atu promove seguransa no asistensia sosial tuir disponilibidade nasaun nian maibe iha momentu ne’ebe fundu minarai enfrenta dezafiu bo’ot tanba folin mina rai tun no produsaun atu menus nafatin, sira ne’ebé tau iha kestaun sustentabilidade ita nia prinsipal fonte ba rekursu finanseiru.,” Mericio hatete.

Mericio hatutan, iha lei ida la justu, tuir lolos aprova no sei persiste nafatin ba interese  no privilejiu grupu kiik oan ida ka klase sosial ida deit, bainhira populasaun enfrenta nafatin difikuldade sira, ho rendimentu kiik maibe sira luta nafatin atu mantein sira nian moris hodi labele monu ba kiak.

Nia dehan, laiha  sentidu atu koalia kona ba seguransa sosial, bainhira la koalia kona ba justisa sosial. “Justisa sosial bele dehan katak fo asesu ba ema hotu hodi hela iha fatin diak. Maibe labele haree ba liafuan  sira ne’e ehanesan direitu id aba uma luxu Estadu nian ne’ebe uza to’o funsaun titular sira nian iha familia kiik sira nia leet, signifika fo asesu edukasaun ba ema hotu nia oan, la signifika katak fo edukasaun ba eis titular sira nia oan mak hetan direitu ba livru, ekipamentus no eskola sira ne’ebé diak hodi hametin nafatin siklu  titular  sira nian iha familia kiik sira nia le’et. Signifika mos fo asesu ba saude, aimoruk sira no atendimentu ba labarik no idozu sira, maibe labele signifika elite sira deit mak  iha direitu ba enfermaria VIP ka referenseia sira ba hospital no rai liur,”dehan Mericio.

Tuir Mericio, atu aseita katak lei pensaun vitalisia ne’e kontinua produs ninia efeitu sira, la iha sentidu bainhira la tetu didiak no hanoin mos ba kondisaun moris ne’ebé Timor oan tomak enfrenta.

“ami ne’ebé asina deklarasaun ne’e rekomenda ba Parlamentu Nasional ka orgaun kompetente sira atu halakon lei  ne’ebe la justu no efetua mos prosedimentu tenki nesesariu ba ninia revogasaun,”hatete Mericio.

Mericio hatutan, kuandu rekomendasaun ne’ebé sira hato’o mak la hetan konsiderasaun husi parte kompetente sira atu halakon PV, Sosiedade Sivil no estudantes entrega ba povu mak sei julga sira iha eleisaun jeral tinan 2017  mai.Des
.

Sem comentários:

Publicar um comentário

Nota: só um membro deste blogue pode publicar um comentário.