segunda-feira, 23 de janeiro de 2017

Xanana Apoiu Lu-Olo ba Prezidente 2017-2022

.

Matadalan- 23 de janeiro de 2017

Prezidente Partidu Kongresu Nasional Rekonstrusaun Timor-Leste (P-CNRT), Xanana Gusmão fó apoiu ba prezidente partidu Frente Revolusionáriu Timor-Leste Independente (Fretilin), Francisco Guterres “Lu-Olo” ba Prezidente da Repúblika period 2017-2022.

“Hanesan pesoal ha’u “Xanana” fó apoiu ba señor dotor Lu-Olo,” Xanana Gusmão hato’o lia hirak ne’e iha Aeroportu Internasionál Nicolao Lobato, Comoro, Díli, Segunda (23/01/2017).

Xanana dehan hanesan partidu polítiku ida, sei hein desizaun másimu iha kongresu partidu CNRT nian nu’udar desizaun mais alta ne’ebé sei akontese iha fulan oin.

“Hanesan pesoal. Partidu seidauk tanba serbisu ne’e maka ami adia hela kongresu. Hanesan pesoal, ha’u iha ha’u nia alin ida,” Xanana esplika.

Eis gerilleiru ne’e desmente totál informasaun ne’ebé espalla iha públiku katak Xanana hasoru Horta iha Singapura hodi diskute kona-ba apoiu Xanana nian ba Horta iha eleisaun Prezidensial 2017.

“Laiha, ha’u ba serbisu komisaun. Ha’u la hasoru Sr. Ramos Horta, ha’u hatene dehan nia ba halo konferensia ka pidato ida besik ami hela ne’e mais lae ida, ha’u la hasoru nia ida,” Xanana dehan.

 Prezidente da repúblika dekreta ona kalendáriu ba Eleisaun Prezidensial iha loron 20 Marsu 2017. To’o oras ne’e seidauk iha kandidatu ida maka ba rejistu hodi partisipa iha eleisaun prezidensial. (Ome/Efrem)
.

Sem comentários:

Publicar um comentário

Nota: só um membro deste blogue pode publicar um comentário.